شحالكن خواتي ؟ عساكن في احسن حال
و ان شاء الله حياتكن كلها سعادة و حب و موده و تفاهم ^_^
:
:
اليوم حبيت اطرح موضوع مهم جداً و أغلب حريم غافلات عنه !!
يشهد الله اني ما كتبت هالموضوع الا من حبي لكن و لاني ابغيلكن الخير و ابغي أفيدكن 
اول شي انا مب متزوجة و بعدنيه آنسة حلوة شطورة أمورة هههه 
لكـــــــن أحب اقرا و اتثقف و احضر دورات و عندي خبرة في الحياة الزوجية و هالشي مب عيب ولا غلط .. بدال ما الوحده تقضي أوقات فراغها في اشياء تافهه او ضاره ؛ حلو انها تقرا و تتعلم و تثقف و تكتسب خبرة بتفيدها في المستقبل
موضوعي اليوم عن الثـــــــقة بالنفس …
اول شي بسئلكن كم وحده فيكن واثقة من نفسها ؟!!
مابغي ثقة بالكلام و بس … لا لا أهم شي الفعل و التطبيق
طبعاً كلنا متفقين انه مافي شي مثالي في هالدنيا و الكمال لله سبحانه و تعالى و مثل ما يقولون (الزين ما يكمل حلاه)
يعني الزبده كل وحده فينا لها عيوبها و ماشي وحده كامله مكمله الا اذا كانت سووبر وومن
سواء كانت هالعيوب جسدية او نفسية او ثقافية او اجتماعية نبغي نعرف كيف نتغلب عليها و نتخلص منها و نمحيها من حياتنا ؟!!
ما نحتاج عمليات تجميل ولا مكياج ولا دورات مكثفة ولا تصنع او تكلف .. و انا هنيه ما اقولج لا تحضرين دورات و لا تتعدلين و لا تتكشخين !!
طبعاً الإهتمام بالنفس مطلوب و تطوير الذات شيء مهم جداً لكن قبل هذا كله الخطوة الأولى لازم تبدأ من داخلنا من ذواتنا و أنفسنا …
بتسئلوني كيف يعني و شو قصدج ؟!
صدقوني ( الثــــــــقة بالنفس ) هي الحل الفتاك لكل العيوب و النواقص ..
تأكدي و ثقي تماماً ان الريال يمووووووت في الحرمة الواثقة من نفسها
و لا تنسون انه في فرق بين الثقة بالنفس و الغرور !
الغرور حالة مرضية ناتجة عن النقص و عدم القناعة و الجهل ..
كيف الانسان يغتر و يتكبر بشي هو ما يملكه أصلاً ؟!!
مغترة بجمالج ؟ ….. الله وهبج هالجمال مب انتي اللي صنعتيه
مغترة بمالج ؟ ……. الله سبحانه و تعالى اللي أنعم عليج و رزقج بالمال و الجاه و الثروة
مغترة بأصلج و حسبج و نسبج ؟ ……. الله سبحانه و تعالى اللي خلقج و كتبلج تكونين بنت العايلة الفلانية و الأم الفلانية و الأب الفلاني
مغترة بزوجج و دلعه لج و اهتمامه و حبه ؟ ……. الله اللي رزقج هالزوج الطيب و كتبج من نصيبه و جعلج قرة عينه من قبل ما تنولدين
بعد هذا كله ليش الغرور و التكبر و التعالي ؟!
الله سبحانه و تعالى قال في كتابه الكريم : { ولا تصعر خدك للناس ولا تمش في الأرض مرحا إن الله لا يحب كل مختال فخور }
نرجع لموضوعنا لكن بس حبيت أوضح هالنقطة ^_^
مثل ما اتفقنا كل وحده فينا لها عيوبها و محد كامل لان الكمال لله سبحانه و تعالى
اللي صدرها صغير و تبغيه يكبر
و اللي صدرها كبير و تبغيه يصغر
و اللي متينة و تبغي تضعف
و اللي ضعيفه و تبغي تمتن
و اللي بشرتها تعبانه و تبغيها تكون صافيه
و اللي بطنها فيه تشققات و تبغيها تختفي
و اللي عندها مناطق داكنه في جسمها و تبغيها تفتح
و اللي شعرها متقصف و تبغيه يكون ناعم و سايح
و اللي و اللي و اللي ……. الخ
تبغين تعالجين هالعيوب كلها ؟!!
نصيحتي لج لا تركزين عليها و تغاضي عنها
كوني إيجابية كوني إيجابية كوني إيجابية
لان ثقتج بنفسج و نظرتج و تقديرج لها تنعكس على نظرة زوجج لج و اهتمامه فيج ( و هالشي ينطبق على كل الناس )
نحن اللي نرسل إيحائات سلبية أو إيجابية للطرف الأخر و بالتالي تنعكس هالإيحائات على نظرة الطرف الثاني و تقديره لنا .. و هذي كلها حقائق علمية و واقعية قريتها في كتب و دراسات اجنبية و تعلمتها من الحياة
انتي اللي تحسسين الطرف الثاني انج تستحقين الاحترام
انتي اللي تحسسين الطرف الثاني انج تستحقين التقدير
انتي اللي تحسسين الطرف الثاني انج تستحقين الحب و الحنان
تبغين تكونين ملكة جمال في عيون زوجج و أجمل الجميلات ؟!
تغاضي عن عيوبج و لا تركزين عليها و كوني واثقة من نفسج و مظهرج =)
اذا انتي ما ركزتي على عيوبج و نسيتيها صدقيني الله بيعمي عيون زوجج عنها و ما بيشوفها أبد ولا بيحس فيها
و العكس صحيح ؛ كل ما ركزتي على عيوبج ودققتي فيها و فكرتي في نواقصج بتلفتين نظر زوجج لها حتى لو ما كنت مفتكر او مهتم ..
كوني انسانة إيجابية و مشرقه و متفائلة و محبه لنفسج و للحياه .. ركزي على إيجابياتج و ابحثي عنها و قدري نفسج و دلعيها و اهتمي فيها عشان هالشي ينعكس على نظرة زوجج و اهتمامه و معاملته
دايماً رددي بينج و بين نفسج انا حلوة انا جذابة انا متميزة انا مب ناقصني شي …. الخ
من اليوم و رايح لا تفكرين في نواقصج و الاشياء اللي تضايقج في جسمج .. انسيها اتغاضي عنها بس اهتمي بنفسج و حاولي تعالجين هالعيوب بإيجابية و صدقيني بتكونين أسعد انسانه و أحلى وحده في عيون زوجج
لا تتأثرين بكلام الناس و كوني قوية و واثقة ما يهزج شي .. لا تنجرحين من الانتقادات لكن فكري كيف تستغلينها بطريقة إيجابية و تستفيدين منها لصالحج حتى لو كانت جارحه ( و هذا نوع من الذكاء )
و بخبرج سر .. لو ريلج حاول يغيضج او يقهرج او قارن بينج و بين غيرج من الحريم قوليله بكل ثقة صح اني اغاار عليك لكن (اللي عنده القــــمر شو يبغي في النجوم ؟) و ( حد يبدل الثـــــــريا بالثرى ؟! ) .. صدق بيتخبل على ثقتج بنفسج ^_*
الحديث يطول في هالموضوع و انا ماريد اثقل عليكن بس اتمنى تستفيدون من الموضوع و لا تنسون انه مجرد مجهود شخصي و حاولت اكتب بإسلوب بسيط و سهل و سلس و ابتعد عن التعقيد و التفاصيل الدقيقة عسب توصل المعلومة لكل المستويات الثقافية و الفكرية و يستفيدن أكبر فئة من البنات ..
لا تنسوني من دعوة حلوة في ظهر الغيب ان الله يوفقني في دراستي و يرزقني بولد الحلال ^_^
لكن ودي بحجم الســــماء
الله يحققلج مناج
برغم انه ذوقي واسلوبي اتغير بعد الزواج ..بس انا عطيت زوجي من البدايه انه مالي ذوق ولا شور
وطبعا هذا اكبر غلط …قام دايما ..يستشير اخته في كل شي
واذا بنشتري لبس ..ابد ما يثق في ذوقي ..
وان شاء الله احاول اني اكون وااثقة من نفسي ..لاني صدق تعبت من التجاهل وعدم الثقة
تسلمين اختي على الموضوع الراائع
وان شاء الله في ميزان حسناتج
انظر إلى نفسك كشخص ناجح وواثق و استمع إلى حديث نفسك جيدا واحذف الكلمات المحملة بالإحباط ،إن ارتفاع روحك المعنوية مسئوليتك وحدك لذلك حاول دائما إسعاد نفسك ..اعتبر الماضي بكل إحباطا ته قد انتهى ..وأنت قادر على المسامحة أغفر لأهلك… لأقاربك لأصدقائك أغفر لكل من أساء إليك لأنك لست مسؤولا عن جهلهم وضعفهم الإنساني.
تسلميـــــــــــــــن الغالية على الموضوع الرائع والذي مهما تحدثنا فيه …..سنتشعب أكثر واكثر….
وتقبلي مروري
أشواااق