كيفكم صبايا وبنات..
أكيد إشتقتن لي ولدروسي….
الله يحفظكن لي يا رب….
المهم يبت لكم اليوم درس كنتم تتريونه أحر من الجمر….
عشان تتعلمن كيف تسون العود المعطر في وايد أساسيات لازم تعرفنه قبل…
أي نوع من العود المعطر …ينقسم لعدة أقسام…
* عربي
*فرنسي
* عربي *فرنسي
* بالعنبر
* بالمسك
* رجالي
* نسائي
…. بشرح لكم واحد أو إثنين … وبكون كريمة وياكم وبشرح بعد واحد زيادة عيديتكم هالعيد (^_____^)
بالنسبة للعود المعطر العربي…
بالنسبة لي لازم يكون هناك العود الخشب ولازم بعد المواد العطرية الزيتية الدهنية
أعطيكم مثال…
في الزيوت العطرية لازم يكون فيه …
عرق الحنا
عرق العنبر
عرق الزعفران
عطر البخور
موتيا
صندل
هذيلا الاسايات… مب لازم يكونن بنفس المقياس والمعايير… بعطيكم مثال حي…لواحد من العود المعطر يلي أسويه…
المقادير:-
1 كيلو عود كمبودي رقم 3 أنا أخذه من الرصاصي الكيلو ب 950 درهم
20 تولة فل
20 تولة عرق الحنا
هذا نوع عربي ينفع للمجالس
طريقته:-
أحط العود في غرشة زجاج يلي تتسكر بحديد شرات مال المخلل وبعدها أصب العطر الدهني كله مع بعض فوق العود وأسكر الغرشة زين… وأخليها تتخمر داخل الغرشة لمدة 7 أيام بشرط إنه كل يوم أرج العلبة عشان يتخلل العطر العود يلي ما تعطر وتبلل بالعطر زين وبعدها أفتح الغرشة أستعملها..
بتقولن ليش 40 تولة مب أقل….؟؟
برد أجاوب لأن هالكمية تعتبر كافية عشان العود يتشرب العطر وبالتالي يعطيج نتيجة إيجابية
لو لاحظتن شوي …إني كتبت في الاساسيات عرق الحنا
عرق العنبر
عرق الزعفران
عطر البخور
موتيا
صندل
ترومن تختارن كل العطور الموجودة وتحطن النسبة يلي تبنها من التولات بشرط توصل لل 40 تولة
وبتشوفن النتيجة بنفسكن ..بس هاااااااااااااا لا تنسن أهم نقطة وهي لا تاخذ النوعية الرخيصة خذن النوعية الزينة لأنها الافضل…
أنا أخذ أغراضي من أجمل والرصاصي للعلم …
نيي للعود المعطر الفرنسي…
نفس الشيء
اختاري نوعين من العطور الفرنسية القوية و نوعين باردات ومعاهن دهن عود كمبودي بشرط يكون دهن العود الكمبودي أقل شيء يعني بحدود 3-5 تولات
إذا تبينه بالمسك..بعد ما يتخمر العود المعطر جهزي المسك البودرة ومكسي بالقفاز إلين يتماسك ب حبة العود وخليها لمدة 3-4 أيام بعدين رديها للغرشة…
وهذي هديتي الثانية لكم … عود معطر عربي بالعنبر ……
المادة الخام السعة أو الحجم أو الوزن
عود كمبودي خشب رقم 3 ..كيلو
عرق العنبر 5 تولة
موتيا5 تولة
عرق الحنا5 تولة
مسك أبيض سائل5 تولة
عرق الزعفران5 تولة
فيجي البحرين5 تولة
عرق الصندل5 تولة
فل5 تولة
عنبر يابس5 تولة ( تيي شرات القرص أو بغير شكل)
الطريقة:-
نحط العنبر بغرشة زجاج ونصب العطور الدهنية فوقها ونغطي الغرشة ونحطها خارج الغرفة على أشعة الشمس دام نحن بالصيف ..ليش عشان تذوب حبة العنبر وتبرز ريحة العنبر وتختلط بالعطور الدهنية عادي لو نخليها كل النهار أو كم من يوم بس عشان تذوب حبة العنبر وإذا ما ذابت فتتيها بالملعقة… وبعدها نصبها فوق العود
المشكلة ما عندي صورة عشان أشرح لكم …أعتقد كلامي بيعطيكم تخيل واسع ب يلي كتبته…
والسموحة منكم على القصور وأي أستفسار أنا حاضرة بس مب إلحين بعد العيد بجاوبكم
وكل عام وأنتم بخير وعيدكم مبأأأأأأأأأأأأأأأأأأأأأأأأأأأأأرك
ماتصدقين قد أيش أنتظر دروسك متابعتك وبقوه وبعد
الله يكثر من أمثالك
سلمت أناملك
نتريااااا دوروس يديده الغلا
جزااااااااااااااااااااااااااااك الله خير
والله يعطيك اللي تتمنيه يارب
كريييييمه والله
والله يزيدك من كرمه استفدت كثير من مواضيعك مع اني اخبط من عندي على اللي عرفته بس من خبراتك
ومواضيعك استفدت كثير منك وعندي اسئله ويارب ما اكون اثقلت عليك
عشان الدخون مايتعفن كيف نتجنب العفونه في الدخون
ومتى احسن وقت اللي تصنعين فيه الدخون النهار ولا المساء
والعطور في اي نوع من الدخون هل تتخمر مع بعض ولا نسكبها على طول في الدخون
وايش اللي يثبت الدخون ويخليه يثبت ريحته لفتره طويله
واذا سويتي الدخون يكون على مكان مغلق ولا مفتوح ومتهوي
سامحيني اثقلتك باسئلتي وان شاء الله استفيد ويستفيدون الاخوات لانها مهمه
المشاركة الأصلية كتبت بواسطة للورود عطور 
ماتصدقين قد أيش أنتظر دروسك متابعتك وبقوه وبعد
الله يكثر من أمثالك
سلمت أناملك
سلام عليكم …عيدج مبارك
الله يخليج على هالدعوة الحلوة
وخلصن دروسي الغلا هذا أخر درس أعطيه لكم…
وأتريا نشاطاتكم وشغلكم وتخبيصاتكم
للرفع