موضوعي تكرر الاف المرات يمكن ^_^ بس مالي غيركن خواتي
باختصار ابا اعرس ههههههه
انا ماشوف عمري كبيرة وايد ,,عمري 23 سنة والحمد الله اشتغل وادرس نفس الوقت
بس المشكلة اغلب ربيعاتي عرسن وعندهم عيال .. انا وايد احب الصغاريه بشكل وخاطري يكون عندي يهال .. خاطري أجرب احساس الامومة
غير هذا انا وحدة وايد اجتماعية واحب اظهر من البيت .. نادراً مايلس في البيت والسبب اهلي
كله مشاكل وضرايب فصرت اتحاشاهم عندي اخوان بس مايهشون ولاينشون .. فانا صرت كبش الفداء
لحل مشاكلهم
تقدمو لي 2 بس مالي نصيب وياهم .. ومن عقبهم مايوو خطاب ابدا 
الحمد الله انا وايد اجتماعية والناس تعرفني وتحبني بس مالي نصيب في هالزواج
ابا اعيش حياتي الصراحة .. ابا احس بجو الحب والحنان انا من اظهر برا البيت الضحكة ماتفارقني
ويوم ارجع .. اسكر علي الغرفة واتم ع النت .. دوم افكر في الريل هذا هههههه ..
مرات احس انه حلم احلمه .. كلما وحده من ربيعاتي ربت ولاعرست اتمنالهم الخير .. بس اانا متى بيي دوري .. ماعرف احس نحن المب معرسات منبوذات صراحة
مثال : انا وحدة احب اماكن البر و المنتجعات يعني باختصار اماكن هادية وتهدئه اعصاب
كل ماتصل ..لا لازم مبييب او يكون المكان مناسب للمعرسين مايصلح يكون للبنات وانا اهلي مثل ماذكرت مايظهرون لهاي الاماكن بسبب مشاكلهم وانا ماروم اسير روحي وياربيعاتي طبعاً والله يحز في خاطري كل ربعي يسيرون ويا اهلهم او ريايلهم .. حتى السفر او البر
يعني شو اسوي من حقي اعيش حياتي ماابا اقضي عمري في حل مشاكل اهلي .. ابا اتفرغ لنفسي شوي والله اني شالتنهم في عيوني بس مهما يكون الواحد يبا نصه الثاني يريح له باله ويحبه ويعوضه عن شافه في حياته
ادري احين المعرسات بيتهجمن انتي شتبيين في العرس وحاله وصدعة راس وانتي ماعندج سالفه لووول
.. بس انا اقول العرس يصون البنت ويحفظها حتى لو فيه مشاكل .. انا وصلت مرحلة اني ماهتم لامور العرس من فستان وتزهيب وخربطان بنات الزمن .. المهم ريال يصوني ويحن علي ويكون ظهر لي .. لان اهليه عمرهم ماكون لي ظهر وسند .. يعني سبحان الله عرست وصارت مشكله بيني وبين ريلي ماتوقع اني برد بيت ابويه ,, لان دام انا صغيرة ماضمني بيضمني وانا كبيرة عقب ؟ يمكن تقولون انا ابالغ .. بس هذا الواقع
مرات افكر انا احين اشتغل واصرف على روحي .. لو كنت ريال كنت تزوجت وطلعت من البيت
انا بالعكس وايد احب اهلي وانا ماحب اعوقهم رغم انهم هادمين لي حياتي غير اخواني الي مب مهتمين ..بس ابا اعيش حياتي .. ابا استقر نفسيا وعاطفياً .. ابا بس راحة البال 
ادري وايد هذرت ههههههه بس مالي غيركن خوات
الي بترد بليز من غير تجريح .. مابا غير دعواتكم لي ولخواتي المب معرسات ان الله يرزقنا الريل الصالح الي يصونا
هذا والسلام ^_^
والله مااقول غير اقري القران (سورة البقرة) وخاصة بآخر الليل واستغفري واايد
((يارب ارزقها زوجا صالحاا يحفظها ويحميهاا))اللهم امــــــــــــين
https://forum.uaewomen.net/showthread…9#post16635719
دعاء الضيق و الحاجه:
________________________________________
دعاء وقت الضيق :
اللهم يا شاهد كل غائب ويا قريبا غير بعيد ، و يا غالبا ليس مغلوب ، اجعل لي من امري فرجا ومخرجا و ثبت رجاءك في قلبي واقطعني عمن سواك حتى لا أرجو غيرك ، اللهم يا من كفاني كل شيء اكفني ما أهمني من أمور الدنيا و الآخرة و صدّق قولي وفعلي بالتحقيق ،، اللهم فرج عني كل ضيق و لا تحملني ما لا اطيق ، برحمتك استغيث.
دعاء الحاجه
لا اله الا العظيم الحليم , لا اله الا الله رب العرش الكريم , لا اله الا رب السماوات ورب الارض ورب العرش العظيم
اللهم اني اسالك موجبات رحمتك وعزائم مغفرتك والغنيمة من كل بر والسلامة من كل اثم والفوز بالجنة والنجاة من النار
لا تدع لي ذنبا الا غفرته ولا هما الا فرجته ولا حاجة من حوائج الدنيا هي لك رضا الا قضيتها برحمتك يا ارحم الراحمين
وصلى الله على سيدنا محمد وعلى اله و صحبه اجمعين
استغفري فاليوم فوق الالف مرة وبييج نصيبج ركض مختصرلج كل سنوات الانتظار جربي
حاولي تخلين تفكيرج اييجابي شوووي ولا تخلين الدنيا سووده فنظرج
والزواج قسمه ونصيب ،عليج بالصبر بس