للي عندها معلومه عن عملية اللوزتين والجيوب الانفيه للطفال 2024.

السلام عليكم ورحمة الله وبركاته
انا عندي ولدي عمره 8 سنوات الله يخليه لي ويخلي عيالكم عنده مشاكل باللوزتين والجيوب الانفيه من كان عمره 3 سنوات
وصبرت عليه وحاولت قد ما اقدر اني اتفادى العمليه بس ما يفيد خشمه كل الوكت مسكر واللوزتين ملتهبات الله يخليكم يبنات الي ولدها مسوي هالعمليه تفيدني بعض معلومات عنها وكم فترة الريكوفري وكيف الالم وهل هي خطره او لا على فكره انا اراجع بولدي عند الدكتور محي الخياط استشاري الانف والاذن والحنجره .

ماعليه شر ان شا ءالله اتوكلي على الله انا سويت ولدي يمكن كان عمره سنه وست شهور لان ما كان في مجال اتريا اكثر وطول الليل شخير وتعب واييد الحمد الله سويتها واحسن الحين بواييد وربي يوفقج ان شا الله

شكوره اختي الله يحفظه لج بس قالولي انه من يتمرض او يحوشه برد ينزل على صدره وتستوي التهاب رئوي وانها خطره من هالناحيه

الغاليه انا سويت لعيالي 2
اولا انا ما كنت ادري انه فيهم لحميه
بس بنتي كان من تزكم على طول تستوي ما تسمع مول اتم ازقرها ما ترد الين ما لوقف جدامها تصوري….
وكنت سايره للدكتور حسين عبدالرحمن على ها الاساس انه بنتي عندها مشكله في اذنهاوبعدين يوم فحصها
قال هاي عندها اللحميه وايد كبيره….
و من كبرها كانت مسكره فتحات الانف عندها…..
وحدد العمليه عقب يومين من الففحص ……..
وكنت وايد خايفه ……….
وتوكلت على الله والحمدلله……..
العمليه ما تاخذ غير اقل من 45 دقيقه ويطلعونها ………..
الياهل يتم راقد فتره من اثر البنج ………
وبعدين يوم ينش ياكلونه ايس كريم……
وفي نفس اليوم اتروحين الحمدلله………
بيعطيج شويه ادويه من بينهم مضاد حيوي وبس ان شاء الله في نفس اليوم بياكل…..
على فكره الدكتور حسين يسويها بالليزر يعني مول الطفل ما ينزف دم الحمدلله………..
العمليه في مستشفى باللهول اللي في الضيافه
والله يحفظ لنا عيالنا اجمعين

تسلمين اختي طمنتيني انا حالة ولدي نفس حالتها بالضبط انشالله بسويها وتعدي على خير باذن الله
الله يخليلج عيالج وتفرحين فيهم امين

اختي لا تخافين وتوكلي على الله وسويله العمليه انا اولدي سويتله العمليه واصبح بخير والحمد لله وافتكينا من النخير ومن التهاب اللوز والبلغم وغيرة والعملية مثل ما قالت الاخت ما تاخذ ساعة بالكثير 30 او 45 دقيقة ومن يصحى من البنج اعطييه ايسكريم الله يخليه لج ويقومه بالسلامة .

انا بعد مسويتها لولدي السنة اللي طافت في شهر 12 و كان عمره3 سنوات و 7 شهور و ثاني يوم رخصوه و قالوا لا
تاكلينه شي ساخن و لا شي صلب ابدا لمدة 3 ايام يعني اشياء لينة و باردة مثل جلي-كستر-كريم كراميل-عيش اطحنه ويا الروب-شوربه بس تكون باردة-ايس كريم

و الحمد لله افتك و طار الشر عنه و صحته صارت احسن اللهم لك الحمد و الشكر