شحالكم ؟ شخباركم؟ ان شاءالله بخير ومرتاحين
ابا اقولكم عن مشكلتي وان شاء الله تساعدوني
انا عرست ع بداية سنه 2024 يعني صارلي تقريبا 11 شهر وقبل العرس باسبوعين ع الساعه وحده تقريبا دخلت الحمام( الله يعزكم ) وما قلت الدعاء ف يوم كنت ابا اغسل ويهي يتني حالة ماشوف غير شي ابيض وبدا يخف كنه ضباب و ف نفس الوقت حسيت اني بموووت انه الحينه خلاص بموووت وبقابل ربي وانا اقول ف خاطري الحين بتحاسب ومن حسيت ب هالشي ع طول بديت استغفر و توضيت ورحت اقرى قران وعقب يوم سكرت القران نفس الشي ماشوف غير البياض و اني الحين بموووت وبعدين مارمت اقبض رووحي رحت اصلي وتميت اصيييييح المهم وخبرت اختي وقالتلي انتي المفروض تقرين ع عمرج ف هالوقت ولا تهتمين لو بتموتين كان متي ذيك الساعه بس هذي اكيد عين وخبرت ربيعتي وقالتلي نفس الكلام ومرت الايام وعرست وللحين وانا احس ب هالاحساس ورحت عند مطوعين قالولي هذي عين خفيفة وبتروح باذن الله بس المطوع الثاني طولت وياااه وحسيت بتحسن والحين رجعلي هالاحساس اني بمووووت و انه الحين بييني ملك الموت وبيقبض رووحي والله اخااااااااااااف واحيانا يوم ابا ارقد اتييني ضييييييييييييييييييقة فضيعه .. انا من قبل ملتزمة ف قراءة القران الكريم والحين اقرى ع عمري بس للحين تعباانه .. والله تعبت ابا اعيش نفس قبل الحينه صايره وااايد نكدية ومتكدرة ومتضااااااااااااااايقة وكله مبرطمة حتى ريلي يقولي فرفشي لا اتمين جيه قاعده مبرطمة .. والله تعبت
ادعووولي بنات انه الله ييسرلي اموري ويعافيني ويشافيني واذا فيه وحده تعرف مطوع تقولي عنه الله يجزاها خير..
و الله مآدري شقولج
بس الاذكار ابد لآتهملينها
و الله كل المصايب اللي ع روؤسنآ لآننا مانذكر الله
انتبهي انتبهي
يوم تبدلين ثيابج او تدخلين الحمام – الله يكرمكم
او اي شي ..
لازم تقرئين ع عمرج
بالتوفيق حبوبه
و الله يشافيج
والله ما اعرف بس لو تشوفين دكتور نفسي
يمكن يساعدج تتخطين هذا الخوف وتتخلصى منه
ويبعد عنج كل شر وعين وحسد الحاسدين
بس سؤال اتحسين بتزايد ف ضربات القلب ..؟؟