أولن بتعرفون من العنوان شو صار معايه
الله يسلمكم انا مسويه جيم في بيتي وماخليت جهاز ما اشتريته
واخر شي بشتغل على نوع واحد وبخلي الباقي واذ اتمرنت مااكمل نص ساعه واطلع من الجيم
ماعرف يمكن ياني احباط بعد مايتني الغده الدرقيه كله احس اني بتم متينه وحتى لو اذبح عمري بالرجيم ماينزل وزني بسهوله
المهم من فتره عزمت يارتيه وهيه فرنسيه (صوفي)
وزوجت صديق زوجي اسبانيه (بلين)
قالن يبن ايشوفن البيت
راويتهن البيت واتعشينا وبعدين رحنا صوب الجيم
طبعن دخلن وانصدمن
قاللي مجهزتنه احسن من النوادي
وشكلج ماتشتغلين فيه وايد
قلتلهم مشكلتيه ماحس بالمتعه
وبعدين مثل الاحباط يايني مااحس اني بضعف بسبب الغده
وهن كانن ايعرفن كيف كنت اهتم وكيف كان جسمي مودل على قولتهن
فاقترحن عليه اقتراح وعجبني وانشاء الله ببدا فيه من اليوم
بس طبعن اباكن كلكن تستفيدن
صوفي قالتلي عمرها مااشترت اجهزة رياضه بس طول عمرها ماشيه على تمارين البطن
اتسوي اول ماتنش (300) تمرين للبطن وفليل قبل لاترقد (300) تمرين
متبعتنه هيه على مدى الحياه <<<ما شاء ااالله روعه جسمها راوتني بطنها فيه مثل خط فالنص ومشدود
اما بلين قالتلي قفلي الجيم مدة 10 ايام بالضبط وابدي تمارين البطن يومياً
وبعد العشر ايام انخصص ساعه كلنا نحن الثلاثه نشتغل فالجيم عشان انشجع بعض
واذا صار يوم وماقدرن ايني يتصلبي تيلفون ويشجعني اني اروح اتمرن ويتأكدن بعد ساعه
وكلنا طبعن قروب فالبلاك بيري
وبيكتبلي شو ياكلن (كل وحده اتحط شو اتريقت وشو اتغدت وشو اتعشت )
بس صوفي قالتلي انها عمرها مااتعشت
بس الساعه 5 تاكل سلطه ودياي مشوي او سمك <<<هوه غدا وعشاء
وان شاء الله اكون فدتكم باللي قالولي اياه
بس احس لو اتحصلون حد مثلا ربيعتج ولا اختج اتسوون ساعه تتمرنون فيها رباعه بيكونممتاز انكم اتشجعون بعض
هذا رجيمي من عند الدكتوره لينا في بوظبي حبيت اشاركم اياه عشان اتعم الفايده
__________________________________________________
الفطور 2: كوب ماء + كوب حليب قليل الدسم
(ممكن مع قليل شاي او نسكافيه- ملعقة سكر او عسل صغيرة فقط في اليوم)
2 توست اسمر + شريحة جبنة قليلة الدسم او قطعة جبنة بيضاء او2 ملعقة لبنة
او بيضة مسلوقة او 3ملاعق فول او 2 شريحة Turkey + خضروات
بين الفطور والغداء : ماء ، حبة فاكهة من اللائحة ( عند الجوع – ممكن تفاحة )
او 1عصير جريب فروت + كوب شاي أخضر
الغداء :- يوم 1 – مشاوي (أي نوع – كمية حتى الشبع) او تونة بالماء + سلطة او تبولة
يوم2- سلطة او تبولة + شوربا (اي نوع – بدون لحوم)
ويكرر لمدة أسبوع
العصر :
حبة فاكهة من اللائحة + 3 حبات تمر + 2/1 كوب حليب قليل الدسم
(ممكن مع شاي او نسكافيه) او كوب لبن قليل الدسم (ممكن بالفواكه)
العشاء :
يوم 1- كوب حليب قليل الدسم + كوب كورن فليكس (خاص للريجيم) + موزة
يوم 2- 2 توست اسمر + 2 بيضة أومليت ( بالخضار ) أو مسلوقة
يوم 3- كوب سلطة لبن مع خيار قليل الدسم +2 توست اسمر
يوم 4- 2 توست اسمر + 2شريحة جبنة قليلة الدسم + خضروات (خس ، خيار – حسب الرغبة)
__________________________________________________
وان شاء الله توصلين للوزن اللي تبينه
يارييت عندي ربع شراتهم ..
كلما أتصل لحد من ربعي عسب اييوون وياي الجم ..
يحبطووني يقولولي انتي ما بسج ويين تبيين .. تختفين مثلا 
أو كل وحدة تتحجج أونها ماتروووم وظرروووف ومادري شوو ..
أقوولهم مب من شي من الكسل لااعب دووره عدل ..
الله يخلييهم لج ..
يبالي أدور وحدة اسمها صوفي والثانية بلين بالأول عقب بسوي طريقتج هع >> أسوولف حبووبه ^^
شكراً لمروركن الكريم
ماكي ربايعج عيازات بس على كل حال ابدي تمارين بطن ^_*
والله استانست احس اتشجعت شويه
تبين الصدق ربايعيه ايام الجامعه يوم شافني حسيت جنهن يترين انهن ايعلقن كلهن قالن ( متنتي) ماسألن شو فيج ولا ليش شو ياج مش بالعاده اتكونين جيه
بس حسيت في خواطرهن ايقوللي اني متينه ^_^
فاجازة الصييف شدييت حيلي وسرت الجم ..
أول مرة أضعف جي من 5 سنواات الصرااحة ..
نزلت11 في الصيف و ها من غير قبل نزلت 4 لاني باادية تقريبا من سنة أحييين ..
الكل انصدم ويسألني شو سوويييت ومن هالكلام الفااضي خخخ
المهم قبل العييد بيووم سرت الجمعية وي الوالدة ..
انجيين ..
وحدة يت صوبي تسالني انتي فلااانة ؟؟
أنا الصرااحة انصعقت ومن الصعقة ماروم أجاوبها .. فخاطري أقول منوهاي و كيف تعرف اسمي ؟؟
سألتني مرة ثاانية انتي فلاانة ؟؟
قلتلها هييه .. انتي منو ؟؟ جاان تضحك وتقول لي منوهي ..
ههههههههه جان تقووول ووالله ماعرفتج امي اللي قالت هاي ربيعتج بس أنا قلت لا مب هيي مستحييل هاي وحدة ثانية ..
معنه أمها شافتني بس مرة وحدة وتذكرتني ما شاء الله عليها ..
جان تقوول ضعفتي واااااااااايد شو سويتي .. و البارحة أرمسها بالمسن و بعدها مب مصدقة وتسألني شو السر عسب تساعد ريلها يضعف هع ..
ع سالفة تمارين البطن قطعت الصرااحة ما قمت أسوي ..
بس قبل كنت أسوي في الصيف كل يوم 300 (150 ع الجهاز و150 ع الشبرية لان ظهري كان يعورني وماروم أسوي ع الأرض )
بداية الصيف قياس خصري 32 و أحين 28.5 ^^
فأقولج اتشجعي و سوي و بتضعفين ان شاء الله وتصدمينهم شرات ماسويت هع
يالله أنا أول وحدة تشجعج ^^
انتي تميمعايه على الخط انتي اللي صدق ترفعين المعنويات
فديتج والله
خلاص عيل انا ببدل رجيمي لاني احس جسمي اتعود عليه وثبت
وببدا رجيم ثاني
لكن تمي معايه قوليلي شو اقدر اسوي عشان اضعف بسرعه
ابا نصايحكم
حتى لو اي شي بسيط