السلام عليكم ورحمة الله وبركاته
اشحالكم الغاليات؟
فديتكن أنا متابعه لهالمنتدى، بس أشارك بنك ثاني منعاً للإحراج 
اليوم بخبركن بسالفتي:
يوم فتحت تلفوني وصلني مسج إن هالفلانه متصله 4 مرات
المهم قبل لا أدش بصلب الموضوع
أنا قبل فترة دقيت على ربيعاتي الوافدات
اللي ما ترد واللي رقمها غير مستخدم واللي مغلق
المهم يوم دقيت على هالفلانه رد واحد
جان أسلم وأقوله: وين فلانه؟
قال: ما عندنا حد بهالإسم!
علماً بأن هالفلانه غيرت رقمها وطرشت لي بس أنا ما مسحت رقمها الأولي
واتخربطت أي واحد أدق لها!
ودقيت على اللي رد علي
وقالي: من وين تتكلمي؟
قلت له: من الإمارات!
قال: أنا من الأردن
قلت: أدري صديقتي من الأردن
المهم،،،
واليوم دقيت له وأنا ناسيه أي واحد داقه قبل
وما رد
عقب ساعه وإلا ساعه وشي دق لي رنه
وعلى طول دقيت له على بالي ربيعتي
جان يقول: السلام عليكم
قلت: وعليكم السلام
أنت متصل امساعه؟
قال: هيه؟
قلت: ما عندكم هالفلانه؟ الرقم هذا كان عندها!
قال: لا ما عندنا
بس أنا حبيت أسمع صوتج
وأنا من الأردن
جان أعصب وأقول له:
لو سمحت أنا متزوجه وإلا تراني بعطي هالرقم لزوجي ويتصرف وياك
عقب ما أعرف شو قال؟ جان أبند الفون فويهه
استغفر الله عنبوه حتى فرمضان بتغازل
شوركم إذا رد دق لي مرة ثانية أخبر عليه ريلي وإلا ما أخبر؟
لأن قبل كانت تييني أرقام وما أرد عليهم، ويوم أخبر ريلي يسجل الرقم عنده ويدق له
وعقب ما قمت أخبر ريلي عن الأرقام اللي يدقون لي
واسمحو لي ع الإطاله
ومشكورين
لكن اختي انتبهي للارقام لان الرياييل لو سكتو مره 2 3 مابيسكتون عقب ربيعتي صار معاها نفس موقفج تقريبا بس تكرر معاها اكثر من مره عصب وكنسل لها الرقم وبعد فتره شهرين طلع لها رقم ثاني فانتبهي حبوبه
والسموحه منج
مب لازم تكبرين الموضوع وتعطينه اكبر من حجمه
بسيطة امسحي رقمها الأول
واذا ياج رقم من الأرقام اتجاهليه
ولا تيلسين اتخبرين ريلج كل شوي … لانه صدق بعد فترة ممكن الشيطان يحط في بالة اشياء ثانية … وتستوي لج مشاكل لا سمح الله انتي في غنى عنها …
عني انا مستحيل اخلي ريلي يرد على اي رقم غريب ولا اخبرة بعد … طبعا انا ارد اول مرة … واحفظ الرقم واخلي اخواني يهزبونه …
لا تزعلين والله بس صدق انتي الغلطانه . .
امسحي الرقم ولآ تدقين مولية واذا تم يدق طنشي . .
واذا أذآج وآيـد خبري ريلج . .
انواع الازعاج والمكالمات!
بس انا ماارد على الارقام الغريبه سواء محلي او دولي!
اللي يباني بيطرش لي مسج!
واذا ريلج من النوع المتفاهم خبريه بس عشان يكون في الصور لأنه الموضوع تافه!
موفقه
مثل ما قالت اختي نبضي
مممم هذا اللي عندي حبوبه
و السموحة