شخباركم بنات …؟
بغيت أخبركم عن ولدي عمره سنة و8 شهور وما شاء الله على أبوي وام ريلي معوديته على الشاي .. 
ومن يشوف الشاي او الشاي الحليب يصيح الا يبا ونعطيه ..
في وحده ولدها جي ؟؟
او لا سمح الله في وحده ولدها يشرب شاي او شاي حليب واستوابه شيء ؟؟
عادي أعطيه والا ؟؟
بس الحمدلله هو مب من النوع المدمن .. يعني نعطيه مره مرتين بالكثير ويسكت ….
اتريا ردودكم .. والسموحه 
عشان ما يحشرنا تاي وتاي هههههههههه
فديت اليهال يحبون يقلدون الكبار في كل شيء .. لدرجه ان ولدي ما شاء الله عليه يطلع الاستشوار يترياني استشور له قصته ههههههههههه
اختي الشاي له فوايد , يكون ضرره في حالة الادمان ويضر يوم ينشرب بعد وجبات الطعام الرئيسية لانه يقلل من امتصاص المواد الغذائية في الدم
عموما حاولي تقصين علي وسوي له يانسون او بابونج او حبه حمرا او اي عشبة تكون مفيدة له
يكسر الحديد لي في الدم
حاولي تفهمين أهل ريلج انه بيضره اكثر من انه بيفيده
وحاولي تخففين ربع جاهي والبقي ماي
لين تقطعيه
هم يحبون الشكر لي في الجاهي
خلطي لهم عسل في الماي بدال الجاهي
على الأقل مفيد
انا عيالي ما اعطيهم أصلا ما نسويه الا نادر
واذا عطيتهم يحسون اني كافأتهم
هذا رأي
وانتي حره
بالعكس الشاي مفيد عن البلغم وعن الربو
عالجت ولدي البجر الله يحفظه بالشاي الاحمر على نصيحة ابوي الله يحفظه ويطوّل بعمره
كنت تقريباً اودي ولدي يوميا العيادة عشان البخار (ادوية الربو) مع الاكسجين وفي البيت بعد ابخره مع الادوية مرتين او اكثر وكله بلغم و زواع
سرت اعطيه شوية شاي احمر قبل رضعة الصبح بثلث ساعة ونفس الشي العصر
ابد ماعدت ابخره نهائياً عن الربو ولا عاد يزوع الحليب
الكمية بسيطة ماذكر بالضبط بس تقريباً ربع استكانة او ثلث وكان صغير تقريباً عمره 8 شهور او 9 على ما اذكر
المهم حاسبي الكمية اللي يشربها الياهل ماتكون كبيرة ولا تعطينه مع الاكل.. بالنسبة لمشكلة امتصاص المعادن حلها بالقمح، عطيه ياكل خبز مع الشاي وان شاء الله مابيأثر الشاي على امتصاص المعادن اللي في الاكل
وبعد خففي كمية السكر، يحبون الشاي عشان طعم السكر اللي فيه