كيف الحال
اخيرآ رديت لكم وادري اني رديت متاخر لاكن شنسوي نفاس وبعدين رمضاان
اليوم قررت اخبركم قصة ولادتي واكتب كل التفاصيل وافتح الباب للاسئلة والاستسفارات
اول شي احمد الله حمدآ كثير ع النعمة الي رزقني فيها وعلى تمام الصحة والعافية
ثانيا اشكر كل اخت دعتلي وتواصلت معاي وهونت علي وابشر الاخوات الي طلبو مني ادعيلهم اني والله العظيم ذكرتهم ودعيتلهم ومابقول اساميهم عشان تظل دعوة بظهر الغيب والله يرزق الجميع
يوم 10_7 كان الموعد الي عاطيني اياه في المستشفى للولادة
بس ماوصلت هاليوم الا وانا فاقدة الامل لاني كنت احس اني بربي قبل وكل مايعدي يوم افقد الامل لدرجة اني توقعت اني بتم طول العمر حامل هع هع
في اليوم المحدد تميت سهرانة للظهر ونمت وقمت المغرب اول مافتحت عيني قلت ياااااااااااااااارب ينزل علي الماي الحين واربي وانا كنت ابي الماي ينزل لانه يقولون الولادة بعده ماتطول
والله العظيم توني بقوم من فراشي الا واحس شي حاااااار ينزل بين رجولي
دقيت على زوجي وقلتله تعال بعدين قلتله اش رايك ننتظر قالي لا بنروح نتطمن
نزل علي ماي وكان فيه نفس القطعة نفس قطعة الشحم الابيض الي تكون في الذبايح وكبرها تقريبآ نفس حبة اللقيمات لاكن رخوه طبعآ ولونها ابيض
بعدين تسبحت ونزلت وبدا ينزل علي ماي مخلوط بدم
وسرت المستشفى اول مادخلت عطوني اغير لبسي واللبس فوطة جديدة وشبكو فيني جهاز النبض والطلق وتميت يمكن ساعة وكان مافيني الم
وهاذا جهاز قياس الطلق ونبض البيبي
نازلة منه اسلاك في نهايتها نفس السماعتين مدورة يحطونها ع البطن ويربطونها بحزام
بعدين جات الدكتورة وكشفت ^_^
الكشف يابنااااااااااااااات والله العظيم مو زي مالكل يصوره هو مومولم هو مقزز الالم يجي من الرفض لهاذا الشي انه تحسين حد بيدخل ايده
هي تدخل ايدها ملياااااااانة جل لدرجة بس تسمعين اصوات فقاقيع ^_^
سرير الولادة
بعدين قالتلي مفتوح بس 1 سم والراس بعيد واكبر من الحوض اول شي انا تحطمت لانه بس واحد هم يقولون عقب الماي يكون 3 بعدين قلتلها مدام الراس اكبر من الحوض يعني عملية قالت ايه بس يمكن مع الطلق يتوسع شوي ويدخل في الحوض
المهم قالت انتظري لصبح لو ماجا طلق طبيعي بنسوي صناعي وبنشوف لو ماربيتي بنسوي عملية
وتميت طول الليل افكر اقول شكلي بقول سوو عملية على طول بدل مايتعبوني وبعدين اقول اخاف اجني على نفسي مع العلم اني من زماااااااان مقتنعة بالعملية واحسها افضل واحسسن لاكن كل مااقول لحد يحسسني انها موت ويقولي استغفري ولاتقولين عملية الله لايقوله خوفوني
المهم نزلت الصبح مع اني طول الليل امشي في الممرات قاست الرحم وقالتلي بعده 1سم وانا زاد التحطيم شبكت الطلق الصناعي وانا كنت مطمنة قلت يوم يزيد العوار باخذ ابرة الظهر لاني طالبتها والخايسة الممرضة اول ماجيت عندهم قالتلي ترى ابره الظهر مو على ثقة كاش قلتلها اوكي ثاني يوم وقت الطلق الصناعي يوم حسيت بالعوار قلتلها عطيني ابرة الظهر قالت الدكتور الي يعطي الابرة في اجازة
وانقهررررررت قلت ليش ماخبرتيني من امس كان رحت مستشفى ثاني
المهم تميت يمكن 5 ساعات ويزيد فيني الطلق وكشفو قالو بعد 1 سم وتميت لين اخرر شي كشفت وحدة قالت صار 3 بس الراس بعيد
في نفس الوقت كانت الغرفة الي جمبي فيها سوادنية تربي وجات وتصيح وبسرعة ماشاءالله فتح الرحم وتمت تدفع يمكن ساعة ونص وماربت وفي الاخير دخلوها العمليات عاد انا تعقدت قلت اخاف بعد مايقطعوني ويلعبون فيني يدخلوني العمليات احسن اروح من الحين
بعدين هم قالولي بننتظر ساعتين لو مافتح الرحم بنسوي عملية قلت لادخيلكم الحين مو ناقصة يصيرلي نفس الحرمة وعلى فكرة الطلق كان فيه الم بس اقسم بالله اني الحين مااتذكر كيف كان كنت اتمنى اوصفه لكم لاكن والله العظيم موقادرة اتذكره سبحان الله تعب منسي
المهم وقع زوجي ع العمليةوبعدين سوولي القسطرة وهي ماتالم تدخل بيب في فتحة البول وبعدها كلمت امي وجات ورفضت ادخل عمليات بس اصريت ودخلت
وكاااااااان احلى قرار اتخذته
مجرد مادخلت اعطوني البنج حسيت برااااااااااااااحة وتميت اسولف مع الممرض وكلها يمكن عشر دقايق واسمع النونو يصيح انا كنت اتوقع بعدهم يجهزوني الصراحة نزلت دموعي ماتخيلت بهالسرعة وبدون تعب وشالوها قدامي وانا اطالعها وهم ينظفونها وجابوها عندي وبستها وشوي قالو حمدالله ع السلامة خلصنا انا فرحت مااشاءالله العملية سهلة وممتعة ^_* خخخ
مابعد غرفة العمليات
طبعآ نزلت فرحانة واتكلم واسولف ابغى امي تطمن اني بخير
وبعدين الكل يتصلل علي ويسلم وانا اسولف وجابو النونو وتمينا نصورها الين المغرب بديت احس باانتفاااخ واحس باارهاق مرررة وشوي شوي بدا البنج يفك مني
وبديت احس بمكان العملية يالم
ثاني يوم كان الاصعب نزلو مني قسطرة البول وقالو قومي اول ماقمت حسيت اني بموت من الوجع تميت واقفة قلت خلاص بتمي واقفة مابمشي ولابجلس ولا شي بتمي كذا العمر كله خخخ
بعدين قالت خطوه خطوة والله هي شلت رجولي وتمشيها لاكن سبحاااااااان الله مع كل خطوة امشيها احس بيسر وسهولة اكثر لين الله يكرمكم وصلت الحمام وغسلت وغيرت ملابسي ورديت
في الليل قمت مرة ثانية
وطبعآ تحتاجين مساعدة يوم بتنسدحين او تقومين اليوم الثالث قمت بروحي صح بمعاناة بس قمت
وطلعت في نفس اليوم
مستشفى النور
1- انا حسيت انهم ماديين ويمكن العملية سووها لي لربح مادي مع اني انا كنت ابغى عملية مو هم اصروا لاني ربيت انا و6 حريم 4 منهم عملية
2_ نظاااااافة زيرو مفرش السرير 4 ايام انا في المستشفى محد بدله مع ان الغرفة خاصة والارضية حق الحمام وانتو بكرامة زبااااااااااااالة سوداااااااااا والزوايا وسسسسسسسسسخة
والحمام مافيه شي غير الكلينكس الي دايما علبته فاضية والصابون
هاذي صورة الغرفة
3- الاكل فقييييير جدأ الفطور بيضة ومربى وماي ساخن وشاي ليبتون وعلبة حلييب صغيرة وحبتين توست
والغدا واحد حليب وطبق رز مع نوع لحوم وخضار في نفس الطبق كلهم وموزة يوميأ خخخ
4_ الممرضات وهاذا الشي الايجابي الوحيد انهم مساكين خدوووووومين ويسون كل شي ويساعدون واااايد مع انه فيه وحدة ماحبيتها تتكلم من خشمها بس البقية مرة حبوبييييين
5_ لبس الببيبي ومستلزمات لازم انتي تجيبينها لدرجة كنت اقولهم تعالو غيرو حفايظ البيبي او هاتو حفايظ يجيبون بس حبة وكلينكس بعدين انا طلبت لبنتي وصرت اخليهم ياخذون من حقي
6_ الدكتورة كانت ناظرة كانت في المراجععة اوكي وفي الولادة مع اني ماسولفت واجد ويااها بس المستشفى في المراجعات لايعلى عليها تاخذين وقتج وحقج وكل شي
وانا في البداية اراجع كنت عند سميرة
العملية القيصررية سلبياتها وايجابياتها السلبيات :
اليوم الاول العجر التام عن الحركة
اليوم الثاني حركة خفيفة لاكن موولمة واليوم الثالث اخف واحسن واليوم الرابع احسن الين اسبوع وتصيرين تمشين وتجلسين عاااادي الين شهر وتصير المشية جدآ طبيعية ومافي اي انحناء
2_ تحسين ماتقدرين تخدمين طفلج بسهولة اول الايام ماتقدرين تلفين تاخذينه من سريره لازم حد يعطيج حتى الرضاعة الطبيعي ماتحسين تقدرين تنحنين بسهولة وتتحركين بسهولة بس انا استخدمت الشفاطة الكهربائية وخدمتني جدآآآ
3_ تحسين مافي شي ينزل منج يبرد القلب خخخ كئنه ماي بس وسخ يامايل للحمار او البني وممكن الكيرفري يفي بالغرض
4_ طبعآ الامور المعروفة عن العملية انه تتمين فترة طويلة ماتشلين ثقيل وماتحملين الا بعد 6 شهور وغيره
الايجابيات
1_ ولادة ممتتتتتتتتتتتتتتتتتتتتتتتتتتتتتتتتتتتتتعة تدخلين وانتي هادية ومروقة لغرفة العمليات ومستعدة نفسيآ وخصوصآ لو من البداية كنتي عارفة انك بتربين عملية تتزهبين من البيت ومن اول الحمل
امتع مافيها تشوفين الياهل يوم يطلع وانتي واعية ومرتاااااحة وتراقبينه وتشوفينه وهم ينظفونه لين يطلعونه من عندك
2_ معاد تشيلين هم الخياطة الطبيعية ومشاكل الولادة الطبيعية الي هو دخول هواء وتوسع والتنقع في موية وملح وغيره
3_ تنامين وانتي مرتاحة يوم تنوين العملية لانك تكونين عارفة الموعد المحدد لها هاذا في حال الخوات الي من قبل عارفين انهم بيربون عملية اما انا كنت كل يوم كوابيس كل يوم اقول يمكن اليوم اربي والعملية مافيها اي شي مخيف ولا شد شعر ولا صياح ولاغيره
4_ العملية اثناء الجراحة ماتحسين بشي وبعدها صح فيه الم بس برضه فيه مسكنات اما الطبيعي الم في الولادة وبعد الولادة لاكن فترة قصيرة وترتاحين
المهم وصلت للاخير
الولادة تعب منسي وفرحة دائمة مهما تعبتي ماتذكرين ولا شي تنسين الحمل والوحام والولادة وكل شي
الي خايفين من الولادة احب اطمنكم والله العظيم مافي شي يستحق الخوف
الولادة الطبيعية فيها الم لاكن محتمل ومجرد مايوقف تنسييييين كل شي اسئلوني والعملية الم عادي نفس اي جراحة بس ماتحسين فيه لانه تحسين انها عملية تستاهل جبتي فيها نور عينك مو خرجتي دودة زايدة خخخ
حبيت احطلكم اخر صور لاكن كانت في البيت يوم سابع بنتي فديتها اتمنى منكم دعوة حلوة والي عندها اي سؤال حاضرة
ملاحظة < للاخوات الي سئلو اي مستشفى اقولهم النور العين وبالنسبة للغرف فيه نوعين الي تكون عبارة عن غرفة كبيرة بسريرين وفيه الي تكون غرفتين بس ماشفتها لانه يوم ربيت خبروني انهم بيطلعوني بعد بكرة
تتربى ف عزج ان شاءالله
ماخبرتينا شو سميتيها ؟! >> شو يخصج ههههه
انا ربيت طبيعي اول مره
وثاني مره قيصري
والله لو اموت مابعيد القيصري اسبوع مااقدر امشي والم يدووم شهر
وخياطه ومكان الخياااطه يحك واااااايد وكون متنمل واحسه من الداخل يحك شعور غريب
الولاده الطبيعيه نفس اليوم الم وخلاص
سوارة ترى التجاوب مع العملية يختلف من وحدة لوحدة
طبعآ العملية القيصرية معروف انه كل ماتحركتي اكثر ومشيتي اكثر كل ماخفيتي اسرع وتماثلتي لشفاء وعلى فكرة انا ولدت ببنج نصفي وكان مافي خياطة ليزر عشان كذا الحمدلله كان المي اخف ومااحتجت ارجع المستشفى عشان يفكون الخياطة بس الحمدلله مااعاني من الحكة بس احس المكان يعرق
من وين الكولكشن النجمه والقلب وغيرها (( العلاقات ))
واضرارها اكثر من الطبيعي منها الالتهابات والالتصاقات وممكن تمزق الرحم على الحمل الثاني عند الولاده
وممكن يطرون المثانه ….الخ
واذا ربيتي للمره الثانيه بعمليه خلاص حكم للابد قيصري لخمس اطفال فقط وعقب يربطونج ماشي عيال
وانا حابه اعيل الصراحه
الله يرزق النساء اجمعين بولاده طبيعيه يا رب ونعيل حتى يتباها بنا وبعيالنا الرسول بين الامم