أخواتي المحترمات عزيزاتي
هذا أول موضوع لي في المنتدى الجميل اللطيف
أتمنى أن تركزو على موضوعي كثيرا
حبيت أساعدكم عن طريق الكلمه المقنعه
مافتحت الموضوع لرفع المعنويات أو إحباطكم
فتحته لجل كل بنت تتخذ قرار في نفسها كيف
تتأقلم مع هذا الواقع إللي أكثركم يسميه
(تأخير في الزواج)·
أولا ليش قلت بالبدايه ماجيت أرفع معنوياتكم
السبب لأن الشخص أو البنت نفسها مهما إرتفعت
معنوياتها ترجع تحبط نفسها وهاذي حقيقه لايمكن
إنكارها [ عدل لو مو عدل بنات؟] عشان جذي
حطيت لكم عدة طرق لنسيان هاذي الفكره
إللي تشغل أكثر البنات وإللي تشوف نفسها فيها
بسرعه تباشر وتنفذ هالطريقه:
عزيزاتي الهم والفشل تجارب ودوافع لطريق النجاح
يعني مثلا مثلا :
الحين آنا ماعندي شي أسويه غير التفكير إللي
إييب أخطر الأمراض مابي أذكرها وأقعد أندب
حظي واقول ليش حظي جذي وقاعده بالبيت
جذي لاشغل ولا مشغله وانطر حبيب القلب إيني
لا يايبه هاذي الطريقه إتييب لج الصدعه
وتخلي فمخج ألف فكره وفكره وفكره توديج
وهم إييبج.
لا يايمه قومي فزي دوريلج وظيفه توظفي إلهي فيها
حتى لو منتي محتاجه وظيفه أنصحج تتوظفين
تخففين على نفسج الهم والتفكير ، النقطه الثانيه
خلي تفكيرج بصلاتج تابعيها قومي فزي أول ماتسمعين
الأذان وماكون أنا أمون إذا ماصار تفكيرج بعبادة الله
القرآن ثم القرآن ثم القرآن شفيعج قرآنج وعملج
عند الله ثالث شي إطلعي لما تحسين تبين تطلعين
بروحج أو رفيجاتج معاج روحي مطعم سينما تسوقي
أنصح بطلعات الصبح تريح الخاطر هذا غير إذا كنتي ملتزمه بصلاتج حتى وإنتي بره بتحاتين صلاتج وإنتي تتسوقين بتقولين أوه أذن وبتنطلقين إنطلاقه سريعيه
ههههههههههه يكون همج بس تبين تصلين وشوي شوي
ماراح يكون فبالج أي شي اللهم بس صلاتج عشان أبري ذمتي يابنات أكيد بتمر عليكم فتافيت التفكير لكن مو مثل
أول بل بيكون تفكيركم كله بأشياء أيضا لها قيمه
ومعنى كبير.
كذلك أيضا خلج مثل منتي تحبين في مظهرج خلج متوازنه بكل شي لا تضغطين على نفسج بالإضافه إلى
ضيفي لحياتج إضافات لها معنى ولها قيمه كبيره بحياتج
وأهميتها لاتقل عن أهمية الزواج بل هي في الأولويات كالصلاه والتمسك بكتاب الله في شي كبير راح يتغير للأحسن وفقط الصادقه مع نفسها ومع الله راح تفهم شنو هالأسباب إللي تعبت تفكيرها بعد ماتحس براحه كبيره
في الإلتزام بالعبادات الواجبه والمفروضه علينا.
شيء أخير عصفوراتي
إقرأو كتب مفيده للأسف عامة الشعوب الخليجيه بالأخص
لاتقرأ . القراءه حل من الحلول وتثقيف للنفس وأيضا عنصر فعال في صقل أساليب الحوار مع الآخرين وصقل للشخصيه بح
ذاتها . بالإضافه إلى أنها تسليه أيضا للقارئ ( إقرأو أي شي تحبونه بإستثناء الكتب إللي تزيد من حالتكم سوءا)
فمثلا الفتاة التي دائمة التفكير بالزواج تقتني الروايات العاطفيه أو قصص الحب ظنا منها أنها ستجد ضالتها في هذه الكتب ولاترى حالتها إلا تزداد سوءا هي كمن تبحث عن علاج وتناولت الدواء الخطأ وما إزدادت حالتها إلا سوءا.
باللهجه العاميه إبعدي عن الشر وغنيلو وخلج على كتب ثانيه كالكتب التاريخيه وبالأخص الحضارات القديمه إلى أن تحسي نفسك قويه وليس هنالك مايعكر صفوك عندها إقرأي أي شيء حتى الكتب والروايات العاطفيه بهدف التسليه.
يينا لآخر شي بعد خلاص ماكو شي غير هالكلمتين
لاتبوحي بهمك لأحد إنظري هنا>>>أبدا أبدا أبدا أبدا
لما أحد يقول الشكوى لغير الله مذله فهي فعلا فعلا
حقيقه يعني لاتبوحين بهمج ولا مشاكلج ولا بأسرارج لحد
هاذي لذه ومتعه في الصمود حتى في عز الألم وحصادها
إنج ارضيتي الله سبحانه وتعالى لأنه يبيج تشكين عنده
والواقع إن حل مشكلتج عنده لأن يانظر عيني محد عنده
ولا حد يقدر يحل مشاكلج.
فمنو القادر ؟
الله سبحانه وتعالى
منو حلال المشاكل؟
هو الله سبحانه وتعالى
شفتو شلون
ولهني آنا أكون إنتهيت
أتمنى تسامحوني لكتابتي بالعاميه ترى إستخدمت هذا الأسلوب من أجل أن أصل لقلوب الأخوات وعسى كلامي لامس قلوبهم
بوداعة الله
قال الله تعالى : " ان الله لا يغير ما بقوم حتى يغيرو ما بأنفسهم ".
يعني الي على معاصي يتركها عشان الله يستجيب للدعاء ويبدل الحال الى الأفضل ان شاء الله .