اليوم الاخت فاضيه فقلت بحط وصفاتي حق نونوتي او طريقتي في تغذيته اتوقع الاغلب يعرفون بس فايده للي ما يعرف طبعا انا من اول ما ولدت وانا فيني حماس ااكل ولدي بس الحمد لله مقاومه الرغبه المكبوته اني اخلي ولدي بطريق تختوخ للحين وهاي نصيحه من دكتور ولدي اللي متابع معاي اول باول لا ويهزبني بعد اذا ما اتبعت كلامه زين المهم ..
اول ما سكنت بيتي خصصت كبت في المطبخ بس حق اكل ولدي ومواعينه في اداوات يبتها اول ما بديت ااكله وفادتني واايد طبعا منها اشياء ما استخدمتها للحين بس مجهزتنها عندي والادوات المهمه برأيي
اولا :خلاط الهرس ويفضل يكون خاص للطفل فيه منهم اسعارهم مو غاليه
ثانيا:عصاره البرتقال واقل شي في ب 30 درهم هاي عادي لو تستخدمين عصاره البيت
ثالثا:صحون وملاعق فقط للاطفال …
رابعا:جدر خاص للبيبي وليفه تنظيف وصابون خاص للاطفال انا يبت معقم من كارفور وصابون من محل الاطفال للمراضع بس استخدمه للجدر مال نونتي..
خامسا : علب الحفظ و لصقات تكتبين فيها نوع الاكل ومتى سويتيه صالح لغايه .. للحريم اللي ينسون مثلي ..وللي يسوون كميه ويحفظونها في الثلاجه..
سادسا : فيه مثل مصاصات تعبينها فواكه او خضار او اي شي حق الياهل عشان يتعلم يمسك اكله بايده والحلو انه فيها مثل قطعه شاش يعني ما تخافين تطلع له قطعه عوده يغص فيها او شي..
سابعا: نسيت اذكره جهاز البخار مال العيش عشان تسوى فيه الخضار بدال السلق وتروح فايدتها
الاكل اللي دايما لازم يكون موجود لانه مده صلاحيته طويله :
_ شوفان
_ رز اطفال اورغانيك مطحون واذا ما عندج ممكن استخدام الرز المصري
_ عدس
_ نشا
_ مهلبيه
_ معكرونه اطفال
_ حب هريس
_ قمح مطحون
وبالنسبه لي انا كام اشتغل ايام اوصل متاخر على ولدي وما احصل وقت اسويله وجبه محترمه فاسرع شي للغدا اني ايب اي شي من هالاشياء اللي فوق و اخلطها مع خضار مهروسه للاطفال جربت هاينز وكارفور نفس الطعم تقريبا وكارفور ارخص بوايد
وفيه شي اغلب الامهات يضيفونه لاكل اطفالهم الماجي او مرق الدجاج او اللحم انا عن نفسي دورت طريقته وسويته روحي وقللت كميه الملح وحاطتنها فالفريزر للحاجه واستخدمها لاكلي كله ..
وهاي طريقته
المقادير:
عظام دجاج
بصلة مفرومة( بصله الا ربع للاطفال او نص بصله)
فصوص ثوم مهروسة ( كميه قليله للاطفال)
كوب من الخضار الورقية والخضراء { بقدونس كزبرة شبت كرفس غار زعتر } أي ربع كوب من كل نوع
ملح فلفل اسود ( تقليل الملح للاطفال واستخدام الفلفل الاسود الحب 4 حبات بس)
رشة كاري حسب الرغبة( للاطفال بدون كاري يفضل اعشاب طبخ فقط مع رشه كمون)
اعشاب طبخ
صلصه ناندوس بالليمون( بس اللي اسويه لولدي بدون صلصه )
التحضير:
تسلق عظام الدجاج بالماء ويمكن استخدام ماء سلق الدجاجة.
يصفى المرق ويخلط بالخلاط مع بقية المقادير بالخلاط.
يوضع على النار مدة ربع ساعة.
يعاد إلى الخلاط ويخلط مجددا.
تعبأ الخلطة في مكعبات ثلج وتدخل الفريزر لتجمد.
تفرغ المكعبات وتعبأ في أكياس بالفريزر لحين الحاجة.
واغلب الامهات ياكلون عيالهم سريلاك واحنا ممكن نسويه فالبيت افضل لانه التجاري يقولون نسبه السكر فيه عاليه
وطريقه المنزلي
تيبين قمح وتطحنيينه عدل عدل وعقب تشخلينه وتخلطينه مع بسكوت اطفال مطحون وتزيدين عليه حليب وماي حار يوم بتاكلين ولدج او بنتج ممكن تزيدين شويه سكر لانه فيه طرق فالنت بالعسل بس المعروف انه العسل للاطفال اللي اقل عن سنه مو زين..
والحين نونوتي شو كان ياكل
الشهر الاول كنت اعطيه حليب طبعا
مع تمر وماي يعني تمر ممروس مع ماي ( وهاي سنه عن رسولنا الكريم صلى الله عليه وسلم)
كنت اييب التمره واطلع منها النوى اتم افركها بيدي ليما تليين عدل وعقب احطها في فنجان واصب عليها شويه ماي حار واتم اخلطهم ويا بعض وعقب احطهم في مشخله واحرك الخلطه ليما يطلع لي من تحت تمر لين وممروس نفس الهاينز واحطه في صحن واعطي ولدي بملعقه الاطفال ..
هالشي ساعدني اني ااكله الحين بسرعه يعني ما استغرب من القفشه عادي متعود عليها غير جيه التمر يسير البطن شوي وصحه للياهل
وعقب التمر اعطيه رضعه اعشاب على كيفي
كنت احط ينسون مع بابونج وسكر نبات
او ينسون روحه مع سكر نبات
او شمر مع سكر نبات وام مكس المهم رضعه اعشاب وتكون الظهر او العصر وبالعاده اعطيه التمر ورضعه الاعشاب مع بعض كوجبه غدى احسها تشبع وتريح بطوونه فديت بطوونه انا .
الشهر الثاني والثالث نفس الشي …
بديت الشهر الرابع لاني حسيت انه مستعد للاكل بس مو كل يوم يعني كل يومين اجرب وياه شي او حتى بالاسبوع مره عادي وها من كلام دكتوري كان يمنعني ااكله لانه الاكل قبل الشهر السادس يسبب سمنه وبعيد الشر سكر فقلت بس بجرب وياه كل فتره عشان يوم ابدى ااكله ما يرفض الاكل .
كنت اعطيه كم نوع بس من الخضار عشان ما تسبب له حساسيه
بديت بالبطاطا الحلوه الفندال عالبخاروعقب اضربها بالخلاط , كوسا , جزر , بطاطس , يقطين عسلي
فالشهر السادس ..
الساعه 6 حليب
الساعه 10 سيريلاك و يفضل السيريلاك المنزلي وممكن تزيدين عليه تمر مطحون او مريس التمر نفس الشي.
الساعه 12 حليب
الساعه 2 الغدا عباره عن اي نوع من انواع الخضره او مكس خضار ( لمده اسبوعين وعقبها قمت ازيد نوع من النشويات عيش مطحون عدس وعيش او شوفان)
الساعه 4-6 ممكن ياخذ حليب او رضعه اعشاب عشان الامساك لانه الاكل يديد عليه وممكن يسبب له امساك اول ايام..
الساعه 6_8 فاكهه وبديت بالاسبوع الثالث من الشهر السادس
الساعه 10_11 حليب وينام ويقوم بليل يشرب رضعه
الشهر السابع ولحد الحين :
نفس الجدول بس زدت الدجاج فالاسبوع الثالث من الشهر السابع وسويت له عرسيه
اول يومين العرسيه بروحها و بعدين زدت عليها الخضار ..
والفاكهه زدت عليها مهلبيه ونشا وبسكوت
وزدت وجبه عشا قبل النوم من السريلاك .
بالنسبه للخضروات مثل ما ذكرت قبل اي نوع خضار بعد ما ينحط فالبخار ازيد عليه رشه ملح او شويه من مرقه الدجاج ومع الشوفان او العيش او المعكرونه وينضرب فالخلاط او عرسيه ومع اي نوع خضار بس بدون ماجي ولا ملح لانه الدجاج المسلوق للعرسيه فيه نكهه بهارات شوي وملح..
والفاكهه بعد ما نقشرها ونسلقها او نحطها في جهاز البخار نخلطها ونزيد معاها مهلبيه او نشا او بسكوت اطفال مطحون.
جربت معاه الافكادو وزدت وياه شويه حليب اطفال مع رشه فانيلا ورشه سكر بودره طلع يمي يمي ايس كريم لذيذ..
احيانا اعطيه روب بس مو دوم لانه ولدي مزاجي وما يحب الروب بس بين فتره وفتره اعطيه فروزن يوغرت يعيبه لووووول وقمت اخذ وياي البيت واخلط وياه بيريز او اي فاكهه يعيبه فديته انا.
هذا اللي اذكره لحد الحين واذا فيه شي بضيفه ان شاء الله
تسلمين إختي ،
يزاج الله خير لانج فدتينا بخبرتج
مشكوووره حبيبتي استفدت واايد من وصفاتج وفي ميزان حسناتج ان شاء الله ..