ف البـــداية اهم خطوة ف المكياج نظافة البشرة ونضارتها ..
اذا كانت بشرتج تعاني من الجفاف عليج بشرب الماي وااايد واذا كنتي من النوع الي يشرب ماي وايد لازم تعتنين فيها من خلال الكريمات ومنظفات البشرة ..
(( البيس base )) تسخدمينه قبل الفاونديشن عشان يعطي رونق ونور حلو للبشرة ويسوي lifting طبيعي
في انواع تكون عادية شفافة تناسب جميع انواع البشرة وانواع ثانية فيها نسبة من الفاونديشن وهاي ع الاغلب ما تكون للاستخدام اليومي ومكياج النهار ..
((الكونسيلر ومخفي العيوب ))
*الكونسيلر تستخدمينه عشان توحدين لون منطقة العيون ولاخفاء بعض العيوب مثل الهالات السودا ..
يستخدم الكونسيلر احيانا حق المناطق الغامجه مثل حولين الشفايف وزوايا الخشم
وتستخدمين هالفرشاة ف وضع الكونسيلر ويفضل تحطين فوق لوس باودر
*مخفي العيوب :
الأخــضـــر : تستخدمينه عشان تخفين البقع والحبوب الحمراء (تحطينه مكان البقع او الحبوب فقط)
البنفسجي : يخفي المناطق الصفرا والي تعطي مظهر شاحب للويه
البني : بعد تستخدمينه للمناطق الصفرا
البني الغامج : يستخدم لتحديد تقاسيم الويه مثل اظهار منطقة الخد وتصغير الجبهة والفك
(( الفاونديشن )) أنسب طريقة لاختيار الأساس هي انج تختارين لون طبيعي على لون بشرتج واذا بغيتي تفتحين ويهج اختاري لون افتح بدرجة من درجتج لانج اذا اخترتي افتح بوايد بيستوي ويهج رمادي ويعطيه مظهر شاذ ..
وبالنسبة لنوع بشرتج الي بشرتها دهنية تاخذ Oil free وعن نفسي انا بشرتي مختلطة افضل اخذ الliquid
السائل liquid
وتستخدمين هالاسفنجة او شكل مقارب لها ويفضل الاسفنجة ما تكون رفيعة
ال stick foundation
وممكن يكون بهالشكل
يستخدم للتغطية coverage القوي باستخدام اسفنجة ناعمة او بفرشاة دمج ناعمة وتنهينه بوضع اللوس باودر .. تقدرين تستخدمين اصابعج اوالفرشاة ف الاماكن الصغيرة مثل زوايا الخشم .
ال pan cake او الاساس المائي 
يعطي لوك matt جدا وتغطية رووعة تستخدمينه باسفنجة رطبة بالماي
((البودرة الحرة والمظغوطة loose and compact powder))
طبعا البودرة الحرة لازم تكون مناسبة للون الفاونديشن
وفي منها الي يكون شفاف ويناسب جميع انواع البشرة
واللوس باودر ينحط بالفرشاة واذا بغيتيه يكون اقوى استخدمي الاسفنجه
البودرة المظغوطة بعد نفس الشي لازم يناسب لون الفاونديشن
وفي انواع يديدة تعطيج لون برونزي مثل هذا :
وهاي الفرشاة الي تستخدمينها بوضع اللوس باودر او الكومباكت
(( البلاشر blush ))
يفضل للاستخدام اليومي ومكياج النهار تستخدمين الالوان الهادية وماتستخدمين البلاشر الي يكون فيه غلتر .. يعني يكون مات
…. اتمنى يعيبكم الموضوع واستفدتوا ولو بجزء بسيط …. الموضوع من مجهودي وحقوق الطبع محفوظة لمنتدى سيدات الامارات
بس الغاليه عندي سؤال .. بالنسبه لمخفي العيوب من ميكب فور ايفر .. انا عندي لون برتقالي بعد ؟؟ حق شو هاللون؟؟
و يزاج الله خير
انا هوب بالزود ويأ المكياج ..
وايد استفدت من موضوعج ،
يزاج الله خير حبيبتي ..