نداء لكل امهات اللي عيالهم انتهوا مرحلة الروضة تعالوا لنستفيد منكم 2024.

السلام عليكم ورحمة الله وبركاته

مرحلة الروضة اكيد مرحلة صعبة بالنسبة للطفل كيف عودتوا عيالكم انهم يتاقلمون مع المدرسة

اول يوم من المدرسة هل كنت مع طفلك في المدرسة وكم من ساعة كنت مع طفلك في المدرسة

يلا يا امهات خبرونا كيف كان اول يوم لابنك في الروضة وكيف عودتيهم على المدرسة عطونا من نصائحكم

شو الادوات اللازمة للمرحلة الروضة من ادوات المدرسية

وكيف طريقة نظام نومهم ايام المدرسة

اتمنى من كل وحدة اتشارك

ووووووووينكم

هلا حبيبتي لازم اتكونين محمستنه للروضع عشان ينام بدري وخليي ملابس الروضة جدامه وقوليله هناك اطفال وايد والعاب وايد والمعلمة تعطي هدايا للشاطرين وانا اريد اسمع المعلمة لما اتقول انك شاطر وؤدب وتحب الروضة واشيا وايد
وبخصوص الاغراض قالولنا السنه انه رياض الاطفال محد اييب اكل من المدرسة يعني ندفعلهم فلوس

السلام عليكم ورحمة الله وبركاته …….. لازم يكون متحمس للروضة مثلا مشتري له شنطه لو تخلينه يختارها بروحى احسن والوان ودفتر وقلم وبراية ومحاية وكلهم طقم نفس الشخصية الي يحبها لا تكثرين يوم تشترين علشان بيطلبون اشياء ثانية هذي الاشياء تشجيعية للطفل بس ………… اول يوم روحي معه احسن هو اكيد بيصيح يوم بيجوف الاطفال كلهم يصيحون بس انتي شجعيه وقولي له انت شاطر والمس بتعطي الشطار هديه ………… وحاولي لا تمين عنده طول الوقت يعني طلعي من الصف بين فترة وفترة والله يعينج اول الايام لين يتعود واذا كان ولدج اجتماعي ويحب العب ولمت اليهال بيتاقلم بسرعة مثل ولدي ما شاء الله عليه من اول يوم عادي استانس ……. وبالنسبة لنومه يكون من وقت يعني يتعشا ويسبح وينام الساعة 8 بعدين بيتعود على وقت النوم ………….. والسموحة طولت عليج

مرحبا السااااااااااااع

شوفي الغلا بالنسبه للرقاد من عقب صلاة المغرب خلاص يكون مغسل ولابس وعلى الفراش على طول

بالنسبه لي على الساعه 9 يكون البيت هدووء ايام الدراسه ولااسمع صووت..ههههههه امر عسكري..

والادوات الازمه الغاليه شنطه صغيرونه حليوه ههههههههه وبوكس الاكل ودبة الماي..ودفتر والوان وقلم رصاص ومساحه وخلافه…ودبة الماي لاتنسينها اهم شي ..

وطبعا بيكون بالنسبه للبس لبس الروضه مع الشبرات اسود وابيض..ولبس الرياضه حسب كل مدرسه..

بالنسبه كيف عودت بنتي انا ماساه كانت عندي بنتي من النوع اللي وياي اربع وعشرين ساعه ماتفارج

يعني داومت وياها شهر وعقب دش رمضان وحلفت ماتسير هالشهر ..وخواتها امتحانات وجيه..

وبعد العيد انا وديتها بنفسي وداومت وياها يوميا لمدة اسبوع وتميت اشرد عنها واخليها اترد في الباص

والحين والله العظيم انها اتزن على راسي تتبا المدرسه..

بس احلى مرحله الروضه اول مره اتحسين بشي يديد ..

وربي يوفقج ويوفقنا في العام الدراسي اليديد..ادعولي بنات بنتي صف رابع وامتحانات..والله قلبي يعورني عليها..

مشكورة ام الغيث نصائح حلوة
و ام محمد معلومات رااائعة
لحظات مشكورة على المسااااعدة بالتوفيق الغالية وان شاء الله بنتج اتكون من الاوائل لا اتخافين اهم شيء المذاكرة من اول يوم اتذكر ايام المدرسة المدرسات دايما ينصحونا بالمذاكرة اول باول

استفدت كثير منكم الف شكر للجميع

هلا حبيبتي
طبعا الروضة هي بداية الانفصال عن الام وهي اول الايام صعبة شوية
ويبالها صبر وطولة بال وسعة صدر وشوية سياسة ومساحل وشدة في نفس الوقت
هي مثل الفطام مدتها على حسب الطفل من اسبوع الى اسبوعين من المعاناة والبكاء كل صبح
قبل الدوام بفترة لازم يكون الطفل مهيئ ومستعد للذهاب للروضة ولازم الام تكون محببة الطفل
ومشجعتنه على الذهاب للروضة
اول يوم بتقعدين معاه في الروضة نص الدوام ولما تهدينه في الروضة بيصيح طبعا انتي كوني كول
قلبج بيعورج من تسمعينة يصيح بس عادي هذا شي طبيعي لما يرد للبيت
ها شو سويت في الروضة ؟
شو المعلمة حبوبة ولا؟
*هي تقول عنك حبوب وشطور وبطل*
يعني من هالكلام الحلو والتشجيع المستمر وكل يوم على هالحال وبعدها بيتعود على الذاهب للروضة وبتكون في ايام يتملل من نشة الصبح ولكن مع الاصرار والتشجيع لدكتور المستقبل بيتعود
الله يوفقج حبيبتي ويبلغج فية وتفتخرين به في المستقبل ان شاءالله.