من بريد المشكلات الإجتماعية–{"الرسالة الأولى"}—- 2024.

عمري 20 سنه …

.. انا خسرت وايد وايد .. اول شي خسرته .. نفسي ..

وكل ما اتجدم خطوة … ارجع ملايين الخطوات ..

خواتي …

انا مريت بتجربة كسرتني .. حطمتني ..

حاولت اخبر بنت عمتي .. مافهمتني .. ابد مافهمتني .. ضغطت علي .. وجني انا اتعمد أأذي نفسي بنفسي .. معقوله في انسان بييب لنفسه المضره .. وقالتلي انسي .. والله مب بيدي ..

خواتي .. انا حبيت ..

حبيت فيه التزامه .. اخلاقه .. طموحاته .. صدقوني والله ماعندي سوالف الخرابيط وعمري ماتخيلت حتى مجرد خيال اني احب او اعيش قصة حب .. كل شي بدا من منتدى .. حبيته .. والله خواتي حبيته حبيته .. ادري عيب والله ادري انه غلط وستين غلط بس والله والله والله والله مب بيدي .. ادري انه حرام .. وحتى دايماً ادعي ان ربي يشله من قلبي ..ان ياخذ هالمشاعر مني .. اخاف كيف بجابل ربي .. اخاف من عذاب القبر ..اخاف يكون هالحب عذابي في دنيتي وآخرتي .. اخاف ياخواتي والله ذبحني الخوف ..

تطور كل شي بسرعه .. وبدون مقدمات انهدم كل شي ..

ادري بالنسبة لكم .. قصه مكرره .. ونفس المأساه ..

بس بالنسبة لي .. كانت قصة العمر ..

ندمانه في نفس الوقت .. ما اقدر انساه .. احبه ياخواتي والله احبه .. بس الظروف ضدي وضده ..

مرضت ياخواتي .. وذبحني المرض .. كل شي فيني يعورني .. احس روحي اللي هيه روحي تعورني ..

كل شي يصيحني … حتى ليلة العيد اللي هيه ليلة العيد .. قضيتها ف دموع ..

ساعات انهار .. والله انهار .. اسجد واتم ادعي وادعي .. وتخنقني دموعي .. يمكن ها عقاب من ربي لأني غلطت ..

والله اشتاق له .. محد يفهمني كثره .. محد يعرف لو كنت متضايجه غيره .. واللحين انا بروحي … مالي حد .. ابتعدت وانزويت .. ودايماً افكر .. ويدام الناس انا اسعد الخلق .. يتعبني التمثيل .. تتعبني الابتسامة وانا ودي اصيح وادفن راسي بصدر اي حد وانوح ..

بريء والله بريء .. مثل الأطفال .. مب ذيب نفسهم مب ذيب ..بس غيرته ظروفه .. وخذلني .. ذبحني .. بس مع هذا مب زعلانه منه .. والله مسامحتنه ..

بس خبروني خواتي كيف اكمل حياتي .. تبت والله تبت ..

ساعات اكتب مسج طويل عريض .. ويكون خاطري ارسله له .. بس اغير رايي .. وتخذلني اصابعي ..

وساعات بس خاطري ارسله … احبك ..

ادري ادري وايدين بيعصبون من موضوعي .. بس والله ماعرف اقول لمنوه ..

انخطبت مرتين ..وهاي الثالثه … ومجرد الخيال اني بكون مع غيره .. يذبحني ..

انا بنيت وايد احلام .. والله وايييييييييد احلام ..

اكتبتلكم وانا مااشوف من دموعي ..

فيني ضيجه مايدري بها غير رب العالمين .. فيني حزن عظيم مايدري فيه غير اللي خلقني ..

مابي شي من كتابتي لهالموضوع … بس اباكم تدعولي .. بأن ربي يعوضني ..

وهالموضوع عبره لكل انسانه .. حتى مشاعرج .. مشاعرج اللي هي مشاعرج لا تتمادين فيها .. وحطيلها حد .. بييج هو بدال ماانتي تتحكمين فيها .. هيه بتتحكم فيج ..