شخباركم؟ ^___^
من كم يوم كنت اتناقش ويا الوالدة عن موضوع الزواج
يعني كنت اقولها شي بنات في المنتدى يكتبون عادي آخذ معرس؟ عادي آخذ مطلق؟ عادي آخذ واحد عنده عيال؟ عادي آخذ واحد مادري شو بلاه
قلتلها هالايام و الله ما تحصلين العزابية يبون يعرسون.. و دوامي اكبر دليل.. و الله إنه العزابية حتى ما يفكرون في الزواج مع انه اعمارهم 29 و 30 و فوق
و وحدة اعرفها هي مطلقة و خذاها واحد اصغر عنها و عزابي
و وحدة ثانية بعد اعرفها.. اطلقت ثلاث مرات و بعده اييها رياييل عزوبيين
و نحن البنات.. يبونا المعرسين و المطلقين و اللي عندهم عيال
شفتوا كيف انجلب حال الدنيا؟
و الله انه مش حسد.. لكن تستغربين من هالحال اللي نحن عليه
معقوله مافي حد يبا البنت اللي في حالها؟ و اللي عافه عمرها؟
و يوم اقرا المواضيع هل عادي آخذ فلان و لا علان
خاطري اقولها خذيه لانه رياييلنا خلاص.. ما قاموا يبون الزواج
يبون الهياتة.. يبون يسيرون القهوة.. ما يبون يكونون عايله
و الله هاك اليوم اقول حق اهلي.. اشوف وحدة امريكية يمكن عمرها 23 او 24 يايبه وصفة و على الوصفة مكتوب اسم واحد مواطن و من قوم الفلاني
قلتلها هذا حقج؟ قالتي بالحرف الواحد "No.. It’s For My Boyfriend"
كانت ايده محترقه و تبا الكريم
يعني شوفوا شبابنا كيف؟ و الله تنقهرين.. بنت البلاد تعافها لو عرفت انها كانت تحب
و هاي سايرة ويا ستين الف واحد خلنها ع راسك و مفتخر فيها بعد.. يايبنها مكان رسمي..!
و هي بكل فخر تقولي انه حبيبها..!!!
و الله عشنا وشفنا
و مش الوحيد.. فيه غيره و غيره
و الله اني اقول حق الوالدة.. لو البنت راضيه خلها تعرس.. ان شا الله لو عنده 10 عيال و تتحمل
و تصبر.. خلها تعرس
الواحد قام يفكر التفكير السلبي من كثر ما يشوف و ينقهر
عنبوكم محد من هالبنات عايبنكم؟ معقوله لهالدرجة مافينا جمال؟ و لا ما نعيبكم؟
تشوف اللي مخلصه ماجستير و اللي مخلصه بكالريوس و اداوم و عندها سيارة
يعني مجرد اللي ناقصنها ريل يستر عليها و يحبها و يحترمها و تكون عايله و هذا حلم كل بنت
خصوصا اول ما تتخرج من الجامعه.. يكون هذا هدفها.. و هذا اللي تبغيه
و الاهل المعرس لا.. و المطلق لا.. و اللي عنده مطلق و عنده عيال لا
و العزوبي هذا صايع و صغير و كبير و طويل و قصير
من فترة هالموضوع في بالي.. يعني لين متى؟
لين متى البنات وصلوا الثلاثين و ماشي حد دق بابهم و لا اللي يدقونه معرسين و يبون الحرمة الثانية
في دوامي وحدة وصلت 36 و تقولي و الله يا فلانة.. مابا غير اني اعرس لين متى بتم جيه؟
و غير اللي تحب الريال من سنين.. و اهلها يعرفون.. و ما يبون يعطونها اياه بحجة انه عيمي..!!!!
و هو تقدملها فوق ال 5 مرات..!!
ليش يعني؟ بنتكم بتسير بالحرام بسبب هاي الكرامة اللي مب مخلتنكم تتنازلون
و الريال شارنها و يحبها و يمووووووت فيها و الله يموت فيها و في التراب اللي تمشي عليه
كل يوم اتيني تصيح و تتصل و تشتكي من اهلها
و تقول محد طايع يوقف ويايه.. لا اخوان و لا خوات
ما تصدقون القهره اللي فيها.. ليش كل ها؟
إذا هي راضيه.. خلها تاخذه و تتوكل على الله.. دامه نصيبها بدال الحرام و الشيطان شاطر و يعرف يلعب في عقل الواحد
لانه دام حال شبابنا جيه.. بنات البلاد بيخيسون و لا حد بياخذهم
ع الاقل تحصلها حد يستر عليها و يعفها و يصونها من الحرام اللي بتطيح فيه..!
السموحة منكم.. ادري الموضوع شوي مش مرتب.. و طويل نوعا ما.. بس الرمسه في خاطري من فترة..
و الله يرزق كل البنوتات بريال يصونها و يحبها و يخليها ع راسه
الله يستر علينا .. ما بيدنا شي غير ندعو الله … والحمدالله تسلمين والله ع الكلام الي يلخص كل شي داخل كل بنت عفيفه تبى الستر