شحالكم خواتي ..
الغاليات اليوم بغيت صج صج اني افضفض لكم بهمومي وانقل لكم مشاعري الي ارهقتني ..
يا بنات ليش دايما احس ان التواصل بين الناس صار شبه معدوم ؟! ليش ماشي تواصل و ألفة نفس أول ؟! كل بيت بابه مسكر في ويه جيرانه وأي جيره هذي الي الجار مايعرف جاره فيها !! والله شي غريب والاغرب ان محد يبادر ويوح للثاني خلااااص كلن اغتنى بنفسه !
وين هذاك الزمان الي فيه متحابين ومتقاربين ! هذي تطبخ وتطرش حق جارتها وهدي تبي شوية ملح اطرش بنتها وشعرها المكشكش عشان تييب من الجيران فنيان ملح !
تعبت من الوحدة وشكل الحياة الي صار إلكتروني وممل وهادي سبحان الله كأن الحياة العصرية والنت والخربطان مافيهم بركة !! انا ما اقول انهم شغلات سلبية بس هالاشياء خلت التواصل صفر !!
كل الموضوع اني أحس بالوحدة بهالدنيا الي صارت كلها معاصي وتويتر وفيس بوك ولاب ونت وبلاك بيري وهالخرابيط الي اسمع عنها ؛ خاصة ان ماعندي جيران وربيعاتي كلن بحالها لاهية و طعم الحياة صار مختلف ماله ذاك الطعم الحلو الاولي 
السبب الاكبر للتغيير الي حصل هي المعاصي الي كثرت وخلت قلوب البشر قاسية ومحد منا صار يتحمل الثاني وكلن اغتنى بروحه بعيد عن اي حد !! والله مادري شو اقول بس بغيت افضفض لأن الحال متعبني وكل مافكرت وتذكرت حريم اول الحلوات الزينات لابسات البراقع الطيوبات أحن وأحس بخنقة تعور صدري وأحس بالدمعة تترقص بعيوني بس شو اسوي !! زمان اول راااااح !!
هيه والله ع قولت القايل : زمان أول غدا ذكرى وسوالف كان يامكان وياليت الزمان ثابت مثل ماهي أسامينا
السموحة الكلام يمكن مخربط لان افكاري متشتتة من الوحدة ويالسة اكتب من الايفون .. يا الله عسا الله يريح قلبج يانونو ماما ويحفظ لج كل غالي وتفرحين بجمعة احبابج ياااااارب
ولكم بالمثل خواتي .. دعواتكم جزاكم الله خير
الله يعينا شو نسوي!!
الناس صارت نفسياتهم خايسة
انتي تقدرين تخلين بنتج تسيرين الدكان شرات قبل؟
لا طبعا.. و السبب ممكن اي حد يزخها و يشلها
نحن الدكان يدام باب بيتنا بالضبط
يوم كنا صغار دومنا ارواحنا نسير
أحينه بنت اختي ما نخليها تعدي الباب إذا محد وياها
الواحد يخاف من وساوس الشيطان
ياما ناس نفوسهم ضعيفة شلوا يهال و سووا فيهم بلاوي
و تشوفين اللي ما يزورون مشاغلهم تمنعهم
قبل الدوامات قصيرة.. و كل واحد يرد البيت يريح
أحينه الدوامات طويلة و الواحد يرد البيت ماله خلق حق عمره
يعني الدنيا تغيرت و مب شرات قبل
وشو الي خلى هالناس تتغير غير ان العيشه والحياه تغيرت وتطورت .. ونفسيات الناس تغيرت وياها ..
تصدقين انا من نفسي من الي اشوفه ماقمت اتواصل ويا حد نفسيتي تغيرت اتجاه الناس باختصار " كافيه خيري وشري عن الناس"
والي حاز بخاطري حاليا .. من اخترعو هالبيبي " بلاك بيري" التواصل قل بيني وبين ربيعاتي فوني طول الوقت ساكت ههههههه ولا قمت ارمس وياهم حتى بالبيبي ..
يعني سبحان الله حتى يوم الناس تريد تساعد الناس تلاقين الف كلمة ويمنون على الواحد
صح مب كل الناس جي ولكن الحين الاغلب مايصبر على شي حتى على اهلهم
فاحسن شي اختي شوفي مصلحتك وين انتي مبدعة وفكري بحياتك وبعدي عن الناس
خلي الناس للخلقهم
بس الدنيا ماتخلوا من الخير
ولكن بعد عن تجربة التواصل الاجتماعي مطلوب بين الناس
لان الوحده مب زينه ابدا وممكن تسوي امراض الانسان في غنى عنها
فالواحد يحاول ضمن نطاق عائلته او دراسته او عمله يلافي له اصدقاء او زملاء يقضي الوقت معهم
وفي نفس الوقت ينشغل بنفسه