خلوني اخبركم قصتي …
تزوجت من ريال مطلق مواطن وانا مواطنه .. ورضيت فيه ورضيت ببناته ( 3 بنات ) 16 و 13 و11 سنة
ورضيت انهن يسكنن ويانا في ملحق خاص فيهن ويا امهن الملحق مكون من 5 غرف و4 حمامات اكرمكن الله ومطبخ ومأثث
من كل شي …
وريلي ريال والنعم فيه .. والكل يشهد بأخلاقه … وانا والله راضيه فيه
مشكلته انه مديون ومايبقى من راتبه غير 6700
يصرف منه عليي انا وعندي طفلين منه وعلى بناته والحمدلله امورنا ماشية .. نحاول نوفر الاساسيات والحمدلله …
المشكلة تفاجأنا بمطلقته ترفع عليه قضية نفقة وسكن غير هالسكن ( مع انه سكن يديد ماصارله 3 سنين من انبنى)
وتبا بترول حق سيارتها وخدامه …….. الخ
سار ريلي المحكمة وقدم كل اوراقة الثبوتية والرسمية وكشف حساب الراتب على انه مديون ومايبقى من راتبه غير 6700
المشكلة ان رد القاضي حكملها 6800 !!!!
كيف وانا وعيالي وهو من وين نصرف ؟؟؟
سار واستأنف فاكتشفنا ان هي مستأنفة قبلنا اونها تبا فوق 11 الف ونكرت انها عايشة في سكن وان الابو يصرف على البنات من يوم مطلقنها …
المهم استأنف وتاملنا خير … فأكتشفنا ان القاضي مصر على انه يدفعلها 6800 مع الخدامة وتوفير سكن
احس القاضي حتى ماجاف الاوراق الثبوتية اللي مقدمنها ريلي .. ولا عني بعمره يقراها او يلتفت لها …
انزين ياسيادة القاضي انت بجي حرمتني انا وعيالي من نفقة ريلي .. من وين يصرف علينا ..
وهو من وين يصرف على عمره وبترول سيارته ومصاريف الماي والكهربا للبيتين ؟؟
رب العالمين قال لايكلف الله نفسا الا وسعها ….
انزين حتى الخدامة حق شو ؟؟؟ البنات ماشاءالله كبار مافيها شي لو الوحدة غسلت كندورتها ولا نظفت غرفتها ولا غسلت صحنها
انا عندي يهال صغار وماعندي خدامة وانظف البيت واغسل واطبخ واكوي واسوي كل شي بروحي عسب ماكلف ع ريلي فوق طاقته..
والسكن طالبنا بلجنة من المحكمة تيي وتعاين السكن فرفض القاضي اونه مب من مسؤليات المحكمة …
المشكلة بعد اونه اذا مانفذ الحكم خلال شهر بينسجن … انزين انا وعيالي ووظيفته ؟؟
معقولة الوحدة حتى لو رضت انها تتزوج ريال متزوج او مطلق القانون يوقف ضدها ؟؟؟
شو هالعقلية ووين المنطق ؟؟
المشكلة اهل ريلي واقفين وياها اونه يعاقبونه ليش طلقها واخو ريلي هو اللي مساعدنها في رفع القضية على ريلي !!! وهو صارله
مطلقنها تقريبا 8 سنين وشوي…
وين حقوق الزوجة الثانية ؟؟ ووين حق عيالها ؟؟ انا راضية بريلي وراضية بحالته المادية لكن مب هاين عليي ينسجن والسبة
مطلقته … فشو الحل مادري
اختيه عليج بــ قيام الليل والدعاء والاستغفار
بصراحة شيء يقهر يمكن المحامي الي وكلتوه مب شاطر
الله يعينكم موقف صعب والله
اسأل الله ان يفرج همك
خلو حد كبيــر من العايلــة يتدخــل بينهم وينهي الموضوع !!
حرام جــي !!
الله يكون في عونج وينصركم عليهااا
وكلو محامي