.gif "12 (8)")
اخواتي شحالكن؟
حبايبي حبيت افضفض لكن بشي في خاطريه
مثل ما كتبت في مواضيعي السابقه انا مش معرسه بس اخواتي معرسات و وحده متطلقه و بعدها ما خلصت سوالف المحكمه يعني مش نهائي الطلاق بس ما شا الله ربعها كل وحده تقول لها عندي حد يدور عروس و من هالكلام
يعني ضامنه انها لو تطلقت بتتزوج
انا من اتكلم و اقول و لو حتى مزح اني اريد اتزوج يتحسبوني مستعيله (انا اكبر عنها بس نصيبها ياها قبلي)
انا راضيه بقسمة الله و نصيبه و اسوي الي اقدر عليه عشان ارضي ربي و امي
بس مرات احس اني مليت 
مرات احس ان محد يفهمني! واذا مزحت على طول يتحسبوني مستلغثه على العرس
ما بجذب عليكم كنت ناويه اكتب هالموضوع واقول اي وحده تريد عروس لاخوها او قريبها بعمر 28 وفوق بنتعرف على بعض و تجوف طبايعي
بس بعدين اخاف تفهموني غلط
لان البعض يفر كلام و يقول هاي تسوم عمرها! بس انا ما اسوم عمري.. الناس تتعارف يسولفون و يتناقشون و يرتاحون لبعض
انا دعيت و تصدقت و صليت و كل شي باقي اني اسعى في الموضوع
بس كيف اسعى وانا ما اظهر وايد و الناس ما تجوفني؟
و ها نفس حال ربيعتيه، هيه احلا مني ما بجذب عليكم و راعية بيت احسن مني و تستاهل النصيب قبلي بس بعد انا فخاطري اكوّن بيت و اييب عيال و اربيهم
يمكن هالموضوع يخلي البعض يحط فكره في بالهم عني و يمكن البعض يشفق عليه
انا ما اريد الشفقه و لا تقولون شلي الموضوع من بالج و لا تفكرين فيه
انا الموضوع مش في بالي 24 ساعه!! بس لازم مره في ليله غبرا افكر فيه .gif "12 (91)")
و ما انسى اخر شي اقول اني راضيه بقضاء رب العالمين بس ناويه اسعى زياده فالموضوع
لاني لو تميت منخشه في سربيه محد بيدري بي .gif "12 (50)")
ترا هالشي هب عيب و ب عيب الوحده تدور الستر و سند و زوج يصونها
و عياال حولها و هب عيب انها تسولف و حتى لو بالحلال لقت نصيبها بنفسها
لكن اهم شي بالحلال .. و فكره انج تسومين و تسوين لا تهمين بالغير ترا محد بيحس بيرحج
غيرج .. عللعموم احسني الظن ب ان رب العالمين كاتب لج احسن نصيب و احسن الرجال و اجمل الاطفال خلقا و خُلقا و فسيكون ما تتمنينه ب اذنه تعالى ..
ربي يفرح قلبج و نفرح بج عروس و ف مملكتج و تفائلي مفتاح كل كربه و هم التفاؤل ..
انا متفائله و من فتره حالمه حلم تفسيرها الزواج
بس مثل ما قلت تصيب الواحد فترة احباط
و الحمد لله صليت القيام الحين و دعيت ربي
بس اذا ما اقدر افضفض بالي في خاطري بين اخواتي وين بقدر؟
و نعم برب العالمين
خلي الحريم يشوفنج ..
ما فيها شي
دامج ادورين الستر و الاستقرار
مب غلط ابد
وانتي هالفتره غير انج تدعين ربج
استغليها اهتمي بنفسج اكثر
جسمج بشرتج شعرج
تعلمي الطبخ اكثر و امور البيت
هيئي نفسج من الحين لان ما تعلمين متى ايي النصيب
و هالاشيا بتخليج واثقه من نفسج
وحاولي تروحين عزايم و اعراس
ويمعات الحريم يلسي حتى لو شوي
واهتمي بمظهرج جدامهن ترا الحريم يحطن فبالهن لو مب حق الحين بس يوم تبا و الا وحده اتخبرها تقول شايفه فلانه يحافظ عليها فيها و فيها
تعرفين سوالف الحريم خخخخ
والله في بنات منخشات في حجرهن ما يطلعن للناس ويااااهن نصيبهن …
كلنا نفكر نفس تفكيرج انه لازم عشان نعرس نسعى بالزيارات وحفالات الاعراس ..
وطبعا مع الدعاء والنيه الصافيه والتوكل على الله …
شوفي حبوبه انا عادي والله اسولف جدام امي وخواتي بالسوالف ايب طاري العرس حتى مع الخدامات اقولهن تعلمن باجر انا بعرس منووه بيسوي لكن ومنو بيعلمكن ..والله والخدامات بعد يسولفن وياايه يقولن لي مدام قولي حق ماماه تدور لج رياال …هلكني ضحك بغبائهن خخخخخ …عاادي حبوبه بين اهلج محد بيقول لج شي مستلغثه او مستعيله …
والحلم الي فسرتيه خليه دااااااافع لج بالتفائل وابدي زهبي عمرج واهتمي بنفسج ودلعيها
والله يوفقج ويحقق لج الي في بالج …
ويرزقج من حيث لا تحتسبين
لا تياسين من رحمة الله
انا شراتج
ما كنت اضهر
حتى عمومتي ما اشوفهم الا فالمناسبات
واعراس وغيره ما كنت اسيرها
اللهم اعراس عيال عمي وخوالي
يعني المقربين وااايد
والحمدلله.. ربي رزقني
النصيب ما يخصه
شافوج الناس ولا لا
حريم اخواني نفسي مالهن فالطلعات ةغيره
عرفنا عنهن من ابوهن انه عنده بنات
وخطبناهن
كنت استغفر ربي ع طول بنية انه الله يرزقني
الريل الصالح .. وادعي فكل صلاة كل ما يقني ربي
وكنت اقيم الليل وادعي .. اطلع اللي فخاطري
مب بس عن الزواج ،، لا عن كل اللي خاطري فيه
والحمدلله صار النصيب واللي خذاني
ريال ما كنت اتوقع انه يصير بينا وبين اهله
نسب ،،، بس عرفوا انه ابويه عنده بنت
ويو واتقدموا ،،، حتى كانوا يتحروني اكبر
من ولدهم .. عقب الملجة عرفوا اني اصغر عنه
شوفي النصيب كيف !!
يعني حتى لو كنت اكبر عن الريال كان ربي
بيكتب لي النصيب وياه باذن ربج !
اسعي لرزقج بالدعاء ،، الاستغفار ،، ترى
صدقيني الاستغفار اجره عظيم وربج يفرج
به مب بس هم العازب ،، يفرج به كل شي
العيال ،، التوفيج فالدنيا والاخرة ،، اشيا واايده
لكن للاسف قله اللي يعرفون هالشي
او يوثقون به
خلي ثقتج بربج كبيرة
واحسني الضن به ،، وصدقيني ربج
ما بينسااج ،، ربج ما ينسى عبد
رجاه بقلب صادق
وصح .. شوفي اذا انتي اتسوين شي مب
زين ع طول وودريه .. مثلا تسمعين اغاني
اتاخرين صلاتج اي شي انتي عارفه
انج دوم تذنبين به وودريه ،، ^^
اخر شي اهديج هالمقطع
ما بياخذ منج الا دقايق
بيريحج واايد .. ^^
https://f.cl.ly/items/3I130O2K372Q3P3…%20YouTube.mp4
ربي يرزقج الريل الصالح اللي يفرحج ويعوضج ويسعدج دنيا واخره
^^