مسااااكم الله بالخير حبوبات….
حابه أتكلم اليوم عن المدارس الحكوميه والخاصه بنفس الوقت…من حيث أسعارها وتعليمهم
يعني من حيث الإيجابيات والسلبيات…ورجااااءا يا حبوبات نبدي راينا بكل هدوء وبدون تجريح
يعني أول نقطه بتكلم عنها سبب وضع عيالنا للمدارس الخاصه….
طبعا وقبل كل شي أكيد اهتمامنا بالدين واللغه….بس سبب وضع بعض الأهالي اللعيال للمدارس الخاصه
مب سالفة انهم بيظهرون عباقره ولا علماء أو أنه موضه مثل ما يضن البعض..السبب يرجع لتجربة الأهالي نفسهم وخوفهم على مستقبل عيالهم…سألتو نفسكم كيف؟؟؟
يعني أول شي واقع حياتنا اللي نفرض عندنا أنه تكون اللغه الإنجليزيه بأكثر الدوائر بالمقام الأول
واللي انجليزيته ضعيفه شو يصير فيه في المقابلات والإمتحانات؟؟؟!! أكيد البعض عارف شو الرد
والتخمين فيه؟؟!!
ثاني شي أخبركم أنا عن نفسي؟؟!! وأعوذ بالله من كلمة أنا…بدون تكبر ولا غيره
على جيلي اللغه الإنجليزيه كنا ناخذها من الصف الرابع تخيلو بصف رابع ناخذ ABC
لين ما خلصنا الثانويه ودخلنا التقنيه…وكنا بأول أيامنا مب عارفين كيف نتصرف…كل وحده والله يعينها اللي تخرجت بمدرسه حكوميه وأساس الانجليزي ضعيف…تخرجنا من التقنيه والدوله ما قصرت
تقوينا بالإنجليزيه بس ما وصلنا لمرحلة التوب… يعني ما تقدرين تقارنين نفسج بين وحده لغتها من مدرسه أجنبيه بلغتج صح ولا؟؟!!!
صح فيه وايد خريجات طلعو عباقره من مدارس حكوميه أنا مب معترضه على هذا الشي بس البعض شو صار فيهم؟؟!!
والجيل اللي ورانا فرضو عليهم اللغه الانجليزيه من أول ابتدائي بس هل هو بمستوى المدرسه الخاصه الأجنبيه؟؟
صح فيه معاهد وفي كليات وجامعات…بس يضل التعليم والتأسيس من الأساس هو الصح!!!
وواقعنا هو اللي فرض الأهالي يهتمون باللغه قبل كل شي هو اللي فرض عليهم بكل مكان حاوالينا نعرف هاذي اللغه…بالحياه الوظيفيه و الدراسيه…
يعني في أهالي مدخلين عيالهم لخوفهم على مستقبل عيالهم من متطلبات الحياه…اللي مالهم ذنب فيها
ومثل ما الكل يعرف اللغه…هاذي أنا أحط عليها ألف خط وخط لأنه موال ما بنخلص منه
صح الدوله مب مقصره بالتعليم…وأنا ما أنكر هذا الشي كوني بنت البلاد…وكوني بنت اللبلاد
ومتأكده أنه في غيري مثل حالتي…تخرجو من كليات التقنيه…في منهم اللي توضفو وفي منهم اللي على حطة إيده…
يعني عن نفسي وتجربتي امتحنت بكذا قطاع حكومي وبعض من الخاص بس ما عيبهم مستواي باللغه وعلى أساس ما عندي خبره رفضوني…فأكيد وحده بمثل حالتي تبغي الأفضل لعيالها وبدور المدرسه الخاصه بس عشان اللغه…وعشان عيالها ما يمرون بنفس التجربه…وأنا على هذا الأساس أحس أنه الأسر قامت تحط عيالها بمدارس أجنبيه…مب على أساس عباقره ولا على أساس موضه…وبنفس الوقت ترا الإجابي والسلبي بالأثنين…سواء الخاص أو الحكومي…
بس المصيبه اللي في الخاص الدين واللغه الأم ما يهتمون فيها وايد…وهي الأساس بتربية الاطفال
هذا من وجهة نظري…واللي أنا أحس فيه
بس بإرادة رب العالمين نقدر نحاول بغرس القيم الطيبه
وطبعا عن الأسعار أنا أكيد ما أيدها المفروض يكون فيه حد للموضوع…بس هذا الشي حدث ولا حرج
يعني المفروض يكون التدخل من……….بين قوسين ( لا تعليق) عشان ما أدخل نفسي بمتاهات
اللي متمكن يقدر…واللي غير متمكن عوضه على الله
يعني حاولت أبين سبب وضع الاسر عيالهم بمدارس خاصه
وأتمنى رايي ما ضايق حد…
السمووووحه عالإطاله…
وأتمنى فعلا من الجميع إبداء رأيه والمشاركه بطريقه لطيفه مثل ما تعودنا من خواتنا
يسعد لي ساير اوقاتج ختيه بالجوري و الكادي
أنا شراتج بعد خريجة 95 يعني تعلمت الأنجليزي بالصف الرابع
بس و الله اني قدرت اثبت عمري على ايامنا ما كانوا مهتمين باللغة الأنجليزية
يعني مثلا اول وظيفة استلمتها بالHRلما امتحنوني يبت في المقابلة 85 و الأمتحان الكتابي 80
يعني مش بطال ….بس انا اسست بنتي من اللحين حطيتها بحضانه خاصة تدرس الانجليزي
عسب ما تمر بالي حنا مرينا فيه "" حنا قوم همتي دمتي "" يعني بنتي ما شاء الله عليها توها 3 سنوات
و حافظة شلاؤكله بالاضافة الى I love u you love me & و كذا نشيدة و حنا على ايامنا
قوم همتي دمتي ولا شو رايج ؟؟؟
انا طبعا دشيت معاهد لغة انجليزية عسب جي كنت اتوظف بسرعة و عندي اللحينه الانجليزي أوكي و لله
الحمد بس اتوقع بنتي هي الي راح تعلمني باجر خخخخ
بصراحة انا ابغي اؤسس بنتي من الصغر و تسلمين لي يالغلا على هالطرح و صدق
أنج ابدعتي في طرح موضوع مميز بارك الله فيج
والله يوفقلج بنتج ويخليها لج…وأتمنى أشوف مشاركات باقي الخوات
انا من يوم انا صغيره بديت مدرسه خاصه
و المربيه مالتي كانت اجنبيه و كله اتكلمني انقليزي
و احس انه احسن اتخرجة و بكل سهوله رحت ادرس برا
ما خذت لا لوغه ولا بطيخ و عن نفسي اذا عرست انشاالله >>>ادعولي
بدخل عيالي من يوم هم صغااار مدارس خاصه و بعلمهم اكثر من لغه بعد
و نفس ما قلتي مو الكل مدخل عياله الخاص للتباهي.
لو كنا احنا ما واجهنا صعوبات لما دخلنا الجامعه في اللغه بالذات ما كنا قررنا الشي هذا.
يعني كان وقتي كله يضيع في الترجمه مش بالدراسه. و كنت اشوف بنات غيري ماشاءالله عليهم بحكم انهم مدارس انجلزيه كانوا ماشين تبارك الرحمن لأنه عندهم اللغه مو مثلنا محتاجين يترجمون و يتعبون.
ومن يومها قررت اني ما اتعب عيالي و احطهم في مدارس انجليزيه علشان ما يمرون بالصعوبات هذي.
الله يحفظ عيالنا و يسهل امورهم يارب
والله يوفقكم ويخليكم لأهلكم