اليوم كان يوم غير عن كل يوم … مصدومة من بعض الابناء والبنات
بتقولولي شو السالفة بالضبط
انا والبنات كنا يالسات في مكتب واحد نشتغل .. احنا شغلتنا ان انساعد الاهالي والطلاب والطالبات في طلباتهم في التسجيل ومن هالاشياء
المهم
يالنا واحد شيبه .. من شفته قلت منو هالولد او البنت اللي امطرشه الوالد في نفس هالاشياء .. كسر خاطري قال ابا اسجل ولدي عندكم قلناله وقفنا ناخذ الاوراق بس ماحطينا نقطة في هالوقت ساعدناه انا والبنات قلنا حرام ياه وتعب وحالة بنوديه عند المسؤولة وبنشوف شو بتقول .. قبل ما اوديه قال بيروح الحمام عزكم الله وبيرد وخله اوراق ولده .. ماكانت كامله وماقدرنا انقوله ان ولده مابيقدر يدرس عندنا الا على شهر 2 وبغينا انقوله بطريقة حلوه وماتضايقه .. يوم يا قلتله اتفضل يالوالد بوديك عند المسؤولة .. كنا بنقوله اركب السيارة وروح عند البوابة الفلانية وروح عند الفلانية بس مهان قلبنا ونقوله
فقلناله الطريج طويل عليك يالوالد قال ماعليه بروح اهم شي اني اكلم المسؤولة .. المهم وديته وكان صعب علي اني افهمه الان السانه ثقيل شوي وتميت اقوله ان شاء الله ينقبل عندنا ومايصير الا كل الخير ان شاء الله قال اسمحيلي تعبتج وياي قلتله عادي مسموح يالوالد وان شاء الله المسؤوله بتوافق تاخذه .. وصلنا هناك والمسؤوله استلمته وخذت الاوراق وقالتله في اوراق ناقصه عندك وقالتله شو هي وكتبتله في الورقه وهو مسكين ركبته بروحه تعوره قالنله لو تقدر تخلي حد اييبهم احسن بدال ما انت اتيي قال لا عادي انا بييبهم اليوم قبل 3 وكان هالوقت الساعة 1 تقريبا
المهم مسكين راح ورد عالساعة 2 ونص .. قلتله يالوالد باقي نص ساعة قال لا بيروحون وماعرف شو وبدى يمشي بسرعة وكنت بوصله نص الطريج وبرد بس حمدت ربي اني ماخليته الان اذا خليته كا بيضيع
المهم وصلنا وكمل الاوراق والموطفة عبت البيانات كلها بداله .. يوم ردينا تم يسالني عن جبيلتي وكل شي .. طلع يقربلي من صوب الوالدة وقالي وين ساكنين وكل شي يوم خلاص بيروح قال لا تنسين تسلمين على الوالد ويدج وعم الوالد قلتله ان شاء الله … طول اليوم افكر فيه عقب صلاة العشا سالت امي عنه قالت يصيرلها عمها بس من الام وماتعرفهم واايد الان ابو امي كانوا في بلاد وهم في الامارات ومب سامعين عنهم وايد
كسر خاطري لو اعرفهم كنت بقولهم حرام عليكم اطرشون الابو وارحموا باللي سويتوا فيه
بنات ليش ما انتوا تخلصون اشغالكم بدل ما اطرشون اهاليكم مب حرام عليكم .. هم اشدراهم بهالاشياء وين بر الوالدين عندكم
لو انا سويت هالحركة بيقولي يلسي في البيت ولا تدرسين
بروحه الوالد تعبان ويكسر الخاطر وحرام اللي يصيرله
بنات وحريم المنتدى شو رايكم بالموضوع .. ادري انه طويل بس حبيت اخبركم السالفة كاملة عسب تتضح الصورة عندكم
لو كنتوا بدالي كنتوا بتسوون احسن من جيه ؟؟
اترياكم
اتمنى اني حطيت الموضوع في مكان الصح
والسموحة مكم
فأنا أقول لاتحطين فذمتج ماتدرين خبايا الأمور ..،
أنا عن نفسي أمي من النوع إلي يوم ماكنا صغار و هي معودتنا نسوي الأشيا بروحنا
هالشي وااايد خلانا نعتمد ع عمارنا الحمدلله ..،
شواب وعيايز يكسروا الخاطر بس ليش ما يخلوا عيالهم يعتمدون ع نفسهم لكن الله المستعان لو أنا باكل عيالي أكل بخليهم يعتمدون ع نفسهم
او يمكن متعود على ابوه هذا الشي يصير
انا مثلا يوم صار عندي مشكله مع جهة العمل وبصراحة حبيت اطلع من عندهم وكنت متضايقة خليت امي هي تروح وتخلصلي اموري صح هي حرمه عوده وجي
بس قلت هي اسهل لاني مب قادره اواجه بالموضوع وايد وتعبت من الشغل عندهم يمكن هي تمشي الامور ولكن المشكله صارت مشكله بينها وبين الادارة وصار الكلام ان امك قالت وقالت فينا وانا مادري شو قالت لهم وزعلوا وهي حرمة عوده وصرخ واحد من الادارين فيها
بس مشت اموري وجي والحمد لله لاني وقتها فعلا اريد اطلع من الشغل من عندهم باي طريقة لان شغلهم كان ورطه بالنسبة لي
بس من بعدها قلت بعتمد على عمري ومادخل امي الا بالاشياء العوده الي مااقدر ادخل فيها وجي وتحتاج كلام كبار بس
بس هو فعلا المشكله في التربية لاني وانا صغيرة كنت معتمده عليها في كل شي ومااعتمد على نفسي وانجبرت على الشغل الي كنت فيه بصراحه وماكان لي راي فيه وانا اتعودت كل مشكله ادخل فيها ادخلها معاي عشان تنحل المشكله وجي تخيلوا كنت محتاجة عقد عمل ماسوا لي صاحب العمل واحد بس خبرت امي وهي سوت العقد (تخيلوا الماساة) هذا لاني بدون وماحب المدير صاحب المقام الرفيع يدخل نفسه بالموضوع
الانسان يحب الراحة وهم ماعودا اولادهم
صحيح احيان يتملكنا الفضول والتساؤل عن هذي التصرفات بس تجنبا لوضع الشخص الثاني
بموقف محرج فالاحسن انه نحاول قدر المستطاع ان نساعده
وبارك الله فيج والي شرواج 