((( يا بخيلااااااااااااااات .. تشوفووون وما تردووون .؟؟ وبعدين تموا اسئلوا واتحلطموا تبون معلومات .. شو هالبخل على الاقل ارفعوا الموضوع عسب غيركم يستفيد .. وبعدين مع هالسلبية فيكم بنات .. احس اللي ما يردن أنانيااااااات بس يبن المصلحة حق عمارهم .. واللي تعبوا وكتبوا وصوروا وصغروا الصور ما يستاهلن حتى شكر .. عافانا الله ))))<<<< أنا معصبة
بما اني هالايام في اجازة .. وبعده موعد سفريه ما وصل فقلت احشركم واعوض المفقود عندكم وأنزل مواضيعي ..
اليوم برمس عن العناية بالعيون
وايد بنات ما يعرفن إن منطقة حوالين العيون هي مقياس الشباب في الانسان لأنها أول منطقة تتهدل وتبين عليها التجاعيد ف ويه الانسان
طبعا الاكل ما يحتاج اوصيكم عليه .. الجزر موب علشانه يقوي النظر لا بس علشان مركباته تحمي البشرة وتمدها بالاغذية المفقودة
شرب الماي ..
والقطور المرطبة
تبديل العدسات دايما للي يحبن العدسات
وطبعا نعطي العين ساعات راحة من العدسات كل 6 ساعات نفصخ العدسة وننظفها ونقعد بدونها ساعة وعقب نرد نلبسها ..
وفحص النظر بين فترة وفترة .. ولبس النظارة وعمليات الليزر لعلاج النظر
وعدم السهر .. وعلاج الجيوب الانفيه .. ولبس النظارات الشمسية ( تراها تخفف التجاعيد) .. وطبعا التخفيف من الكمبيوتر ..
يعني الامور المفروغ منها ما بهذرب وايد فيها
بتكلم عن عنايتي بعيوني ..
أول شيء مستحضراتي للعناية حول العيون
أول شيء الاقنعة اللي في المظاريف ..
الظرف الابيض …ماسك للعيون من نزيه .. قماش مبلل ينحط على العين .. أنا أحطه في الثلاجة فيكون منعش … أستعمله مرة في الاسبوع ..
الظرف الاحمر … فيه جل مجمد ينحط تحت العين .. يعني كمادة .. بعد أحطه في الثلاجة من ذا فيس شوب .. أستعمله قبل لا أحط مكياج المناسبات .. يخفف احتقان العين ويطلع عيوني صحية ونظرتي حلوة ..
المرهم الوردي .. كريم من خلاصة القمح من ماركة فاليدا الالمانية اييبه من المانيا واوصي عليه حلو ويعجبني .. أستعمله الصبح أحيانا ويوم يخطر في بالي أرطب محيط العين ..
العلبة بالغطا الاسود كريم العيون من بوبي براون .. وايد حلو وشفت مفعوله بسرعة … رهيب بس غالي .. هذا احطه الصبح .. ولأنه خفيف وايد ما يدهن اقدر احط فوقه مسحه من واقي الشمس .. ويخلي الميك اب حلو ..
وأخيرا العلبة العودة كريم العيون من كفر ديرم .. من الكريمات الحلوة اللي استعملتها .. احطه في الليل .. ترطيب عالي ونتيجته حلوة واقتصادي..
كمادات تحت العيون .. بالنسبة لي أفضل من مال ذا فيس شوب .. لأن مال ذا فيس شوب فيه قناع واحد وينباع بعشرين يمكن .. وهذا بوكس فيه حوالي 10 أو 12 ما اتذكر وسعره شوي أغلى ..
وأهم شيء هذا اييبه من برا وما ادري إذا موجود في الامارات والا لأ .. أشتريه بالكمية كل ما سافرت .. وأكيد احتفظ فيه بالثلاجة ..
أحطه الصبح أول ما انش واتم حاطتنه 10 دقايق يخفف احتقان النوم والهالات ..
هذا عاد منظف مكياج العيون اللي ما استغني عنه .. صح غالي بس بكل امانة الوحيد اللي فادني وما تحسست منه .. استعمله من سنتين .. وطبعا ما يعق الرموش ولا يحرق العيون ..
ماركة بايوديرما
….
وبالمناسبة بنات مكياج العيون له تكنيك خاص في الازالة عسبة ما تكون طريقة ازالة الميك اب سبب للتجاعيد
تحطين المحلول في قطنة وتحطينها على العين لمدة نص دقيقة ( حوالي 30 ثانية ) على الاقل بدون لا تفركين .. بس اضغطي بخفة على الجفن.. لأن ترك المحلول على العيون يحلل الميك اب ويسهل ازالته ..
بعدين امسحي بالطبطبة شوي شوي ..
علشان سؤال الغالية عن الرموش بقول ..
أنا رموشي كثيفة وطويلة بالوراثة .. فما احتاج لها عناية .. بس أنا أنصح بماسكرا لوريال اليديدة مال تطويل الرموشل اللي فيها طرفين واحد ابيض واسود .. وفيه معاها سيروم شفاف ..
بأمانة استعملتها وحسيت رموشي غلظن صار لي شهر استعملها وشفت رموشي غلظن وزاد طولهم طبيعي .. يعني حتى بدون ماسكرا تبين عيوني كحيلة ..
وأتمنى بنات تكونون استفدتوا .. وياليت محد ينقل الموضوع لأني بروحي بنقله لباقي المنتديات .. ارتاحن يا هاويات النقل ..
وآخر شيء دعواتكم يا حلواااات …
بس الكريم مال بوبي بروان يخوز الهالات صح؟
المشاركة الأصلية كتبت بواسطة أبحث عن ذاتي 
جاوبت على السؤال في الموضوع ..
المشاركة الأصلية كتبت بواسطة حزينة المساء بس الكريم مال بوبي بروان يخوز الهالات صح؟
صح يا عسل .. هو كريم للنهار ولما قبل الميك اب بس يصير تحطينه بالليل .. ويعطي نتيجة زينة تتلاحظ للهالات ..