ماسك الشاي الاخضر 2024.

مرحبا يابنات
الحين الصيف والمناسبات …

يعني الاول مكروه والثاني محبوب

ويوم الكل يشتكي بشرتي باهته ومافيها حياه ولا نضاره شرات الورده الذابله

جربوا هالماسك اللي بينعشها وبيعطيها لمعه طبيعيه ما تبغين تستخدمين عقبها المكياج
وبيساعدج في التخلص من اللطخات واثار البقع اذا داومتي عليه مره في الاسبوع ويحارب التجاعيد بفعاليه خصوصا لو شربتي الشاي الاخضر يوميا بعد
مايحتاج تسوين قبله تنظيف ولاشي مجرد انج تستخدمين الميلك والتونيك وخلاف استخدميه
حلو للبنات اللي ويهن دهني أو جاف أو حتى قبل الحفلات وفي السفر بيساعدكن وايد في الحفاظ على بشرتكن من تعب الحواطه كل يوم من الصبح لين المغرب(اذا كنتو مثل حالي ومايهون عليكن تردن الفندق الا عقب ما تخلص بطاريتج وتقومين تسحبين ريلج )

بس للبنات الكلاسيك اللي يقولن لازم نسوي بخار أول بقولهم أوكي

سوي بخار لمدة خمس دقايق بحبة فيتامين C من لاش وخلاف اتبعي طريقة الماسك

هاي الاشيا اللي بتحتاجونها

المكون الرئيسي هو الشاي الاخضر ومعروف طبعا بمقاومته للأكسده وتطهير البشره
العلبه هاي يايبين لي اياها من الصين والصراحه ما حبيت طعمه غير عن اللي في الاكياس
فقلت خل أستفيد منه بدل ما افتح اللي بالاكياس الصغيره فخذته وطحنته بشكل ناعم والحين بستخدمه جدامكم

1 ملعقه كبيره شاي أخضر مطحون ناعم
1 ملعقه صغيره نعناج جاف ومطحون أو سدر مطحون ناعم (اللي متوفر عندج)بس النعناج مفعوله عجيب ويا الشاي الاخضر
1 ملعقه صغيره عسل
1 ملعقه صغيره عصير ليمون طازج
1 ملعقه صغيره شوفان مطحون أو نخاله واذا ما عندج مب مشكله كنسليه من المقادير
1 ملعقه ماي ورد

نقطتين او ثلاث من اي زيت للبشره متوفر عندج في البيت وممكن من هالانواع اللي بالصوره

زيت ارغان

زيت السمسم

زيت اللوز او زيت أرغان أو زيت جنين القمح أو زيت بذر العنب ..اللي متوفر عندج

أخلطي المقادير ويا بعض وافركي بها ويهج لمدة دقيقه بس حركات دائريه وبالخفيف يعني مب معاملة جدر محترق
خلاف خذي الباقي وادهني به كل ويهج ورقبتج وتحت عيونج بعد واتركيه نص ساعه ابدئي عمل مساج ناعم لكل الوجه والرقبه
غسلي ويهج بماي بارد ورشيه بماي الورد البارد وخلاص
النتيجه طبعا فوريه نظافه وانتعاش ولمعه غير طبيعيه

اللي حابه تسوي هالطريقه بالسفر تاخذ وياها خليط من الشاي الاخضر المطحون والنعناع المجفف المطحون وغرشه صغنونه فيها الزيت اللي تبغيه
وفي السفر كنت اخذ العلبه الصغيره اللي فيها عسل دايما يحطونها ع الريوق احطها وياي واخذها الغرفه استخدمها نص لماسك الشاي الاخضر ونصها فوق علبة الروب بالليل اكلها

ألف شكر ختيه ع الطرررح الغاوي