ّّ الآيـــه اللي غيـــرت مسار حيــاة {الجــوهره}ّّّّّ مع بعض النصايح ^^ 2024.

تعرفون بنات وحرومات اليوم كنت ارمس ربيعتي تلفون وكانت وايد مظايجه وكنت افكر

ابا اهون عليها اللي هي فيه ومب عارفه كيف جان انصحها بقيام الليل والاستغفار وجذه

وفجاه تذكرت قصه صارت لي عجيبه ونسيت اخبركم اياها واخبرها صديقاتي اللهم اني قلتها حق امايه

وحق توام روحي فديت روحها

طبعا انا بقولكم اللي صار وياي لغرض واحد بداخلي اباكم تعرفون ان مهما سويتو بحياتكم الله وياكم بكل خطوه تخطونها

وصدقوني صدقوني صدقوني يوم تلجؤون له ماراح يخيبكم ابدا وراح يرحمكم لنه رحيم بعباده جل في علاه

اللي صار وياي خواتي

الاغلبيه هني يعرفون اني منفصله من بعد ملجه بس في شي استوالي يوم طلاقي ماذكرته

كنت اصلي قيام الليل بالثلث الاخير اكثر عن 4 ركعات ماعرف بالظبط كم صليت بس شو يابنات الله شاهد عليه وامي شاهده على كلامي لنها كانت عندي وشايفه حالي

كنت ناسيه وجودها وناسيه كل من حولي ومندمجه مع ربي وبس واصلي القيام وادعي بالسجود واطول بالسجود واصيييييييييح اصييييييييح السجاده مالت الصلاه والله ياخواتي ابتلت من الدمووووووع

وكنت بعدني اصلي واصيييييييح بالسجود واترجا ربي اقوله ارجوووك يالله ارجووووووك هون عليه يارب ارجوووووووك ريح قلبي وريحني من حيرتي يارب وادعي وادعي من خاطري

فجأأأأأأأأأأأأأه

والله العظيم

فجأأأأأأأأأأأأأأأأأأأه وانا ساجده وبعدني اصيح

يت هالايه على لساني وتميت ارددها وانا ساجده بدون ما احس مع اني ماكنت اعرفها ولا كنت حافظتنها

وقبل انفصالي اصلا انا ماكنت ملتزمه وايد يعني كنت اقرى قران بس ماتوصل اني احفظ ايات

بس فجاه يت على لساني بالسجود

وتميت ارددها

ارددها

ارددها بدون ما احس والله يا بنات

وشوي شوي وانا ارددها وبعدني ساجده اهدى

اهدى من الصياح اهدى وصرت ارددها بهدووووووووووووء

وقمت من سجودي

وانا بعدني ارددها وقلت التشهد وانا مبتسمه مبتسمه ومرتااااااااااااحه

ويوم سلمت تميت ارددها وانا مبتسمه وشاقه الحلج

وفجاه طالعت امايه تمت تقولي اسمعج ترددين هالايه من سجودج وللحين ترددينها بلاج

قلت لها ماعرف ماعرف شعور غرييييييييييييييييييب وحلووووووووووووووووو

ومرتاحه

وهالايه رساله لي من رب العالمين الحمد لله هو اللي خلاها اتي عبالي وارددها بهالوقت مع اني مو حافظتنها

وتميت بعد الصلاه اتمعن في معانيها وانا ارددها

والله يا خواتي من يومها حياتي تغيرت تغيرت للاحسن وللاحسن وللاحسن بسبب ربي سبحانه ثم هالايه

وكل مايستوي لي شي بحياتي اتم ارددها واحس روحي ارتاااااح الحمد لله واعرف ان كل شي خير لي وانا مادري

مهما كان مؤلم بس اكيد هو خير لي

اكيد تبون تعرفون شو هي الايه صح

بقولكم اياها

قال تعالى جل في علاه :

{وَعَسَى أَنْ تَكْرَهُوا شَيْئًا وَهُوَ خَيْرٌ لَكُمْ وَعَسَى أَنْ تُحِبُّوا شَيْئًا وَهُوَ شَرٌّ لَكُمْ وَاللَّهُ يَعْلَمُ وَأَنْتُمْ لَا تَعْلَمُونَ}

سبحان الله سبحان الله سبحان الله

في احلى عن هالكلام في احلى منه خطاب لنا من الله عز وجل

يخبرنا فيه ان مهما صار لا تحزن مهما صار لج من خير او شر لا تحاتين وخل عندج يقين ان كله خير من رب العالمين واكيد راح يعوضج بالاحسن سواء بالدنيا او الاخره والاخره خير وابقى^^

في شي بعد

الرسول صلى الله عليه وسلم لما كان مع ابوبكر بالغار متخبئين من كفار قريش

شو قال الرسول صلى الله عليه وسلم لابو بكر

إِذْ يَقُولُ لِصَاحِبِهِ لاَ تَحْزَنْ إِنَّ اللّهَ مَعَنَا فَأَنزَلَ اللّهُ سَكِينَتَهُ عَلَيْهِ وَأَيَّدَهُ بِجُنُودٍ لَّمْ تَرَوْهَا

التوبه 40

ماشاء الله شوفو ثقة الرسول صلى الله عليه وسلم بالله مع ان ابوبكر في حديثه كان يقول للرسول صلى الله عليه وسلم

لو نظر احدهم (يقصد كفار قريش) تحت قدميه لرآنا

بس ثقة الرسول بالله كانت قويه

ليش مانستوي شرات الرسول صلى الله عليه وسلم

واي خطوه نخطيها يكون عندنا يقين بالله انه راح يحمينا وراح يحققها لنا وبيكون عند ظننا به

لا تنسون هالحديث

أبي هريرة – رضي الله عنه – قال : قال النبي – – : يقول الله تعالى : ( أنا عند ظن عبدي بي ، وأنا معه إذا ذكرني ، فإن ذكرني في نفسه ذكرته في نفسي ، وإن ذكرني في ملإ ذكرته في ملإ خير منهم ، وإن تقرب إلي بشبر تقربت إليه ذراعا ، وإن تقرب إلي ذراعا تقربت إليه باعا ، وإن أتاني يمشي أتيته هرولة ) .

تخريج الحديث
رواه البخاري و مسلم .

اقرو الحديث وتمعنو بكلمه كلمه فيه بتوصل لكم الفكره عدل وبتحسون براحه عجيبه

وفي حديث اخر عن الرسول صلى الله عليه وسلم

( ادعوا الله تعالى وأنتم موقنون بالإجابة ) رواه الترمذي

شفتو كيف ادعي الله وانتي على يقين انه راح يستجاب لج يعني لا تشكين بالموضوع خل عندج يقين خلاص تاااااااااااام

{الظانين بالله ظن السوء عليهم دائرة السوء }( الفتح 6)

شفتو كيف خواتي اذا دعيتي ربج وانتي حاطه براسج ان ممكن يستجاب وممكن لا

او تقولين ممم يالله الموضوع صعب حتى لو دعيت ربي احتمال ما يتحقق لنه مستحيل وجدا صعب

صدقيني بس هالكلمتين اللي قلتيهن ماراح يحل لج المشكله لنج اصلا مب واثقه فيه ولا عندج قوة يقين فيه

رب العباد مافي شي مستحيل او صعب عليه

يقول للشي كن فيكووووووووووووووون

بس يبا منج يقين انج تدعين بيقين اكثر وثقه فيه اكثر

وأخبر النبي – – أن ( أقرب ما يكون العبد من ربه وهو ساجد فأكثروا الدعاء ) رواه مسلم

كل هاي ادله لكم خواتي

والله مانززلت هالموضوع الا ونيتي من داخلي اني ابا لكم الخير

خواتي انا اتيني رسايل خاصه من بنات جدا متحطمات والحمد لله احاول اساعدهن على قد ما اقدر الحمد لله

بس نزلت هالموضوع لني اريد هالفئه يقرونه وكل بنات المنتدى اي وحده مهمومه اي وحده ماعندها يقين بالله

اي وحده عندها حاجه تتمنى انها تتحقق

اقولج انتي في فرصه عظيمه بين يدينج

شهر رمضان المبارك والعشر الاواخر وليلة القدر ويوم الجمعه وقيام الليل والتراويح والصيام ودعوه قبل الفطور ودعاج وانتي صايمه وبكل وقت استغليه والحي بالدعاء

اذا لج حاجه عند الناس لا تذلين روحج لهم ذلي روحج للي خلقهم وقادر يغيرهم وقادر يخليهم يسوون لج اللي تبينه

الله اكرمج وعزج لا تذلين روحج لحد بس ذلي روحج لرب العباد

والله احبكم في الله خواتي واتمنى من الله عز وجل ان كل وحده تدخل موضوعي هذا ماتطلع منه الا وهي مرتاحه وعندها يقين بالله عز وجل

واسال الله العلي القدير ان يحقق لكل وحده فيكم ما تتمناه وان يفرج همكم يارب ويسعدكم ان شاء الله

واسال الله العلي القدير ان يرضا عني وعنكم وان يعوض صبري خير ييارب ويعوضني بالرجال اللي يقدرني ان شاء الله وكل وحده فيكم يارب

وسمحولي لو خبصت بشي لني مسطله وقاعده اكتب هع ^^ ان شاء الله وصلت المعلومه ^^

دعواتكم لي ^^