كيفية التعامل مع طفل الاول بعد ولادة الطفل الثاني 2024.

ارجو الموضوع ما يكون متكرر بس ابي تفاعلكم معاي في هذا الموضوع انا عندي بنت عمرها سنتين و 10 شهور و ولدي له شهرين من يبت الولد و هي تغير طباعها و قامت ما تسمع الكلام و لا تطيعني في شي وانا احس اني مقصرة معاها بس شو اسوي ما بايدي شي الولد مب من النوع الهادي و فديتها بنتي وايد كنت مرتاحة معاها في نومها و مرضها و في كل شي بس هذا الولد لا طول اليوم احس اني ما اقدر اخليه و بالليل نومه مب منتظم و بنتي تبيني العب معاها و انا ما اصدق ولدي ينام علشان اخلص شغل البيت و غير هذا موظفه و لازم استغل الفرص علشان اادي واجباتي بس بنتي غامضتني ما اعرف شو اسوي و كل ما وديتها بيت امي و بيتي تقعد تلعب بعدين تتضارب مع اليهال و انا اكره شي عندي حد يمد يده على بنتي مب من اليهال قصدي من الكبار علشان عيالهم و انا عيالهم لما يضربون بنتي طبعا ما اقدر اضربهم لان مبدئي ان الضرب بس للام و الاب مب كل من هب و دب ضرب فيهم حتى لو كانوا خالاتهم ولا عماتهم.

حاولت اني اسجلها في نادي او مركز تتلهى طول اليوم مع البنات بس ما لقيت لانها صغيرة و شي الثاني ان هية تلعب مع الاولاد لان كل الي في عمرها من اليهال في العائلة اولاد و ما شي بنات احس صارت عنيفة مثل الاولاد علشان جيزي ابيها تلعب مع البنات علشان تصير هادية، و سجلتها لسنة الياية تدخل الروضة بس باقي شهرين للين ما تفتح المدارس

اشياء كثيرة عندي اقولها بس اكتفي الحين و ابي اشوف آرائكم و تجاربكم بخصوص هالموضوع