اشحالكم
-أول شي أعرف إنكم ما تقصرون أبداً ..صدق إنكم خوات ..ربي يعطيكم ألف عافيه ع نصايح إلي تقدمونه لبنات المنتدى ..عشان جذي ما ترددت إني أجا ليكم ..
– ثاني شي هاي مب مشكلتي ..هاي مشكلة اربيعتي
– ثالث شي ما أبي أي رد قاسي أو يجرح المشاعر ..لأنه اربيعتي بتشوف ردودكم
………………………..
اربيعتي إنسانه حبوبه و طيبه و حنونه وااايد .. يعني الكل يشهد ع طيبتها ..
أمها و أبوها مطلقين يعني من سنة تقريباً و أبوها متزوج من وحده آسيويه و عنده من إلي كان ماخذنها قبل بنت وطلقها و إلي ماخذنها الحين ولد وبنت و عنده من طلقيته المواطنه 4 عيال من بينهم اربيعتي..
اربيعتي من نوع تشارك في مدونة إنشادية … و ما عندها خرابيط يعني يمين ويسار .. المهم
شاركت في إحدى المنتديات الإنشادية و هي تسجل ترى فيه صوب تحطين في إيميل ومواقع وغيرها في ملف العضو .. المهم وهي تعبي البيانات في منتدى.. ما كانت تعرف إنه يظهر للباقي الأعضاء مثل إيميلها ..
بعدين ضافها واحد من المنتدى هو سعودي و منشد في فرقة إنشادية … استغربت من وين خذ إيميلها قال إنه من بروفايلها .. انصدمت وراحت شلته على طول لأنها ما كانت تعرف ..
المهم ظل هو يرمس وياها في المسن و هو كان إنسان مؤدب وفعلاً مؤدب ( لا تقول إنه يلعب عليها أو شي ) المهم كان من نوع يحب يسولف عن مسيرته و أناشيده .. بعدها قام يسولف عن إخوانه و خواته و عيال إخته … هي اربيعتي من نوع ما تحب تعترف لأي شخص غريب عن خصوصياتها يعني مثلاً إنه أمها وأبوها مطلقين .. أو إنهم ع قد حالهم … لا بالعكس صورت له إنهم أحسن ناس و أنهم قوم الفلاني وهي أصلاً من قوم ثاني … وصورت له إنه عندها إخت صغيره حبوبه و هي مب إختها هي تقرب لها … و هو واايد استانس ع الإخت الصغيره (وهي أصلاً مب إختها ) .. و صورت له إنه أخوها طيب ( وأخوها أصلاً واايد متعب أمها بسبب عدم المسؤولية) .. و صورت له إنه عندم فيلا ( وهم أصلاً عايشين في بيت شعبي ) .. وصورت له إنه أبوها طيب ( وأصلاً أبوها ياالله يسأل عنهم بس أبوهم قريب منهم مب بعيد يعني مب مقصر فيهم ) … انزين المهم …
هي قالت خلاص لازم تودره ( ماكنت تعرف إنه إلي ترمس مع شباب بالمسن بعد ما يجوز ) .. وهي بعدين غابت عنه حوالي شهر و هو قعد يطرش لها عبر رسايل الخاصه إنه وينها وليش غايبه طول هالوقت .. ورمسته عالمسن قالت له ظروف بس .. وهو كان واااايد مشتاق لها ..
اربيعتي كانت ترمسه بطريقه شخصيتها طبيعية بس كانت تقص عليه على سوالف إخوانها و أبوها و أمها .. ( لا تستغربون بس صح جذي صار )
المهم بعد فتره قام هو يحب يلمح إنه يحب الإماراتيين و إنه يتمنى ياخذ له وحده إماراتيه ..هي حاولت تقنعه إنه أحسن له ياخذ بنت بلاده … بس هو كان مصرر .. هي قالت له ع راحتك ..
لدرجه مثلاً لما كان بيخطبها واحد وقالت له كان يزعل و يتعب نفسياً و يبجي ( هي ما كانت تعرف ليش هو متضايق ..تقول بس لما قلت له جذي تقول تغيرت طريقة كلامه وياي .. بس بعد فتره سألها شو صار تقول رفضته لأنه مب أوكيه )..
هو قام يحب إنه يفضفض لها .. وهي تساعده و توقف وياه … ( هو لأنه يدرس في مكان بعيد عن أهله ) .. المهم صار له فتره يقول لها بخاطري أقولج شي بس متوتر .. المهم لين ما اعترف لها .. إنه وده يخطبها .. هي تفاجأت ما توقعت … ( هم قد بعض يعني عمرهم 19 سنة فرق بينهم 7 شهور ) .. حست إنها مب عارفه شو تقول له …
المهم بعدها فتره هي حاولت إنه تنسيه الموضوع ( يعني إنه ما إييب لها طاري الموضوع هذا ) .. بس هي لو غابت عنه لو 3 أيام أو أسبوع يقعد يعاتبها إنج ليش غايبه و وايد يشتاق لها( دايماً يقول لها ليكون حد خطبج) … بعدها بغى يشوف رايها بالموضوع لأنها ما جاوبته … هي قالت له ليش أنا .. قال لها ماشاء الله مستحيل أنسى إنج وقفتي معاي و إنج تعرفين متى أكون متضايق و إنج طيبه ماشاء الله عليج و إنج تسانديني وتعرفين شو أحب وما أحب وغيرها وغيرها ..
وهو بالعكس بعد ريال ونعم فيه ( لا تستغربون مني لكن اربيعتي قصت لي التفاصيل وهي اربيعتي رووح بالرووح ) … بس تقول صعب صعب إني أعترف له بكل شي ( قصدها سالفة أبوها و أمها و عن حالتهم المادية ) لأنه بعدين بياخذ فكره عنها … وهي من نوع صعب إنه تعترف للشخص …
المهم في رمضان آخر أسبوعين لين بعد العيد ما رمسته ع المسن .. وبعد نفس شي طرش لها رساله ع منتدى … بعدين كلمته ع مسن تقول إنها طاحت مريضه في العيد و إختها كانت في رمضان مريضه ( وهو واايد تضايق وخاف عليها لم عرف إنها مريضه ).. و هو قعد يمدحها ( لانه اربيعتي ما شاء الله عليها حنونه بس ما أعرف ليش قصت عليه بسوالف إنه عندها إخت ثانية بس صغيره و أصلاً لا وغيرها مع سوالف أبوها )
المهم هي بعد تعلقت فيه … وهي تبييييه وتتمناه .. وهو بيها ومتعلق فيها .. بس تقول المشكلة كبيره إنه هو عباله إنه عندها إخت الصغيره و متعلق فيها ( لانه هو يحب اليهال)
و إنهم عايشين بعز ( هي أبوها ما شاء الله عليه عنده بس ما عايش عندهم و أبوها معيش الزوجة الآسيويه في فيلا بإسمهم هم .. و هم عايشين مع أمهم في بيت شعبي ) .. فحس الريال السعودي إنها موافقه ( وهي موافقه بس تقول صعب يعرف كل شي ) .. فقال إنه مرتب كل شي بس باقي التنفيذ ( قصده إنه هي موافقه وهو يبيها بس إنه يتقدم لها رسمي ) وقال إنه يبي يكون الخطبة في تاريخ 10-10-2010م .. ( هي انصدمت .. حست الموضوع قام يصعب زياده .. وإنها لازم إتودره ) .. وقال إنه يبي يخلي الخطبة سنة لجدام ( لأنه ريال بعده ما تخرج و هي بتتخرج في شهر 12 عام 2024م و هو بعدها بسنة تقريباً ) وإنه يتم تحديد الملجة و العرس مع الأهل .. هي قالت له إنزين ما تحس إنه بعدك صغير .. هو قال لها لا بسوي مثل ما سوىأخوي وإنه أبوه يبيهم جذي .. قالت له ليش شو سوى .. قال لها إنه خله الخطبة سنة و عرس بعد ما تخرج على طول و إنه هو الحين متعين في شغل صار له شهر و إنه أبوهم مب مقصر أبدأ ( يعني تكاليف العرس كله على أبوه ) .. وكله يقول لها إنه أنا مستحيل أحصل وحده تفهمني و افهمها مثلج .. ويقعد يقول لها إنه صار لهم سنة مع بعض .. ويقول الحلو فيها إنه تحب تتفاهم بهدوء , إنه أبد ما صار بينهم خلاف ( اربيعتي من نوع مسالمه) .. ويقول لها إنه لنا ذكريات حلوه.. ( تقول كيف بأمن علي لما يعرف بالكذب إلي كذبته )
.. بس تقول هي اربيعتي غير إنه أمها شو بتقول و أبوها وأهلها ( خصيصاً إنه أهلها ما يحبون طبع السعوديين لأنهم ما خذين فكره إنهم متشددين و غيرها يعني .. وهي ما تحب إنه الريال يكون معتمد ع الأبو )
الرياااال يبي اربيعتي … يبيهاااا مرررررره بشكل ما تتخيلون كيف .. ووايد يتعب لو حد تقدم لها ..
والحين اربيعتي مب عارفه شو تسوي .. تقول والله عيب علي إنه كذبت ع ريال ياريتني ما كذبت .. تحس إنه ندمت إنها كلمته … ( تقول ما قد عمري حاولت إني ألعب في مشاعر إنسان ..لكني لعبت في مشاعره )
هي تراها عاارفه غلطها .. وصدقوووني ع مدح إلي مدحتها فيه صج وربي صج
ساااعدوها ولا تنسون رجاءً بدون ردود جاارحه.. هي لجأت لكم عشان تساعدونها
خواتي تراني أنا ما اقول إنه إلي تسويه إربيعتي صح .. بالعكس أنا نصحتها و خبرتها .. و إلي تسويه هي غلط في غلط … بس قلت لها خل أشوف لج عضوات المنتدى ما بقصرون يمكن لاني في سنها و لازم أشوف إلي أكبر مني
واذا يا عاش هني.. وين بيسكن؟ وين بيشتغل.. شو بيشتغل..منو بيشغله؟
يمكن هو حاط في باله انه بيعيش معاها في الفيلا وابوها الراهي بيشغله عنده؟!
خليها تصلي استخارة وتخبره كل شي عنها صدق..
مع اني اشوفها صغيرة وايد في العمر,, يعني عندها العمر كله..لاتستعجل في حياتها وتندم وتكرر عيشتها مع عيالها.. الوحدة تبى ريل تستقر معاه وتكون اسرة متوحدة مش زواج والسلام وعقب فترة تطلق؟!
لا تستعجل..
المشاركة الأصلية كتبت بواسطة zooz1 
واذا يا عاش هني.. وين بيسكن؟ وين بيشتغل.. شو بيشتغل..منو بيشغله؟
يمكن هو حاط في باله انه بيعيش معاها في الفيلا وابوها الراهي بيشغله عنده؟!
خليها تصلي استخارة وتخبره كل شي عنها صدق..
مع اني اشوفها صغيرة وايد في العمر,, يعني عندها العمر كله..لاتستعجل في حياتها وتندم وتكرر عيشتها مع عيالها.. الوحدة تبى ريل تستقر معاه وتكون اسرة متوحدة مش زواج والسلام وعقب فترة تطلق؟!
لا تستعجل..
هي تباه .. و هو ما يبيها عشان أبوها راهي ..لأنه أبوه بعد ما شاء الله عنده خير … بس هو ساعات يقول لها إنه وده إييه الإمارات يشتغل هني .. بس هي في نظرها تقول أروح معاه ..
صح كلامج إنها ما تستعيل
أول شي لازم اتسويه اتروح اتقول له كل شي وبحقيقته .
تمسكه وتقول جي جي جي وأنا كذبت عليك وهذا الصج وتودره جم يوم .
وبعد جيه اتشوفه كيف بيرد يتصل أو يتواصل وياها ولا لأ
إذا رجع وتكلم وسامحها تبدأ بالخطوة لثانية من الأسئلة المتعلقة فالزواج والسكن والعمل
وعقب جي تشاور أاهلها بالكلام اللي صار وياه هو وتفتح الموضوع وتشوف رد أهلها كيف
إذا مب موافقين أن مواطنة تاخذ سعودي أو لأسباب ثانية لازم اتفكر فيها البنت لأنها هي اللي بتعيشها وصعب
على كل الأهل وإن كانوا مب أهل حنونين أن بنتهم اتعيش بعيد عنهن وبديرة ثانية . لأن البنت لو صار ما صار لا سمح
الله شي من صوب ريلها وطلع شي ثاني منو بيوقف حذالها ؟
لو أنها بالبلاد وصار شي مع ريلها على الأقل بتمسك نفسها وعيالها وبتخطف بيت أهلها لكن فديرة ثانية منو بيسندها وبتروح عند منو ؟
حبيباتي هذا زواج ومسؤولية تفكير قبل لا يكون حب ووناسة لكم شهر بس
لازم تتبين الحقيقة للسعودي أول شي ومن ثم تشاور أهلها ومن ثم تستخير واللي الله كاتبه إذا كان لبعض الله بيوفقهم . وإذا حسيتي السالفة فيها مشاكل من البداية فابتعدي لأنه المشاكل والعواقب فالزواج دليل على أن الله مب اموفق لهالزواج .
بأنه إذا تقدم لي سعودي وطلب أنه يعيش فالدولة ويشتغل فيها فأنه يود بأخذ الجنسية أكثر من أنه مهتم بالزواج
نفسه . فالفكرة المنتشرة عندهم أن الريال لو تزوج امراة اماراتية ففرصة أن الحكومة تعطيه الجنسية .
فأنا ما أذم فالريال هذا ولا أعرف نيته لكن أقول لج النصيحة اللي تلقيتها من ابن بلده