شحالكن يالغاليات؟
أنا متعودة أقرى شكاويكن وهمومكن…بس أحس اللي عندي أكبر من مجرد
شكوى أو هم…
أبغي أفضض باللي داخلي …مع أني متأكدة مو كل اللي بداخلي أقدر أقوله..
أنا بنت وبنظر الجميع أجمل وأحلى البنات هذا راي الناس فيه,بس عمري 30 سنة ولين اليوم مب
متزوجة …ولا حد دق بابنا يبغيني أنا بالذات…دايما خواتي اللي ينخطبون لين
يا الدور على أخر العنقود وانخطبت ولحظتها حسيت أني صدق كبرت ومحد
يبغيني…
كنت مهتمة وااااااااااااااااااااااااااااااايد بحياتي وبشكلي ودراستي ..كنت
بكل شي أحلى وأفضل بس ما ياني النصيب…
كنت جريئة وااااااااااااااااايد لكن الحين تغير حالي , هموم الدنيا على راسي
والدموع ما تفارقني وحتى ضحكتي ووناستي اختفت…صرت وردة كل يوم تذبل
أكثر….
ما بقى وقت عن عرس أختي وأحس نفسي بموووت من نظرة الناس…أنا
ارتبك واستحي وأخاف الناس تلاحظ علي…أحس نفسي لو صحت ما راح اسكت
لأن اللي بقلبي شي كبير…خايفة وايد من العرس والناس…
حتى أدعي على نفسي أني أموووت أو يصيرلي شي قبل العرس…لأني صدق
ما اقدراتماسك جدام الناس اللي ما ترحم بكلامها ونظراتها…
دايما أفكر ليش أهلي ما فكروا فيه مع الناس اللي حولنا ما بدوا بناتهم الصغار
على الكبار…كان خاطري أمي تقولي سامحيني بنتي بديت خواتج عليج…بس
مووووووووووووول محد افتكر بمشاعري…
خاطري أصارح أحد بهمي لكن ما عندي هالجرأة اللي أقدر أمسك دموعي
وأتكلم…مشكلتي دمعتي قريبة…
وقصتي الثانية …أني حاليا أكلم واحد أكبر مني بــ5 سنين وعلاقتي جديمة
فيه سنين طويلة…أنا صح أهلي ربوني بس على يديه ربيت وعقلت أكثر..
أولا كانت علاقتنا حلوة بمعنى الكلمة بس لابد من أي علاقة فيها مشاكل..
بس من فترة فارقته شهرين,اختفيت من حياته بالمرة لاهو يدري عني ولا انا
أدري عنه لكن رجعلي وقالي أنا ما استغنى عنج لو شو تسوين فيه واليوم
ياينج شارنج ولو أحط على راسي ديون مالها نهاية باخذج وبتكونين لي ..
المشكلة هو من قبيله غير عن قبيلتي …يعني أحس أهلي ما بيرضون بقبيلته..
والمشكلة هو متزوج بس بالنسبة لي هذي مو مشكلة …بس أحس أهلي ما
يرضولي أخذ متزوج…
والمشكلة الأكبر ماله أحد أيي وياه يخطبني … قالي اعتبريني مقطوع من شيرة
لأني بعد ما أخذج بخبرهم ويصير اللي يصير …بس الحين نفكر منو بيي وياه..
ولازم الحريم أيين بالاول لكن من وين اييب الحريم؟
هو مستعد لأي طلب يطلبونه منه أهلي بس مشكلته منو بيي وياه…
وانا طولت سالفتي وياه ونحن نتناقش بهالسالفة اللي مالها نهاية وما حصلنا
حل لها…
يقولي ودي أخطبج قبل ما تعرس أختج ولا يكون خاطرج مسكوور جدام الناس..
وهالحب اللي دام سنين بيني وبينه ما يعلمه إلا رب العالمين…لاعمري
فضفضت لأحد واشتكيت ولا هو بعد فضفض واشتكى…
والحمدالله ما مشيت بالحرام …لكن نصيبي كان جذيه…وسبحان الله دايما
أقول يمكن ربي أجل فرحتي لحكمة هو يعلم فيها…
وسامحوني يمكن سالفتي مو مرتبه بس كثر دموعي اللي طاحت من عيوني…
واتمنى تدعولي بالخير والتوفيق…وأبغي آرائكن بكل صراحة…
وكيف أخلي نفسي جريئة وواثقة من نفسي مثل قبل…(وللعلم حتى أهلي
استحي اتكلم معاهم مثل قبل, مع أني كنت راديو البيت اللي ما يسكت)
ومشكووورات مقدما
في وداعة الرحمن
ليش يا أختي …لا ترخصين عمرج لأن النصيب ما ياج ، تقولين الحمد الله ما مشيت بالحرام " لكن شو تسمين إنج تكلمين ريال غريب راعي بيت ومعرس " خمس سنين…اختي الغالية ما أبغي أزيد همج ..بس أحس إن أنتي اللي بتزيدين همج هم ..فكري في زوجة الريال ..شو موقفها يوم يتغير عليها ريلها وهي تقول لنفسها كل لحظة " في شو قصرت وياه" ..
إذا عنده عذر شرعي علشان يتزوج على حرمته ..فالمفروض يخبرها ..وإذا وافقت ..فالمفروض يسير لأهلج ويدق بابهم بالحلال ..واللي الله كاتبنه يصير ..وأدعيلج من قلبي الله يصبرج وييسر أمرج ويفرج همج يا أختي..
ليش ترخصين بعمرج يا اختي وليش تاخذين معرس (مب عيب) بس شوفي الطريقه
بي يخطبج روحه ليش ؟ وكيف بتحسين بفرحة الخطبه
نصيحتي وقفي ها اللي انتي فيه وخذي موقف جاد معاه قوليله يبيج يخطبج شرات ما خطب حرمته
اوثانيا فكرتي في توابع انج بتكوني زوجه ثانية
وثالثا : انا وخواتي تزوجنا من دون ترتيب اصغرنا تزوجت قبل السالفة كلها نصيب
رابعا : ليش ما فكرت في خطابه من فريجكم ؟
وحاولي معاه انه ايي يتقدملج باسرع وقت ولايهمج حد يقولج هذا متزوج و غيره 
المشاركة الأصلية كتبت بواسطة بدوية غير 
آمين
آمين
آمين
آميــــــــــــــــــــــــــــــــن والله يرزقج الزوج الصالح عاجل غير آجل يارب ..