اخواتي الكريمات … موضوع كنت افكر فيه من دقائق قليله و شفت موضوع للآخت العناء في هذا القسم بعنوان الزعل… تشجعت و كتبت موضوعي هذا و حابه اشوف انتم بشو تنصحوني لاني و بكل صراحه .. اقدم خطوه للامام و ارجع بألف خطوه للخلف
غالياتي انا من حوالي اربع شهور حصلت مشكله بيني و بين زوجة عمي ( عمي اخو ابوي) اساس المشكله هي كلام قالته للوالده شوهت فيها صورتي قدام الوالده بشكل مو طبيعي و والدتي بلحظة عصبيه حكت لي مرت عمي شو قالت عني… انا بصراحه زعلت كثير لان مرت عمي مثل صديقتي و انا دوم عندهم او اتصل فيها يعني بين قوسين مستودع اسراري.. حسيت بالم عظيم و الوالده ندمت انها قالت لي و طلبت مني انسى الموضوع و ما افتحه مع مرت عمي حتى ما اسبب احراج لوالدتي لآنها نقلت الكلام لي و اسامح مرت عمي خاصه انها بكبر والدتي .. تأذيت كم يوم و قطعت اتصالي ببيت عمي لآني كنت حاسه اني اذا اكلم مرت عمي معناته اني انافقها لآن قلبي محمل عليها
مرت فتره و قلت يا بنت عيب مهما كان المره بمقام امج و عيب عليج … رجعت كلمت مرت عمي لكن مو مثل الاول و حتى هي حست يعني كنت اقوم بواجبي تجاها من ناحية السلام و غيره فقط و ما اطول بالحكي معها…. و بمره اجت زيارة عندنا و كان خطيبي موجود( انا معقود قراني عليه) بينت لخطيبي بصورة مباشره انه غير مرغوب فيه ابدا رغم ان خطيبي يعتبرها مثل امه و كان دوم يزورهم وحده او انا معه يعني علاقته قويه فيهم … المهم صارت تعمل حركات غير لائقه و اخير شي قالت له كلام يجرح كثير اشبه بالطرده.. هو ما اخذ بكلامها و طلع بعد فتره و هو يضحك … انا زعلت كثير لانها اهانت خطيبي و جرحته صحيح هو ما اهتم لانه يقول هذا كلام حريم و الرجال ماياخذ بكلام مره و هذا البيت مو بيتها حتى تطردني منه لكن انا تأثرت حيل لان خطيبي ما غلط ولا قصر في حق احد في يوم
الحين الي 4 شهور قاطعه علاقتي بمرت عمي.. اتصل بعمي و اتواصل معه لكن هي لا … و المصيبه انها ما حاسه انها عملت شي و تعاتب امي و تسألها ليش ما تتكلم بنتج معي و الوالده ما تحب تتدخل بالموضوع لان عارفه ان الموضوع لو يوصل لعمي ما راح يحصل طيب
انا ناويه ازورهم بعد رجعتهم من السفر لانهم الحين مسافرين … قلت بما اننا على ابواب شهر رمضان حرام اكون قاطعه لصلة الرحم لكن كل ما افكر اني ادخل بيتهم اتذكر اهانتها لخطيبي و اقول كيف ادخل بيت زوجي ما عاد يحب يدخله او اتكلم مع مرت عمي و هي اهانت خطيبي و جرحته
اسفه اذا طولت عليكم لكن هذا الموضوع بجد شاغلني .. خطيبي يقولي انسي و سامحي مهما كان هذي زوجة عمج لكن انا بيتهم ما عاد ادخله لان زوجة عمج حسستني اني شخص غير مرغوب فيه و انا ما احب افرض نفسي على حد
انتظر نصائحكم و ردودكم اخواتي
يوم ربنا يسامح كيف احنا البشر مانسامح ؟!
يا اختى انا ما اقولج انه النسيان شي سهل ويمر ويسير بلحضه لا انا اعرف اثاره وشفته من ناس قراب منى بحكم الصداقه وبحكم اشياء وايد بس تعرفين شو كنت اسوى ارمسها واكون وياها اوكي وكل شي بس ابدا ما ابين لها انى زعلانه منها ومع مرور الايام اصلا نسيت علشو زعلانه منها اصلا والاحلى من كل هذا انه النتيجه انج تحسين بشعور حلو انه بالرغم من الى تسويه لج انت تقابلينه بالاحسان بيقربج من رب العالمين وعلى فكره بتنظمين لفئة والكاضمين الغيظ والعافين عن الناس وفعلا والله شو ما خذين من الدنيا كل هذا التسامح بينكتب في صفايحنا علنا لوجه الله باذن الله وساعتها بنقول الحمدلله رب العالمين انا سامحنا في الدنيا .
والدنيا مافيها خير اليوم نحن فوق التراب بااجر تحت الترااب
تسلمين غاليتي ع الموضووع ..~
كلي دلال تسلمين على ردج الي عجبني كثير ولا يهونون الاخوات كلهم.. ربي يسعدكم و يرزقكم السعاده في الدارين يعون الله
و مره ثانيه تسلمون على ردودكم الطيبه