معلماات اللغة الانجليزية اتفضلو دشو :) 2024.

انا تخصصي مدرسه لغة انجليزيه..وان شاء الله اقدر افيدج الغاليه..

بالنسبه لطرق التدريس..هذه طريقه ناجحه انا كنت استخدمها وناسبتني:

(5) دقايق
اول الحصه تعطين اليهال warming up
هذا مدته 5 دقايق يعني تنشط اليهال..وعادة يكون بلعبه..
مثلا تحطين الفلاش كاردز وتخلينهم يوصلون الكلمات مع الصور..
او تخلينهم يغنون مع استخدام حركات

————————-
(5) دقايق
مراجعة الدرس السابق عسب تتاكدين انهم فهموه..
مثلا تكونين مزهبه لهم ورقة عمل تراجعين فيها الدرس

————————–
(5) دقايق
تعطينهن المفردات اليديده…ولازم تحاولين تخليهن هن يعطونج المعنى ..مب
تعطينهن الاجابه..خليهن يفكرن شوي..ويمكن وحده تعرف المعنى..

————————-
(10) دقائق
قراة الدرس(اذا كنتي محتاجه بتستخدمين الكتاب)اذا كانت اغنيه او حوار مثلا ..
* سمعيهن الشريط (مجرد سماع)
* اقراي الكتاب بصوت عالي ومسموع وخليهن يتبعن وراج
* افتحي الشريط وخليهن يكررن ورى الشريط
*اختاري كم بنيه عشان تقرى بروحها

—————————
(2) دقيقتان
حاولي تكسرين الملل اللي ممكن يصيب البعض من الطالبات من جراء القراءة ..بانج تنعنشيهن شوي..مثال (تعطينهن كلمات وتخلينهن يمثلونها بالحركات- Jump- Climbe- run-wave
—————————
(10) دقايق
5- عطيهن تمارين خاصة بالدرس اليديد..عسب تتاكدين ان المعلومات وصلت ..

————————–
(5) دقايق

تحاولين تراجعين الدرس كله مراجعه سريعه بتمرين سريع وممتع

————————————–
بالنسبه لترتيب الطالبات..حاولي انج تحطين اي طالبه متفوقة مع الطالبة الضعيفه ..بحيث ان الضعيفه تتشجع..

اما بالنسبة للوحات..بالعكس هي وايد تحفيزيه لهن وماتأثر على الطالبات بانهن ينشغلن..انتي اللي تحاولين تلفتين اتباهن بطرق حديثه وممتعه للاطفال.
اللوحات ممكن تساعدهن في بعض التمارين اذا وحده نست لون مثلا ..تطالع الصوره اللي في اللوحه وتذكر..الخ..

———————————
اتمنى اني قدرت اساعدج لو شوي..

بالتوفيق ان شاء الله ..ولاتنسيني بالدعاء يالغلا

تحياتي:
ام حمود