خيانات الزوجيه 2024.

سلام عليكم خواتي حبيت اطرح موضوع دوووم في بااالي اللي هي (خيانات الزوجيه) ونلاحظ الخيانات زوجيه بس في >>>> بلادنا <<<< ما اقول ماشي خيانات شي لكن مب شرات خيانات بلادنا اكيد في سبب وخص هالفتره صارت الخيانات والاغلب الزوج ايخوون زوجته ونادر ما الزوجه ا تخوون زوجها

بس موضوعي اللي بطرحه >>>>>>> خيانه الزوج لزوجته <<<<<<< نحن ما فكرنا ليش ؟!

كوني انا انثى واسمع الخيانات اللي اتصير بين زميلاتي وصديقاتي والبنات اللي في المنتدى اغلب مشاكلهن خيانه ازواجهن لهن

السبب وااااضح يا بناااات ……

الزوجه ما تهتم في نفسها ابدا وخص من اتييب اول ياهل اتقل الاهتمام وبطريقه ملحوظه امام زوجها وما تعطيه اي اهتمام وبس تهتم في اكله ومشربه وين سار وين رد وعقب تشتكي وتقول زوجي خاني مع وحده غيري >>>>>> سياره وصخه والكراسي متكسره وفيها خدوووش صاحب السياره بيداني يركبها لا دام عنده امكانيه لشراء سياره جديده بيشتري سياره كشخه عسب هو بيرتاح نفسيا في سواقتها <<<<<
سامحوني خواتي على هالمثل اللي ضربته بس عسب اتعيشون الواقع وتفكرون عدل ليش كثرت الخيانات الزوجيه

اهم شي الاهتمااام في الشكل >>>> ان الله جميل يحب الجماااال<<<<

بناااااااااااااااااااااااااااااات اهتموا في مظهركم عسب ما تشتكون من الخيانه وتندمن مستقبلا وكل واااحد ايفكر في راحته واتمنى الموضع به فائده

لا أختي مب كل الزوجات هاجه .. في وايدات امحافظات على نفسهم وزينتهن و املبقات أصابعهن

مثل الشموع عشان بس الريال ما يفكر انه يطالع برع .. بس والله فيه رياييل عيونهم فارغه .. ما تترس عينهم

إلا التراب .. والبعض الآخر ماشاء الله عليهم الله يكثر من أمثالهم .. بس قليلين للأسف ..

ولو الزوجه كانت مب مهتمه في شكلها مثل قبل .. وامقضيه وقتها ويا الياهل اليديد .. المفروض الزوج يراعي

هالشي .. مثل ما هو كان ماخذ اهتمامها قبل ( هذا وهو عود يفهم ويعرف يدبر أموره ) فالياهل له الأحقيه أنها

تهتم فيه لأنه لا حول له ولا قوة .. وإذا بيساعدها فأمور البيت .. هيه بتحصل الوقت إلي تتعدل وتتزين فيه حق ريلها

بس أغلبية الرياييل بشكل عام أنانيين ما يفكرون إلا بنفسهم .. يشوفون الحرمه تعبانه بين الياهل وبين امور البيت و الريل

وبعد مايراعونها ويتفهمون وضعها .. اهتمام الحرمه ببيتها وريلها وولدها .. يعادل دوامين للريل .. ( صباحي ومسائي)

الله يهدي كل الرياييل ويسخرهم لزوجاتهم .. ويعين الحريم على عيالهم ورياييلهم وبيتهم يارب

كلامج عين العقل ١٠٠٪ صح
بس تحملي تاخذينه عذر ترى الشيطان شاطر

صح انا معاج في هالشي …. بس اغلبيه لحريم ما يهتمن في اعمارهم مثل ما قلتي الاوليه حق الياهل بتنشغل عن ريلها لكن من تتعود ما تهتم في نفسها في هالفتره خلاص الحرمه بتاخذها عاده ما تهتم في نفسها …. وهالشي واااقع وانا اشوفه

صح أختي وايد تستوي هالسالفه .. بس مثل ما قلت لازم الريال يقدر الوضع إلي الحرمه فيه ..

عيل هي قبلت فيه بشكله بدون تعديل ولا تكشيخ .. ولا اتشوف شكله وهو متعدل إلا إذا كان طالع لربعه

بعد هي ليها نفس اتشوفه كاشخ حقها .. لا اتقولون انها وافقت على شكله من البداية .. لا خلنا انكون

عادلين ولا ننحاز لحد .. مثل ما هو يباها تتعدل وتتزين له .. هي بعد تباه ينتبه لشكله اشوي حقها .. وإذا اتغاضت عن

هالشي .. فهذا بسبب أنها تبا اتقولها انه لازم يتغاضى اشوي عن شكلها بحكم وضعها اليديد ..

مليت من سوالف الخيانه من كثر ما اسمع شكاوى الحريم صديقاتى ومن اهلى وفى المنتدى وحتى يوم اسير اى مكان كل ما اشوف واحد مواطن وياه وحده من الجنسيات الى انعرفها ؟ كل اشك فيهم سواء فى مطعم او فندق واقول اكيد هالريال يخون زوجته وانظرله نظرة احتقار وازدراء واحيانا اشوف حرمته جميله واتكون وياه واشوى تغفل عنه ولا هو يبقق اعيونه فى الحريم الثانيات ,,,,,,,,,,الصراحه قلة الوازع الدينى والمنكر الى يسوونه الحريم من كل الجنسيات حتى بعض المواطنات والتبرج الزايد وعدم الحياء هو السبب فى الخيانات والحريم الى يرخصن اعمارهن للريياييل والله المستعان

الله المستعان

الخيانات الزوجيه ناتجه من قلة الدين

لان الخيانه مصيرهاا طريق واحد وهو الزنا

ومعروف انه من الكبائر

الله يحفظنا ويحفظ عباده الصالحين