توكلت على الله قلت انا بوديه طبعآ بعدما اشتد عليه الالم وصار مايقدر يتحرك ولا يتكلم هو طلب مني اني ما اتصل في حد من اهله ووديته انا احتراما لرغبته اكثر شي وخذت وياي احمد ولدي وهو في بداية المرحله الابتدائيه ،
واما عيالي الصغار الثلاثه امنتهم الله وخليتهم لاول مره في حياتي مع البشكاره ، واول ماوصلنا المستشفى ركض احمد يزقرلنا حد و يوا شلوا ريلي ع النقاله لانه حتى ماقدر ييلس ع الكرسي المتحرك
دخلوا بياناته ع السريع وركضوا به ع قسم الطواري داخل ، وكنا انا واحمد وراه فجأه وقف في ويهنا السكيورتي
قال : ممنوع دخول اكثر من شخص مع المريض
قلت له : بس هذا طفل كيف تحسبونه عن شخص؟! وين اخليه في هالوقت ؟؟
قال : قانون المستشفى
رحت به صوب انتظار النساء ويلسنا بس ماطاوعتني نفسي اخلي ابوه وحالته حاله ف يتني فكره انني اتناوب عليهم مره عند احمد ومره عند ابوه ، وطلبت من احمد انه ييلس مكانه ولايتحرك منه وانه مايكلم حد ولايسير ويا حد حتى لو قالوله نعرفك وهو حافظ رقمي قلتله يوم تحس انك تباني سير عند الشرطه وقولهم : هاه رقم اهلي
وخلهم يتصلون فيّه ، لانه تيلفون ريلي ناسينه فالبيت ، وسرت وامنته الله هوه بعد
ودخلت القسم وسألت عن ريلي و دخلوني الغرفه يلي هو فيها مؤقتآ وفجأه اتوافدوا عليه الدكاتره واشر لي براسه عسب اظهر ، وظهرت وبرع الغرفه حصلت شباب اثنينه ويطالعوني من بعيد عطيتهم الظهر وبدت حالة ريلي تتأزم وبدا يرجّع ف سمعت واحد فيهم قال : الله يغشّك
قلت يالله يمكن يرمس ربيعه ورجّع ريلي مره ثانيه وسمعت نفس الكلمه من نفس الشخص ف طنشت ع الاقل احترامآ للمكان والمرضى يلي فيه .
وطلعوا الدكاتره ودخلت عنده ، لاحظت نفس الشابين يطالعون من فتحه في الستاره ف نشيت سكرتها طبعا ريلي مب حاس فاللي حوله ابد ، بعدها بدقايق طلعت .. سألت الممرض عن مكان ممكن اخذ منه رصيد لتلفونيه عسب اتطمن ع اليهال اللي فالبيت قالي : الحينه صعبه تحصلين
واسمع صوت من وراي : الشيخه جان تبين رصيد انا بحول لج جم رقمج؟؟ (شفتوا الوقاحه)
قلت مابرد عليهم احتراما لذاتي كمسلمه وكحرمه معرسه ، وخفت يسمع ريلي ترا الحشيمه مب لهم للمكان يلي انا فيه ، قلت برجع الغرفه وفطريجي للغرفه ياني الممرض يزاه الله خير وقالي : انا ببيع لج بطاقة رصيد مالي وادفعي ثمنها عسب اخذ لي غيرها عقب ف اشتريتها منه وتطمنت ع اليهال ، وصدق يومها دعيت له من قلبي هالريال ولاهله يعني فرق كبير بينه وبين اللي رمست عنهم قبل .
بعدين ييت برجع الغرفه عند ريلي وشفت الدكاتره فغرفة ريال شيبه والستاره مفتوحه واكتشفت بالصدفه انه هالشيبه ابو الشباب لاثنين وانه هم شخصين عند مريض واحد ف سرت على طوووول للسكيورتي قلت له : كيف منعت ولديه انا من الدخول وهو ياهل وهناك شخصين ويا مريضهم ولا القانون ع ناس وناس وبعدين هالشباب طايحين مغازل في القسم ، ومأذيننا وانته على شوه سكيورتي ف اذا ماسرت وظهّرت واحد فيهم انا بسير للضابط المناوب برمسه
طبعآ ماعنده حجّه ولا له ويه يرمس ف سار واجبر واحد فيهم انه يظهر من القسم ، ف سرت اتفقد ولدي واطمن عليه ، وقلت له بكون مره عندك ومره عند بابا و اكدت عليه اذا يباني يتصل بي من عند الشرطه ووافق وظهرت من غرفة الانتظار ولمحت الشخص يلي اجبرتهم يطردونه من القسم يالس يوايج وعينه في غرفة الحريم ف سكرت الستاره كامله وظهرت
سرت عند ريلي حصلت الدكاتره عنده يخبرونه انه بيسوون له عملية الدوده الزايده حالا ولازم العمليه تستوي بأسرع وقت خوفا من المضاعفات او لاسمح الله تنفجر ويتضرر وقالوله دقايق وبتوقعون وبتدخل العمليه رحت لولدي حصلته يبا يرقد وقالي : طلعت من هني رحت ادور الشرطي مالقيته ولقيت ريال سألني عن اسمج
انصدمت كيف يسأل عن اسمي ؟ وسألت ولدي : شوه قلت له
قال: ماقلت شي كنت ساكت
قلت له اذا شفته بتعرفه ؟ قال : بعرفه
طلعت وياه من الغرفه و واشر لي ع نفس الشاب اللي طردوه من الطواري واول ماشافنا هذاكي شرد وهو يضحك سرت كلمت الشرطي وطلبت منه انه ولدي يدخل يعني يدخل وشرحت له السبب ، وسار وزقر الريال وتم يصارخ عليه وهدده بالمحضر وقاله الحرمه تبا تشتكي علي
( تخويف طبعا)واول ماسمع انه فالسالفه شكوى اعتذر وقالي الشرطي خلاص خذي الولد داخل قتله : السكيورتي معاند و رافض
ماقصر وسار وغسل شراعه ،
يتبع
المهم دخلنا وكانوا يحضرون ريلي للعمليه ويتأكدون اذا عنده امراض ثانيه او حساسيه او شي من هالنوع ، واحمد كان يوعان يعني كملنا وقت ونحن فالمستشفى قلت ع الاقل باخذ له شي من المكينه الموجوده برع عصاير او شي خفيف ، ومنها عسب مايرقد بعد ، وكنت اترياه يختار اللي يباه الا اتفاجئ بشخص ثاني من ورايه ويالس يردد رقم تيلفونه ، وقلت في خاطري الظاهر اننا مابنسلم اليوم ف كرهت اتم في المكان دقيقه وخذت ولدي وسرنا بدون ما اشتري له اي شي وسرنا عند ابوه ، وسمعت الشاب يلي كان عند الشيبه يرمس في التلفون بأستهزاء ويقول عن ابوه طبعا ( ابوي قاضي ومنتهي واذا مات الموت حق لحد يحشرني الحين اللي يسمعكم يقول اذا مات بصلي عليه وبدفنه هنيه بروحي يعني اكيد انكم بتعرفون) وضحك
قلت في نفسي ان شالله يكون الشايب ماسمع اللي يقوله ولده سبحان الله اذا انه مارحم ابوه في عز مرضه بيرحم ريلي؟ وتذكرت الايه
(واخفض لهما جناح الذل من الرحمه وقل ربي ارحمهما كما ربياني صغير)
لاني بصراحه كنت اسمع عن عقوق الابناء بس اول مره اشوفه واقع جدامي ، بس دعيت له بالهدايه ، وخذوا ريلي للعمليه وبعد فتره طلعوه ونقلوه الغرفه ، تم يكلمنا انا واحمد بدون وعي عقبها قريت عليه شوي ورقد
واحمد بعده يوعان قلت نسير كافتريا المطعم واخذ له شي من هناك ، واول ماخلصنا جان ايي شخص غير يحاول يدفع فاتورته وفاتورتي ، معتبرنها رجوله منه ، ومتفاخر جدام الكل قلت عاد هني ماشي مرضى ومافي مجال غير اني ارد عليه وغسلت شراعه وطلع من المكان منزل راسه
والله هو يوم واحد وتبهدلت فيه ، ومن هالمواقف كلها في يوم واحد صدق صدق حسيت انه الحياه بدون ريال وايد صعبه سواء ابو ولا اخو ولا زوج ، وبمجرد انه ريلي طاح وابوي واخوي سافروا صدق افتقدت وجودهم في حياتي م الخاطر
دعواكم لزوجي بالشفاء ولي ولكن ولشباب الامه بالهدايه والثبات
ميره المهيري
ربي يعافي ريلج من الشر ويخلي لج عيالج…
خسهم الله هذيلا الشبااااب .. بس ما شالله عليج كنتي صبوووره
الله يخليييلج عيااالج والحمد لله ع سلامه ريلج
^^
والله وانا اقرا الموضوع احس انه يضحك واحس انه يبكي من سخافه هالشباب ووقاحتهم بس شو نقول غير الله يهديهم….وانا لو منج كل شوي برد للشرطي الاولي خخخخخخخخخخخ
صدق اختي الحياه من دون ريال متعبه وما تتحملها الحرمه روحهه
والمشكله انه في حريم تكابر وتقول شو يعني ريال اقدر اجابل عمري
الله يستر عليج وعلينا اجمعين
ويرد أبوج وأخوج بالسلامة
والحمدالله انج عرفتي تتصرفين