الوسم: الثالث

انا عندي وحدة ابي ادرسها اسمها my community للصف الثالث تتكلم عن اسماء المحلات والاماكن ووصف الاماكن وبغيت شويه افكار بس ما اعرف انتي تساعدين

هلا الغالية
ممكن تألفين قصة أو تاخذين أي قصة تتكلم عن شخصية ويفضل تكون محببة للأطفال وتقصيتها على الطالبات . ويشترط في القصة طبعا إنه الشخصية هذي تكون سارت الأماكن اللي تبين تشرحينها .. مثلا في وحدة اسمها …. وصحت من النوم وسارت المدرسة وكان عندها رحلة لمكان معين تحبين توضحينه أو تشرحينه ، وبعدين الشخصية رجعت البيت والعصر سارت المستشفى تزور حد مثلا وبعدين سارت السوق أو المكتبة او اي مكان تحددينه .. وطبعا توصفين كل الأماكن المقررة في المنهج ..
وبعدين تسإلين الطالبات إذا وحدة منهم سارت الأماكن اللي ذكرتيها في القصة .. وإذا حصلتي خليها توصف المكان اللي زارته أو موقف شافته .
وإذا كان من ضمن هالأماكن المستشفى ممكن تلتفتين على السبورة وتحطين قطعة كلينكس وتخلين غزج وارم ومثلي كأنج تتويعين من ألم أسنانج .. ومثلي كأنج مب عارفة شوتسوين واسإلي الطالبات ممكن يقولولج سيري المستشفى وادخلي في مواصفات المستشفى ..

أو ممكن تقوليلهم إنج بتسيرين المستشفى تزورين شخص معين .. وتكونين موزعة عليهم ورق مقوى وألوان وصمغ ومقص واطلبي منهم يصممولج بطاقة لزيارة مريض .

وممكن تطبعين صور للأماكن أبيض وأسود وتطلبين منهم يلونونهم في البيت إذا ماكان عندج وقت في الحصة وبيكون في جائزة لأحلى تلوين .

وكوسيلة ختامية :
ممكن ترسمين متاهة على قطعة بلاستيك أو نايلون عند أي خطاط انت صمميها على حسب الأماكن وعطيها الخطاط يكبرها أو إذا يعرف يصمم بعد ممكن .. بس ترا مب كل الخطاطين يفهمون . وبعد ماتشرحين الدرس سوي مسابقة بين طالبتين مثلاً وإنت اسإلي سؤال مثلاً .. إما تسإلين وين هالمكان وبسرعة الطالبتين يدخلن المتاهة ويدورن وطبعا تسوين في المتاهة مدخلين وكل وحدة تدخل من مدخل واللي توصل قبل تفوز .. أو أنج توصفين صفات أي مكان ومن خلال الصفات اللي شرحتيها قبل بمجرد ماتسمع الصفات تدخل المتاهة وتسير المكان اللي وصفتيه .

وأنا عندي شكل ممر وسويته لمسابقة المرور .. قسمت الطالبات لمجموعات وكل مجموعة جدامها ممر مقسم مربعات وفي مربعات فيها صور ومربعات فاضية . ترمي الطالبة الزهرة وتحرك السيارة أو أي شكل تحبينه وتتحرك على حسب الرقم اللي يابته وإذا وصلت لمكان فيه صورة تشرح الصورة .

طبعا مب لازم اتسوين كل هالأشياء إذا الوقت ماكفى ممكن تسوين بعضهم أو تقسمين الدرس لحصتين