سؤال عن ابرة الظهر – المجربات فقط 2024.

السلام عليكم ..

اخواتي المجربات لابرة الظهر للولادة الطبيعية .. ياليت تفيدوني بتجاربكم .. هذي ولادتي الثانية أسأل الله ان يرزقني الطفل السليم المعافى آمين ..

قررت آخذ ابرة الظهر و طبعا قراري للحين مب نهائي .. انا دشيت التاسع اليوم تقريبا ..

حابة اعرف عنها من خلال بعض الاسئلة و اللي عندها زود ياليت تفيدني ..

– هل تحسون بألم وقت اعطاء الابرة؟
– ألم الطلق يختفي نهائيا بعد ضرب الابرة و إلا تخفيف فقط؟
– هل تحسون بأن وقت الدفع بدأ؟
– هل يكون عندكم مقدرة على الدفع خصوصا عند خروج الرأس؟
– أي مضاعفات صارت لكم او للبيبي لا سمح الله بسبب أخذ الابرة؟

ياليت تتفاعلون مع الموضوع خواتي و أكون لكم شاكرة ..

انا مثلج حاطة فبالي اخذها هالولادة
طبعا بعد الاستخارة >> الاستشارة
ننتظر راي المجربات

انا ماخذه ابرة الظهر في بجري .. على حسب الجرعة اللي يعطونها لج .. انا مووووووول ما حسيت بالطلق ولا حسيت اني بدفع الا لما الممرضات قالو لي لما نقولج ادفعي ادفعي ..وكنت اسوي مثل ما يقولون .. وفالاخير قصتني الدكتوره قص كبييير لدرجة اني تميت شهور لين التام وريلي ما كان يقرب مني فهالشهور طبعا .. يمكن اربع شهور ماذكر .. هم خففو عني البنج وقت الدفع عشان احس وادفع بس ما بديت احس الا يوم طلعت المشيمه وجي .. يعني عقب … بس صدق ماحسيت بالالم حتى بعد الولاده ما حسيت بالالام والتعب كنت كله اناام ماقدر ابطل عيوني خخخخ .. حتى ولدي كان متخدر اول يومين كل نايم وما يرظع ويحاولون وياه الممرضات وامي وخوفوني قالو شفيه ما يعرف يمص محد انتبه انه خدران من الابره .. عقب هاليومين صار يرظع طبيعي جدا.. بالنسبه لظهري يوم كنت ابدل حق ولدي بعض الاحيان وانا قاعده عالشبريه والف ظهري عشان اواجهه كنت احس بشعور غريب كان ظهري ينجسم وشوية عوار ومع الوقت زاد العوار وايد بس ما خبرت حد لان الكل كان يلومني عابرة الظهر .. عانيت بصمت لول

مولودي الثاني ماخذت ابرة الظهر عشان خايفه على ظهري وعشان ما انقص من تحت وايد.. لكن حسيت بالتعب اللي بعد الولاده .. والحمد لله عكل حال
وهاي قصتي بس مب كل حد خذا الابره عوره ظهره

انا للأسف ما ربيت طبيعي تميت فالمستشفى يوم بليله وكنت بموت من أوجاع الطلق…وعقب فحص الدكتوره قالت لي اني ما اقدر اربي طبيعي!وكنت ما اقدر اتنفس خلاص ماشي اكسجين..ووقع ريلي على العمليه وحليله وهوه يصيح من خوفه عليه.وظربوني ابره البنج النصفي فالظهر هيه مثل الابره العاديه بس انا كنت خلاص بموت بس عقبها وكأن الطلق كان كذب وطلع مني ماي الجنين وانا فالعمليات بس كملوا العمليه..وحاولت مع بنتي (حملي الثاني )اني اربي طبيعي بس مثل الطلق والعمليه اللي قبل طبق الاصل..ما قدرت والدكتوره ما اداني اشوف رقعة ويها نازعتها وانا اطلق

سبحان الله يوم تكون الولاده قيصريه لا حول و لا قوة بس يوم تكون طبيعية الوحده تخاف و تفكر اذا تسوي الابرة او لا .. اخاف اعرض الجنين لمخاطر بسبب الابرة مع اني سويت سيرج و من الاشياء اللي ممكن تستوي
فيي حال ما قدرت الوحده تدفع انهم يستخدمون. الجفت) اللي يشفطون فيها الياهل ببس ما قريت انه
فيها ضرر …

هل تريد راحة البال"وانشراح الصدر وسكينة النفس وطمأنينة القلب والمتاع الحسن ؟
عليك بالاستغفار: {اسْتَغْفِرُوا رَبَّكُمْ ثُمَّ تُوبُوا إِلَيْهِ يُمَتِّعْكُمْ مَتَاعاً }