اخواتي العزيزات
أقدم لكم من جديد ملف تعليم السواقه بالصور للمره الثالثه لأختفاء الصور
وسامحوني على التأخير بسبب الصور اللي حبيت اعدل عليها لحفظ الحقوق عند النقل لأني ماشاء الله لقيت الموضوع منتشر في باقي المنتديات بدون ذكر مصدر الموضوع
وكنت حابه اعدل الصور بصوره افضل ولكن بيتطلب مني مجهود كبير جدا وما حبيت اتأخر اكثر بعد الرسائل الكثيييييييييره اللي تصلني بطلب صور الموضوع
هذا الموضوع فتحته بعد ما شفت مواضيع الاخوات في البحث عن مدارس التعليم والمدربات
وايضا ليكون مرجع شامل لكل متدربه تريد الحصول على الليسن
انا تميت اقول لزوجي اريد مدربه ما اريد ريال وفي الاخير سمعت كلامه بعد ما جربت وضيعت وقت وفلوس المدربات الحريم ولا شي الريال يدرب عدل بتقولون هذي خبله
بس هذي نصيحه لكل وحده تتدرب ترا اللي بيسوي لج الفحص ريال ليش ما تخلين هذي الرهبه تروح من بدري ولا تحاتين ان اللي بيسوي الفحص ريال وانتي مدربه عدل تيين يوم التراي تخربطين والسبه الخوف والخجل
أولا نبدأ بالاوراق اللازمه والاجراءات الضروريه
1 ) الاوراق المطلوبه :
صورة جواز السفر
خلاصة القيد
صور شخصيه
حضور ولي امرج (يعني اذا كنتي معرسه شلي ريلج واذا لا ابوج)
صورة جواز سفر ولي الامر
مبلغ 100 درهم في المرور
و 20 عند فحص النظر في المرور
وفي المدرسه النظري 830درهم
قانون جديد بالنسبه للترايات في منطقة العين
لكي عدد 3 ترايات شارع ( مدينه ) فقط لو لا قدر الله رسبتي في التراي الثالث بيتم تحويل ملفك على مدرسة الامارات وتدفعين رسوم من اول ويديد وطبعا على كل غلطه تدفعين قيمه ما اعرف كم
ثانيا : الدروس
الدرس الاول : الريوس
طبعا الحين بتقولون شو نسوي
احب اطمنكم كلكم ان الباركنج والريوس جدا سهل
بس الاهم هو ان الرهبه من السياره تروح
وهذي ممكن نقضي عليها بالتدريب
كيف ؟
يعني سيارة الوالد او الزوج او الاخ او الاخت نطلع عليها كل يوم شوي في اماكن مافيها حد علشان نزيل الخوف وصدقوني بتكون السياره مثل اللعبه في ايدكم
وبعد ما تروح الرهبه نجي للجد
اختاري رصيف وحاولي تمشي بالسياره موازيه للرصيف مع الحفاظ على نفس المسافه
المهم
الحين جد الجد
قبل التراي بفتره روحي خذي حصه وحده ريويس ( ساعه وحده بس ) وسجلي الخطوات في دفتر علشان ما تنسين وبعدين خذي ثاني يوم حصه وحده باركنج ونفس الشي سجلي الخطوات في دفتر وياريت تسجلينها وانتي مع المدربه علشان لو نسيتي تراجعينها
هذي الخطوه وايد مفيده وبتوفر عليج جهد كبير وفلوس
وخصوصا انا نحن الحريم طلعاتنا محسوبه علينا
والله اني طفرت من الطلعه كل كم يوم تدريب
ومن الخوف الله يسامحه المدرب كان يطلعني ساعتين ساعتين
تخيلي تمين ساعتين تدربين باركنج بس وساعتين ريوس بس
وان شاء الله بالتوفيق للكل وتنجحن من اول مره وهذي الصور
وطبعا الشرح يكون على الاقماع الكبيره
هذي صوره توضح الريوس بشكل عام كيف بيكون
اذا في اي تعليق او ملاحظه انا حاضره او حتى تعديل وفي انتظار آرائكم واقتراحاتكم وتعليقاتكم
يتبع,,,,,,,,,,
هذه صوره توضح الباركنج
اذا في اي تعليق او ملاحظه انا حاضره او حتى تعديل وفي انتظار آرائكم واقتراحاتكم وتعليقاتكم
يتبع,,,,,,,,,,,,,,,
احفظي هذي الخطوات بالترتيب وبالارقام علشان ما تنسي
1 ) ركبتي السياره عدلي الكرسي بحيث تكون قدمك مرتاحه مع البترول والفرامل لا بيعيده ولا قريبه
2) شدي حزام الأمان
3) عدلي المرايات بحيث تستطيعين كشف الشارع
4) ضعي غيار الجير على ال D اذا بتنطلقي للأمام أو على ال R اذا بترجعين للخلف
5) نزلي فرامل اليد وسيري على بركة الله
وااااااااايد حلو
شاطره وممتازه اذا طبقتي الخطوات بالحرف
الحين يينا على التركيز في الشارع وكيف اتحكم في السياره
( يا ويلي لحقوني ما شايفه شي بالشارع غير الخطوط والطريق متر قدام السياره )
طبعا هذا اللي انتي شايفتنه الحين وهذا طبيعي جدا انتي خايفه ومش قادره تركزين في شي غير مسافه صغيره قدام السياره ولا تخافي عادي مع الوقت بتبدين تشوفين حواليج وتركزين
اول شي الستيرنج مال السياره خفيف وايد وما يحتاج لف قو بالعكس همسه يمين او همسه يسار بتتحرك السياره وياج مثل الشوكولاه
هههههههههههههه <<<<<<< تنكت الاخت
المهم
علشان توزنين السياره اعتبري نفسج تمشين في الشارع بريولج بدون سياره وخلي نفسج في منتصف المسار اللي تمشين فيه مثل الصوره هذي
حلو؟؟؟؟؟؟
الحين تمي ادربي على هذي النقطه بسيارة البيت ولازم يكون وياج حد زوجج او ابوج او اخوج
وخليج بعيد عن الزحمه الله يرضى عليج مو ناقصين مصايب بعدين تقولين ام الكباتن قالتلي
انا ما يخصني
طيب الحين وانتي ماشيه قابلج مطب وقابلج مرور مشاه واشارات
وكل هذيل لازم تخفين السرعه
طيب كيف نخفف السرعه
نخفف السرعه بداية اللوحه اللي تحذرنا بوجود مطب او اشاره بالضغط على الفرامل بالتدريج
طيب عند المطب لازم نخفف السرعه وايد بس مو لدرجة ان السياره توقف
بما معناه ان السياره يتم فيها سرعه خفيفه تخليها تعدي المطب بدون ما ندوس بترول
طيب الحين العجلات الاماميه عدت المطب الحين ندوس بترول ونبدى نتدرج في السرعه لين نوصل السرعه المحدده .
اذا في اي تعليق او ملاحظه انا حاضره او حتى تعديل وفي انتظار آرائكم واقتراحاتكم وتعليقاتكم
ويتبع باقي الشارع >>>>
بس بغيت أرقام أحسن المدربات في دبي
يزاج الله خير اختي 
