قبل ما أخبركم شو موضوعي وسالفتي لازم تعرفون إني حامل في الشهر الثاني وتعرفون الوحدة الحامل كيف نفسيتها تكون تعبانة إضافة إلى قلة النوم،،
أنا عن نفسي نومي وايد قليل وأعاني لين ما أرقد وطول الليل مقطع رقادي،،
مشكلتي السابقة والحالية مع الرقاد إن زوجي يشخر وايد في الليل،، وأنا أصلا طبيعتي أوتعي على أقل الأصوات،، فما بالكم بصوت شخير في أذني طول الليل،، وأنا أصلا ما أرقد عدل،، يعني من حملت للحين زيادة زاد الموضوع عندي لأني ما أرقد صدق،، وأنا أداوم يعني المعاناة دبل،، قلت لريلي سير الدكتور مب طايع،، (ترا هو عادي راقد طول الليل) أنا اللي أعاني،،
تخيلوا الحامل اصلا محتاجة لفترات نوم ما تقل عن 8 ساعات يوميا وأنا ما أبالغ لو أقول لكم لو اني اجمع ساعات رقادي ما تطلع 3 ساعات،، تخيلوا وايد أعاني لأني مول ما أرتاح،،
شو أسوي وهل في حل للشخير يا جماعة؟؟
شووو حادج على النوم معاه ؟؟
انا اذا ازعجنى اشل فراشي واروح ارقد بغرفه ثانيه اهم شئ صحتى وراحتى
خبريه ريلج وقولى له انا بسير ارقد بغرفه الثانيه تبي شئ من الواجبات الزوجيه مابقصر بس بالنوم اسمح لى ل شئ ولا يصير فينى انا والبيبي
الله يساعدج
بس ما أعتقد إنه هذا هو الحال،،
يعني إذا تم طول عمره جي،، أنا طول عمري لازم أرقد في غرفة ثانية،، وأصلا هالأمر يبعد الأزواج،، نحن جي ويالله يالله نحاول نتقرب لبعض،، تخيلي أقوله له بسير أرقد مكان ثاني،، ما يهون على الصراحة،، رغم انه هو كم مرة سار يرقد مكان ثاني عشان ما يحشرني بس أنا ما رمت أخليه ما هان علي،،
أنا أبا حل للشخير نفسه :1 (7):
الله يخليكم لبعض شكلكم تو متزوجين
لانكم ماشبعتو من بعض
انا الحين انام بغرفه ثانيه مب علشان الشخير علشان البنت الصغيره تزعجه وهو عنده دوام
اجلس عنده والبي كل طلباته واذا نااااااام اقوم اسير عنه وارقد بغرفه الثانيه والحمدلله لا هو يستغنى عنى ولا انا بالعكس علاقتنا قويه والحمدلله واذا جاء من الدوام وقت الظهر وتغدى وبيسير يرقد ارقده بعدين اظهر من الغرفه علشان يرتاح وينام بهدوء
وصدقينى مايتغير شئ
وانتى على راحتج
مو يعني تدفيه لين يطيح
لا حركيه بشوي و اذا انتبه قوليله نام على جنبك علشان انا انام وراك
و بتلاحظين الشخير يخف وايد
لانه عادة اللي يشخرون عندهم اللحميه و بس ينامون على ظهرهم يختنقون
و الله يعينكم
بس هو ليش رافض يروح العياده !!!
اول شي عوضي نومة الليل بالنهار وبالليل خذي شور بارد واشربيلج كوب حليب بالينسون والا الشمر وحاولي ترقدي
واذا على شخير ريلج كل ما تسمعينه يشوخر نبهيه وقوليله يا عمري نام على جنبك احسلك وانتي في الحالتين تريحين عمرج من السمفونية وفي نفس الوقت تجنبينه شر الاختناق لا سمح الله
ويوم عن الثاني اقلها لمسة منج بيعدل من نومته وبترتاحين وبيرتاح
بس سالفه ترقدين في غرفه ثانية مع احترامي للاخت نسيم الروح لكن اذا انتي ريلج ما شاء الله عليه متفهم هب كل الرياييل مثله
واللي ينفع وياج وريلج آلاف مستحيل يقبلون في هالوضع