السلام عليكم ورحمة الله وبركاته
بخبركن اليوم عن سالفة صارتلي من اسبوع تقريبا كنت بعرضه في المنتدى ع طول بس خواتي قالولي لاء بسبب كذا وكذا المهم
السالفة وما فيها
اني انا مب مني اللي اقوم ع صلاة الفير يوم اسمع الاذان او ما اسمعه يعني ما أنش
اوقات السهر اكيد ببصلي لأني سهرانة بس اذا كنت راقدة ما بنش ( استغفر الله العظيم )
وكنت اداوم ع الساعة 7
اتفقت انا وخواتي انه نرقد كلنا يميع في غرفة وحدة بعد ما نخلص من سوالفنا اللي ما تخلص ^^
ورقدنا
الا وحدة من خواتي متعودة تسهر ع اللاب والمسن والمنتديات …..الخ
وصوت الكيبورد يزعجنا المهم صار الساعة 5 والغرفة ظلام مب مبين غير ليت شاشة لابها
فقتلها خيتو ….. الساعة كم ؟؟؟؟ قالتلي 5 …… وعرفت انه مأذن بس كنت نعسانة واااااااااااااايد ورديت برقد وقلت بقظي الصبح عقب
والله العظيم يا خواتي اني حطيت راسي ع المخدة الا اسمع صوت حد يدق دقتين (( مثل يوم حد يبا يستأذن يدش غرفتج يدق مرتين )) كان نفس الصوت بس اقوى يعني يدخل في اذوني بشكل مب طبيعي جان افتح عيوني وقلت اكيد اني اتخيل ورديت سكرت عيني ونفس الصوت يتكرر اكثر من مرة تروعت واااااااااايد والله حسسيت كأنه ملك الموت يقولي فلانة قومي صلي انا الحين باخذ روحج
تروووووووعت وايد جان افتح عيوني واقول لخيتو…. أذن تقولي شو تقولين؟؟؟؟؟
وانا متروعة اقوللها اذن تقول: علي صوتج اوف شو يالسة تقولين قتلها أذن ولا ؟؟؟؟ قالتلي هي اذن
وابا اقوللها تعالي ويا الحمام( كرمتوا) بس استحيت يعني مبين نور السما اقوللها تعالي وياي
جان انش ابا اسير الحمام وتوضيت فقط لا فرشت ولا ولا شي
وظهرت من الحمام وخذت شيلة الصلاة ولبستها
وكنت في هاللحظة اطالع شاشة التلفزيون (مسكر) الشاشة عوودة شوي
والا اشوف حد يمشي وراي وتروعت موت ويوم لفيت شفت خيتو اصغر وحدة فينا ناشة ^^ جان اقول الله ياخذج روعتيني استغفر الله انا بصلي وجي اقول ^^
وماشي صليت وصليت السنة
ورديت برقد
وحطيت راسي ع المخدة وتلحفت بالكامل وبعد تهدئة اعصاب سكرت عيوني
الا اشوف واحد لابس كندورة بيضة وقصيرة شوي ولحيته سودة طويلة شوي وسفرته حمرة وبدون عقال والغريب انه ويها كان طالع منه نور ع شكل دائرة يعني ما شفت ملامح الويه ابدا ويأشرلي بدينه الثنتين (( تعالي )) ويحرك اصابع ايده مرتين
وفتحت عيوني وقلت بسم الله
ورديت ارقد الا نفس الريال ونفس الحركة وصار مرتين يعني الحلم تكررلي 3 مرات
وعقب رديت انام ثاني مرة لانه وراي دوام وابا انام
شفت الريال يحرك راسة يمين ويسار وزعلاااااااان من دون ما اشوف ويها بس ماعرف في الحلم عرفت انه زعلان وراح عني وصار هالحلم مرتين وكان يتجه في صوب اليسار وروح عني وهو زعلان ليش ما روحت عنده وما رقدت ابدا سرت الدوام وخبرت البنات عن اللي صار ^^
يمكن البعض ما يصدق او يقول شي بس الله العالم والشاهد اني كل حرف كتبته صح
واتمنى منكم اي وحدة تعرف مفسرة تفسرلي حلمي اطرشلي اياه ع الخاص وليس ع العام
مترووووووووعة وايد
والسموحة جان طولت عليكن
ختكن في الله لزق شفاف
سبحان الله العظيم وبحمده
والله ما اعرف في تفسير الاحلام
بس اتوقع هالحلم تنبيه لج لصلاة الفير
اانا مره كنت راقده واذن الفجر سمعته وقلت بنش بعدين وبصلي والله يا بنات فجاه نقزت لاني حسيت انه ايدي لسعتها النار ومب اي نار والله اني خفت
لاحول ولاقوة الا بالله العلي العظيم
استغفرك اللهم واتوب اليك
انا مرات وقت اذان الفجر اسمع كأنه حد يرمسني او اسمع رمسه تخوف شي لا سمح الله مب زين و اقوم خايفة من النوم كأنه حد ينبهني اقوم للصلاة