شو رايكم في الولاده في مستشفى صقر في راك 2024.

بنات منو فيكم ربت في مستشفى صقر من جريب او اي حد من الي تعرفونهم؟؟؟…شو رايكم في غرفة الولادة؟؟…انا ربيت في بكري هناك في بداية 2024 صراحه تعبت وايد في الولادة خاصه اني ما كنت اربي على كرسي ولاده شرات باجي الحريم …تقولين شبرية عمليه متعبه بشكل فظيع…بالنسبة لنظام التخدير للجراحه استخدمو مخدر موضعي وكان ما يطول يخوز المفعول في دقايق فكنت احس بالابرة صراحه شي فظيع معقوله ما عندهم الاكسجين الي يخدر ولا لازم اطلبه؟؟ …ما عندي فكره اذا غيروا غرف الولاده او هو نفس الحال وانا خايفة اربي هناك واتعب نفس التعب…اذا وحده فيكن تعرف شي تفيدني الله يجزيها خير

صراحه ماعندي فكره ربيت عند اهلي بالمفرق ( بوظبي )

بس يلا نتريا ردود البنات الي ربن بصقر

والله يقومج بالسلامه حبيبتي

ربيعتي ربت في صقر لاكن شو تقول عن الخياطة الناس تفتك من الربى وترتاح بس المسكينه صرخت راخ أكثر عنالربى والله كل حين تذكر الموقف من يومين ذاكرتنه تقول : الخياطه كنت بموووووووووووووت منها كأنها قاعدة تخيط نفنوف ما كأني انسانه احس تقولهم يعور تحس بلإبره سارت السستر يابت مخدر موضعي ( الرش) مو إبره لا رش ويوم ترش الدكتورة عسب تخذر المكان تقول النيرس بس خلاص خلصتي العلبه كلها عشان مريضه وحدة فيه عندنا وايد مربيات وهذا غير السرير الضيق وغرف الولادة القريبه من انتضار الرجال الي يسمعون الصريخ لا عاد الغرفه غرفه النوم تقل حدث ولا حرج أرررررررررررف وتقول ان الدكاترة القبليين كلهم محد يايبين يداد ما يعرفون شي وهذا كله تقريبا من 5 شهور والله يسهل

انا بعد مانصحج اتربين فيه قبل كم سنه كان احسن بوايد لكن الحين صاروا مول مب شي من ناحية المعامله وغيره.. مثل ماقلتي غرفهم وايد ارف ومايخلون الوحده اصلا تولد الا وهي طايحه بالكامل (على قولتج شبرية عمليه وهذا غلط يعني مايخلون الوحده على راحتها مثل باجي المستشفيات) وبالنسبه للاشياء اللي تخفف الآلام مثل الاوكسجين او الابر ترا ماعندهم هالاشياء <<<<<<<< مادري متى بيطورون؟؟ يعني يخلون الوحده تموت بويعها
ومثل ماقالت الاخت اوتار الحنين الخياطة والله انها مايعرفون احس يخيطون اي كلام وسمعت عن وحده خاطوها بالغلط وردوا فتحوها وخاطوها مره ثانيه "الخياطة عندهم لعبه" وصحيح الكلام قبل الدكاتره والسسترات غير مب مثل الحين وفيه شي ثاني بعد بالنسبه لعناية البيبي بعد الولاده مايسوون شي غير يشيكون عالسريع يعني ماشي فحوصات دقيقه
مابغي اخوفج اكثر من جي يا أم راشد لكن هاذي الحقيقه واذا فيه امكانيه انج اتربين في مستشفى ثاني توكلي على الله احسن لج وللبيبي

هلا اختي ايقولج ولا ترموا بأيديكم الى التهلكة………..نصيحة نصيحة حتى لو فيج كحة لا تسيربن مستشفى صقر…عندج مستشفى خليفة في عيمان اقربلج جان تبين حكومي….سيري اي مكان الا مستشفى صقر…ما اعرف حتى ليش مسمينه مستشفى…و انا اقولج عن واقع تجارب صارت في نسايبنا

الصراحة لازم يسون مستشفى للولادة في راك لأنه الغرف مستشفى صقر قديمه وصغيرة

خواتي اسمحولي بس انتوا اتخفون الواحد الصراحة….مع انه وايييييييد حريم ايربون فيه وما سمعت شي من اللي انتوا اتقولونه بالمرة,,,وفيه دكاترة تولييييد وايد اوكيه,,وسافة الخيوط وغيره هاي اول مرة نسمعها…وبالنسبة للإخت اللي سألت,,الغالية سواء هم ساعدوج او لا ترا لابد من الألم فالنهاية..وهم مجرد وسيلة..يعني انتي بإيدج اترحين عمرج وياهم اولا ..والسموحة بس الواحد مايقول اي كلام بدون تجربة..وصراحة فيه مستشفيات واييييد فالإمارات اخس عن صقر..ومن منها مستشفى الوصل..وحدة من اهلي ربت اهناك وشافت الويل..والله ما كان فيه دكتورة فخلوا الستترات هم اللي يولدونها,,والناس اتقول مستشفى صقر ولا شي!!!!!!…والله اعلم