من خبرتكن شو الحل السليم ويا هالمدرسة ؟؟؟؟؟؟؟؟؟ 2024.

السلام عليكم اخواتي

ولدي غريد 1 بمدرسة خاصة للأسف مدرسته هالسنة انسانة تتكلم عن نفسها جدامي على انها تعرف تتعامل ويا اليهال و انه مول ما تلجأ للتعنيف و لا الصراخ عليهم و لا اهانة الاطفال و انها تؤمن انه هالشي ما يفيد و مرة بالصدفة شفتها دز اليهال على بعض بطريقة عنيفة منظر خلاني استغرب انه هالشي يستوي بمدرسة و على فكرة لمجرد العلم هي من الجنسية الهندية ,كلمتها بكل ادب قلت الها حرام جي تتصرفين ويا اليهال قالت لي كنت اباهم يردون يسوون صفوف قلت لها مب يوم وصلوا الفصل تخليهم لين يتجمعون و تدفعيهم على بعض هم دق الجرس ما حد بالساحة قالهم سووا صفوف و ما حد اصلا من المشرفات فخطأكن لا تعالجونه بخطأ و على حساب هالمساكين يمكن حتى بحديقة حيوانات يدخلونهم بنظام ما يدفعونهم بعنف و قلت الها الصراحة انا صدمني الي شفته و اتمنى ما يتكرر حسيتها ما تقبلت كلامي و من وقتها ما عدت احب اقف اسمعها يوم تيلس تتكلم على نفسها و صار عندي نفور منها , لو ما كانت عطتني المقدمة المثالية عن نفسها يمكن كنت باستمر اتصرف معاها عادي لكن بعد كل لي قالت لي انها تعرفه بتربية الاطفال و توجيههم و تدريسهم و ما شفته تطبقه حسيتها تضحك عالناس بكلامها المهم , بعدها بكم من يوم اذا ما كان ثاني يوم و الله اعلم ما اذكر بالضبط بالصدفة هي تتحسب ما حد اسمعها تصرخ عالاطفال علشان يدشون الفصل بصوت وايد عالي طلعت اشوف اليهال من خوفهم يركضون للفصل لين واحد منهم طاح عويههه و هالولد كان ولدي ,ما كلمتها و هي ويهها حسيته صار الوان من صدمتها اني سمعتها و شفت هالمنظر و لا كلمتها ساعدت ولدي يوقف و قلت له ما عليه ماما دش الفصل و روحت .

عقبها خلاص اوصل ولدي و يوم تحاول تطول وياي بالكلام يوم اسألها عن شي اتهرب منها باني مستعيلة او تخلص الاجابة عسؤالي اسوي عمري ما سمعت باجي كلامها و اروح عنها لاني فعلا اكره ما عندي حد يقسى عالاطفال و يمثل انه طيب جدام الناس و من وراهم شي ثاني

انا اشوفها و اسمعها تصرخ وااااااااااااااايد عاليهال و تعنفهم و وااااااايد قساوة شفتها منها تمارسها عاليهال و ولية امر التقيت معاها بالصدفة بالمدرسة سألتني ولدي عند منو قلت الها بس اسمها قالت هاي تعقد اليهال و تمت تدعي عليها خوفتني اكثر منها ,و تقول تنتقم من اليهال الي يشتكون لاهلهم منها

المهم انا مؤخرا سرت اخذ ولدي سمعتها تصرخ كالعادة بشكل غير مقبول نهائي و انا بعدني ما وصلت للفصل يوم وصلت اشوفها تصرخ على ولدي و هو يشاور لها عالورقة انه يبا يراويها ما خلته يكمل كلامه و كملت صراخها عليه و تامره يرد يقعد مكانه و ما شافتني لاني كنت واقفة عند الباب , ولدي شافني و يا عندي , بعد خذيته و لا كلمتها سويت عمري ما شفت شي و طبعا كتبت شكوى ضدها لقسم الابتداىي و مديرة الابتدائي و عدتني خير و قالت لي بعطيها انذار ها لكلام قبل العيد , اليوم خذيت ولدي عرفت انها بعد صرخت عليه علشان عطتهم شي يحلونه و يوم خلص قام لعندها يراويها بعد صرخت عليه عسب اتاكد اتصلت على ام طالب وياه علشان امه تسأله قالها وانا عالخط انها فعلا صرخت على ولدي وايد و فعلا لانه كان يبا يراويها انه حل الواجب بالصف .

طبعا ناوية اشتكي عليها بادارة المدرسة مب بس بادراة الابتدائي مع اني عرفت انه عندهم نقص بالمدرسات فيمكن ها الي مخلي هالمدرسة ماخذة راحتها .

التعنيف فيه الجسدي و فيه النفسي و هالمدرسة قاعدة تمارس عالاطفال تعنيف نفسي لدرجة انه ولدي صار يكره يسير المدرسة بصعوبة سرت اقنعه يسير و مب بس ولدي لاحظت على غيره نفس الشي صياح عند باب الفصل جأنهم كي جي 1
سؤالي هل هالنوع من التعنيف بالصريخ و التوبيخ و رفع الصوت المبالغ فيه ممكن نشتكي عليها بسبتهم لحقوق الطفل بالبلاد او الشرطة؟ و ممكن لتأكيد كلام الطالب يشهدون اليهال على هالشي هي تتحسب يهال غريد 1 خلاص ما بيتكلمون .

انا ولدي درس كي جي 1 و كي جي 2 بهالمدرسة و كل سنة اصلي استخارة قبل لاعيد تسجيله و كل سنة ابغي انقله منها و اخليه

اختي ليش ماتنقلينه في المدرسه

المدرسه يمكن ماتعرف تتعامل مع طلاب وماتعرفين يمكن باقي المدرسات مثلها

في وايد مدرسات من هالنوع

عشان يضبطن الفصل يصارخن!!!!!!! عشان العيال يسمعون الكلام بس ضرب وصريخ على طول عيب!!!!

انتي طلعي الولد من المدرسه وشكلي على الاداره وشوفي حريم مضايقات من هذي القصه وجميع اصوات وخبري الاداره عنها

يمكن تخاف وتغير طريقه يمكن يكلمونها وهي تحس تخاف على لقمة عيشها

بس اختي ليش مصره على نفس المدرسه

نقليه مدرسه ثانيه في مدارس كثيره شوفي اي مدرسه تعاملهم حلو

ولكن اغلب المدراس في مدرسات زينات وفي شينات!

أختي استغرب صبرج علىها ولدي كان صف سادس لما ضربته المعلمة على اذنه عنده اختبار والسبب يبا يسير الحمام وعادة مسكين لما يتوتر ويخاف يسير الحمام وكان خيول وشاطر ومهذب يشهدله المشرفين بهالشي ..ثاني يوم مارحت شغلي رحت المدرسة وتكلمت مع المشرف وطلبت اشوف المدرسة يلي تعاني من ضغوط في بيتها وخلافات مع زوجها وتفش خلقها بالطلاب والمضحك كان زوجها يوقف ويسمع الكلام لنه بيشتغل مشرف ههههه بس سوا عمره مب سامع وبعدها رحت المدير وقلت له انا اخدت ابني للطبيب بسبب الضربة ووالدي محامي أنوي أرفع قضية عليها وتتشنطط بالمحاكم وكانت المفاجاة لما رديت البيت والتلفون يرن المعلمة نفسها وايد خايفة وتعتذر ونكرت انها ضربت ابني وهي مب كذابة فرحت ثاني يوم فجأة واسأذنت المدير ودخلت الفصل فجأة وقلتلها انتي ضربتيه وهي تقول لا وكنت أسأل الطلاب هي ضربته ولا لا والكل قال نعم قلتلها خلاص أنا ماشية ومن وقتها صارت تتعامل معاه بحذر شديد..
سؤال هو الأمهات لازم يسيروا المدرسة حى يأدبون المدرسين ليش المدرس مايحتروم عمره ويحس بالطالب أمانة والطالب مب ياي من الشارع له أهل وبيسألوا عنه ..رأي لما شفتي ابنج وقع – والله عورتيلي قلبي-كان لازم تكلميها ولما تصيح عليه تعلميها الأدب ..الأهل يدفعون دم قلبهم على يهالهم وبعد يحترق قلبهم لما يشوفوفهم جذيه

اشكرج اختي عاهتمامج و ردج

فعلا هي مب عارفة تتعامل ويا التلاميذ و انا قررت انه ولدي هاي اخر سنة له بهالمدرسة ان شاء الله

من الكي جي 1 ابغي اغير المدرسة .وما استوى بس هالمرة خلاص مستحيل اخليه بهالمدرسة إن شاء الله اوديه مدرسة ثانية هو نفسه هالايام يترجاني اغيرها يقولي ماما وديني اي مدرسة ثانية ما فيها ميس ….و يذكر اسم المدرسة الهندية الي درسه .

مشكورة عزيزتي عردج بتواصل وياج عالخاص .

الصراحه الله يعين يوم مدرسه مسئوله عن يهال وبهالهمجيه تتعامل وياهم طبعا السنه خلاص ما ترومين تنقلينه بس اشتكى لادارة المدرسة وخبريهم ينقلون الولد من صفها ويتخذون ضد هالتافهه اجراء وهدديهم ان ما اصطلبوا وصاروا اوادم مع اليهال بتشتكيهم بالمنطقه التعليميه شو احنا نودى عيالنا يتعلمون ولا يتعقدون لين يصير خير للسنه اليايه وعقب انقليه وان شاء الله خير والله تعبنا من هالمدارس يا مشاكل بالباص يا باسلوب المدرسات يا اداره تعبانه الله يعين