ولدي والتشنج وتصرفي الخاطئ 2024.

السلام عليكم ورحمة الله
كيف حالكن خواتي؟
بقولكم عن تجربة صارتلي لما مرض علي ولدي حبيبي حمد بالزكام والحمى من تقريبا سنة وكان عمره 8 شهور وهو اول بيبي لي
والله ما كتبت ها الشي الا عشان ينتبهن الامهات اليدد مثلي ارتعبت عليه وخفت وايد
كنت ملبسة حمد ملابس دبل لانه كان برد شتا يعني لابس لبستين ( بجامتين) وكانت فيه حرارة مرتفعة
ومشغلة الدفاية على آخر شيء الحبيبة
وعاطتنه بروفين وكان طول الليل يصرخ وكنت انتظر مرور الست ساعات عشان اعطية الدوا مرة ثانية
وحاطة الولد في حظني وايدي على راسة انتظر حرارته تخف
وابوه مفخر رقاد
وفجأة تم الولد يرتجف ويطلع صوت كان حد خانقنه وعيونه استوت بيضا
كان يرتجف وااااااايد وبدا يزبد
يطلع من فمه زبد ما اعرف شو اقول احس اني بصيح وازرق فمه
وبسرعة قلت لريلي وع عمتي بسرعة عشان اتشوف الولد
والله يا بنات حسيت ان روحه تطلع
وبعدين خف التشنج وسكت الولد ولا يتحرك كانه نايم
لبست عباتي بسرعة وعلى مستشفى توام وفي الطريج انتبه حمد وبدا يصيح
ولسانه كان ثقيل من التشنج
تمت الحرارة 3 ايام ترقد حمد في توام وطلع الحمدلله بخير
الخطأ الي سويته:
كانت حرارته مرتفعة وانا ثقلت عليه باللبس وهو لازم اخفف اللبس وقت الحمى واحط عليه كمادات ماي
يعني ما ايلس اتريا ليما تخف الحرارة
وكنت انتظر الست ساعات تمر وهو خطأ لازم اذا كانت حرارته عالية اعطية بعد 3 او 4 ساعات
الحمدلله ان هذا الشي علمني واااايد
كيف اتصرف مع التشنج الحراري؟
اذا صار لا سمح الله للولد تشنج بسرعة نيميه على جنب عشان ما يبلع لسانه
وحاولي ترشين راسه ماي مش وجهه لا شعر راسه
لا ترتعبين او تخافين لان الياهل بيخاف خلج قوية
وبسرعة روحي للطوارئ
بس ديري بالج على الياهل وقت الحمى حاولي تخففينها بكل طريقة قبل ما ترتفع زيادة حتى لو اتسبحينه
اشتري مقياس الحرارة وخليه دايما عندج
..

..
بس الي قهرني ان ريلي ما يساعدني اذا مرضوا العيال يخليه كله علي حتى سيرة العيادة

ياربي تشفيه ولا تعيدها عليه قولو امين..
ويشفي جميع مرضى المسلمين..
اللهم صلي وسلم على نبينا محمد

الحمدلله على سلامته

ومايشوف شر بإذن الله

ومشكوره على التنبيه الغاليه والنصائح الطيبه

الله يسلمج فديتج

جنج ترمسين عنى نفس ولدى يوم تشنج كان عمره 8 شهور وكنت مثقله عليه اللبس وقالى راعى الصيدليه كل ست ساعات عطيه دوا الحمى والولد ارتفعت عليه الحراره وانا اتريا الست ساعات لين تشنج عاد دوريني خخخخخخخخخخخخخ اشو اسوى ام يديده والحين خلاص عرفت معنى ان ولدى الخامس بعد تشنج الله يشفيهم ويبعد عنهم الحمى

بخبركم بسالفة بنتي الله يحفظها الحين عمرها 17 سنة

الحادثة كانت عمرها 3 سنوات او اقل

نفس الشي كانت عندها رشح وحرارتها مرتفعة واايد وديتها الطبيب فحصها وقام عطاها ادول واكتيفيت بس

المهم كانت احسها تعبانة وقمت وعطيتها الدوا وانسدحت على الارض تبا الحليب سويتلها حليب وعطيتها تشربه بالمرضعة ودخلت المطبخ اسوي حق اختها الاصغر منها بعد حليب
وكانت حبيبتي تصيح من الحرارة والوجع اكيد بجسمها من الحرارة ييت عدالها عشان اشيلها بحضني ولا اشوفها ما تتحرك والله العظيم بنات انا كنت بموت يومها واناديها باسمها حبيبتي وحشاشة قلبي بس ما ترد وكانت رافعة عيونها فوق على طول شليتها وكنت اصيح بصوت عالي واصرخ وانادي ريلي حليله كان توه ياي المهم دخلت الحمام وماادري شو خلاني احط على طول على راسها ماي وكنها ما ادري كيف صارت بس تمت متيبسة حملتها وديتها فوق غرفة النوم وكان ريلي يغير ملابسها ومسكر الباب وما كان سامعني وانا اصارخ الحق البنت ماتت واصيح من الخاطر
حملناها وعلى طول على الطواري وما شو خلاني احط اصابعي بفمها وعضت باسنانها على اصابعي والله يا بنات اتقطعن من الالم بس ما اكنت احس بشي

وديتها وعلى طول خذوها مني الاطباء واجتمعوا عليها يمكن 10 اطباء وعلى طول قالولي كان عندها حرارة وقلت لهم هيه واني حطيت مي على راسها وحطيت اصابعي بتمها عشان ما تبلع لسانها اقسم يا بنات ما حد علمني لاني نفس الشي كنت انا صغيرة وما عندي خبرة ولكن ما ادري رحمة من رب العالمين بقلب الام

المهم هناك عطوها ابرة في الوريد والله يا بنات صارت مثل الزبدة الذائبة تماما ونامت بعدها وصارت تشخر وانا قاعدة اطالع واحاول امسك اعصابي وكان شكلي عن جد كنه ميتة وياني الدكتور وطمني وقالي لا تخافين الحين هي راقدة وزال عنها الخطر من اللحظة الي انت حطيتي على راسها ماي والله يا بنات خذيت زاوية وقعدت اصيح مثل المجنونة ويا ريلي يهديني وقام الدكتور خليها تصيح لين باشر لا تقاطعها لاني حرمتك لو ما صاحت كانت بتموت ما تشوف كيف لونها وشكلها يارب تحفظ عيالكم يارب وتحميهم من كل شهر امين

المهم يا بنات رقدوها في المستشفى اسبوع كامل والحمد لله الله رب العالمين عافاها ونشلها من الموت

اللهم احفظ عيالي وعيالكم يارب

انا يوم تشنج ولدى يلست اصيح واغمى عليه كذا مره ما كنت اعرف التشنج الله يحفظ عيالنا من التشنج

يا ربي قصصهم تعور القلب …

الله يحفظ عيالكم وعيالنا أجمعين ويبعد عنهم كل شر …