دشيت اكتب معاناتي من بدت الدراسه
انا متزوجه وموظفه وادرس بعد وعندي طفلين واحد فالكيجي وواحد فالحضانه طبعا تعرفون ان من اسبوعين بدت الدراسه ،، ولدي راح الكيجي والحمدلله اموره تمام .. اما ولدي اللي فالحضانه الله يعينه
انا ادرس فالجامعه وعندي دوام الصبح اطلع من الساعه 7 الصبح وارجع 8 المسا يوميا ،، عيالي اشوفهم مره او ان كثرت مرتين لان مافي وقت اني اطلع من الدوام واروح البيت ،، الحمدلله ريلي دوامه يخلص من وقت ويرجع يجابل العيال ،، والسبب ان خدامتي مابغت تيلس وفالاخير شردت لاني رفضت اعطيها معاش 1500 واوافق على شروطها بعد
عمتي اقترحت بانها تعطيني الخدامه وتيلس مع العيال الين ايي ريلي ،، بصراحه انا ما ارتاح لخدامتها وثبتت شكوكي يوم الاربعا اللي طاف شفتها تصارخ فويه ولدي وتقرصه ،، طبعا بتقولون كيف عرفتي ؟ انا مركبه كميرات فبيتي فكل الزوايا .. طبعا من يومها وانا ماسمحتلها ادش البيت خير شر ونبهت عمتي ان تخلي العيال عندها بس للاسف هي حرمه كبيره وماتقدر فاضطريت كل يوم ارجع البيت واخذ ولدي واييبه معاي الدوام بعدين ابوه ايي يشله .. طبعا المسؤول ماعجبه الموضوع وقالي حلي هالاشكاليه خلال هالاسبوع
ربيعتي يزاها الله خير ماخذه اجازتها السنويه واقترحت تخلي ولدي عندها الين ما ادبر اموري .. اهلي منطقتهم بعيده بعدين الكل يشتغل ومايردون الا قريب العصر ، رحت لحضانه ولدي الصغير وقلتلهم بخلي ولدي اللي فالكيجي عندكم كل يوم ساعه ونص الين ما يخلص ابوه من الدوام ويشلهم ،، فقالت لي المديره نحن موافقين بس دفعي 1500 فالشهر من دون فلوس الاكل والمكان اللي بينام فيه .. طبعا انا رفضت
لان الحضانه سالفتها سالفه غيرو الاداره اللي فيها ويابو حريم مالهم دخل فشي اسمه حضانه ،، وساخه لابعد الحدود اول ما افتح باب الحضانه ريحه اكل ووسخ وغيره .. اليهال كلهم ياكلون من صحن واحد ومن نفس الملعقه ؟؟ وغبار ،، والزباله ما يطلعونها وغير هذا اكتشفت انهم ياخذون من الحليب اللي احطه لولدي ،، وغير اللبس اللي يختفي ويقولون لا نحن ماخذنا شي ؟ هذا غير نظافه الطفل نفسه لبسه من الصبح لحوالي الساعه 2 ما تبدل له ،، البامبرز ممزور ومب مغير له ،، ويهه اكل ووسخ ومش مغسل ،، ايام احصل فراس ولدي لصق ولميع و حلاوه ؟ حتى انا اليوم شاكه ان فولدي قمل من هالحضانه
كلمت حضانه ثانيه قالولي مافي شاغر والمشكله مافي الا حضانتين فنفس منطقتنا والباقيات بعيد عنا
ريلي قام يشتكي انه مايشوفني وعيالي بعد لاني لما ارجع القاهم نايمين
والويكند اخصصه للدراسه والبروجكتات وغير شغل الدوام .. بصراحه حاسه ان زوجي ماقام يتحملني .، كله يقولي انتي هالفتره مهملتنا انا وعيالج ومب مخصصه وقت لنا ،، المشكله ان كل يوم لازم اراجع وعقب ما اراجع اخلص شغل الدوام وما اخلص الا الساعه 1 وانش الساعه 5
بليز بنات ابا نصايحكم .. لاتقولون استقيلي لان اصلا ريلي هو اللي شجعني عالدوام وقال ها حق من حقوقج باجر لو صار شي بتكون عندج وظيفه تسندج .. ولا تقولون لاتدرسين لان هذا اخر كورس حقي
بليز ابا اعرف كيف اشتكي ع الحضانه يمكن يتعدل وضعهم شوي
وابا اعرف اللي يشتغلن وعندهن عيال فالكيجي او المدرسه وين يحطونهم لين يردون من الدوام؟
فما اعرف كيف تلبن تدرسين وتشتغلين و تهتمين في عيالج في وقت واحد
انتي مب سوبر ومن !!!
الحل يا تتنازلين عن دراستج او وظيفتج في الوقت الحالي
وصدقيني بتخسرين ريلج اذا تميتي جي ..
الله يوفقج ..
جربي مع الدوام خذي اجازه حتى لو بدون راتب بس هالفتره لين ماتخلص الدراسه
وصدقيني الشهاده مهمه فهالحياه مب بس لج حتى لعيالج وان شاء الله ايام وبتعدي وانتي بهدوء يلسي مع ريلج وحاولي تصبرينه .. صبرتو وايد والحين مابقى شي
والحضانه اشتكي عليهم لان حرام فالنهايه تدفعون فلوس عشان النظافه والاهتمام وتكونين مطمنه ان ولدج في ايد امينه
والله يسر امرج
لازم تعرفين ان هالشي في تضحيات وتقصير بالواجبات والمسؤوليات تجاه الزوج والابناء
كنت مثلج ادرس فقط درست تقريبا ست سنين وكل فصل ست مواد من الساعه 8 اخلص اربع او خمس العصر
ارد ادور الراحه والهدوء يادوب ابا ارتاح ولا اسوي واجباتي ومشاريعي وتحضير للدروس ما اتفيج لحد
الا اخر سنتين درست مسائي فـ كان ساعتين
فـ كيف لو تشتغلين بعد 
انا اللي ساعدني وهون عليه ان الحمدلله اهل ريلي بنفس البيت وايد فادني هالشي كانو مب مقصرين مع عيالي ابدااا
عمتي ربت عيالي صح كانت تتضايق مني وتعق رمسات مثل السم ونغزات لكن العيال تهتم بهم كبروعلى ايدها تأكلهم تلبسهم تنظفهم
وبناتها يهتمون بدراستهم وغيره للاسف انا انشغلت عنهم طافتني لحظات جميله مع عيالي وريلي بعد صبر وايد
ها احد الاسباب اللي خلتني احب اهل ريلي واتحملهم واستوي قريبه منهم
اذكر كانن وياي حريم يدرسن نفس حالتج موظفات مايردن البيت من الدوام ع طول للجامعه
يخلن العيال يا عند الريل ولا الاهل وخدامه ماشي غيرهم اما اللي عيالها كبار مرتاحه شوي وممكن عيالها يساعدونها
بس بعد تعب تخيلي تداومين الصبح ووراها جامعه وتردين تبين تخلصين الواجبات حليلهن اذكرهن كانن يسهرن في الليل لين ثلاث الفير يسون المشاريع
يادوب يرقدن شوي والصبح دوام والويكند بعد نفس حالتج بروجكتات وغيرها
لازم تعرفين الجهه المسؤوله عن الحضانات عشان تقدرين تشتكين اعتقد الشؤون الاجتماعيه هي المسؤوله وماسكة هالقطاع
و ضروري جداااااااا جدااا تتناقشين ويا ريلج قوليله يتحمل خلاص هذا اخر كورس وان شاءالله بتعدينه وبتعوضينه
لان مب سهل ع الحرمه تشتغل وتكمل دراستها بنفس الوقت بدون دعم ووقوف الزوج معاها
الريل يلعب دوم كبير في هالشي بالاضافه للعائله
انزين اذا في مجال العصر ريلج يودي العيال عند اهله ولا اهلج
وخليه هو يسجل في نادي رياضي او اي شي المهم ينشغل في شي يقضي وقته فيه
عشان مايكون تفكيره محصور فيج وانتي بعد في الاجازات والعيد ياي حاولي تعوضينه
وتظهرون رحلات خليي العيد قد ما تقدرين حقه وحق عيالج
زوري الاهل باول يوم العيد وعقب سيرو بوظبي دبي الشمال العين الخ
استغلي كل اجازه تعوضينه وحاولي تخلصين بروجكتاتج وواجباتج اول بـ اول عشان ماتتراكم وتنشغلين بالويكند كله عليهم
ربي يوفقج ويهدي ريلج ويخليكم لبعض