قصيدة عناقيد عنب للشاعر فهد الديحاني / إهداء للجميع 2024.

الحمد لله ربي الوهاب من فضله وهب
فيني من الشعر افخر الحكمة وصدق الموهبه
اللي رزقني يوم جعت اشهى عناقيد العنب
قافٍ رمى صدر الهموم ومات ذنبٍ يذنبه
ولو كانت دموعي تزيد النار وضلوعي حطب
لكنها خلتني ارقى للقصيد ومرقبه
وما دامت الدنيا قصب فالشعر سكر من قصب
يستخلصه من جرّب الهم وشقر عود قصبه
وانا ادري انه ما يشيلك يالصعب غير الصعب
ولا يفلّك يالحديد الا الحديد ومضربه
لو كانوا العذال واجد والغبن عرض وطلب
لكن عذولي واحمد الله ما تحقق مطلبه
والنهر عذب ولا دمر عذب النهر كفٍ خضب
ولاّ السلوقي لو نحاول ما عدل ميل ذنبه
اليا تغيّبنا تكلم وان تواجهنا عقب
كني من الناس عربيٍّ يتقي شر عربه
اليا رخاها فالدقن واليا رفعها فالشنب
وليا تركها تحرقه ما بين دقنه وشنبه
تبّت يداهم مثل ما تبت يدا ابي لهب
وانا عزايه فالربابه قوسها يوم اسحبه
والعاقل اللي لا عطوه نحاس يعطيهم ذهب
والعاقل اللي ما خلط خسارته في مكسبه
ياعاذلي والشعر نخلٍ عالي عذوقه رطب
وان كان ما تلحق عذوق النخل نعطيك رطبه
الشعر تاريخ الرجال وكل ديوان العرب
والشعر منه الحكمه وطب النفوس المتعبه
والشعر للسامع طرب واحلى مزامير الطرب
حتى الحمام اللي على غصن الموارق يطربه
خلا( رسول الله) يرمي بردته حزّة (كعب
ابن زهير) انشد قصيده والعفو جا يطلبه
والشعرفي هاك الزمن بالذات له حب وطنب
علاّ قبيله مرتبه وارخى قبيله مرتبه
علاّ من (انف الناقه) اللي ما يسوّى بالذنب
يوم( الحطيئه) قالها كلٍ تفاخر بنسبه