كب كيك خفيف وصحي + صور توضيحية للصياني الورقية والقمع الشفاف 2024.

السلام عليكن ورحمة الله وبركاته

اشحالكن عضوات وتاجرات وزائرات منتدانا الغالي منتدى سيدات الامارات

عساكن الا بخير

حبيت اراويكن تطبيقي على الصياني
لاني وايد فرحانه يوم سويت الكب كيك وطلع الشكل وايد كيوت وما خذ مني وقت موووووووولية

طبعا الكب كيك تقدرين اتسوين اي مقدار عندج وتفضلينه

انا سويت من بنات افكاري بسرعه بسرعه وهاذيج الساعه

طبعا ان استخدم الاكواب والملاعق المقاييس
انزين خلصينا بس المهم حطيت

2 كاس طحين +3 ملاعق طعام حليب بودر +1 م ص بيكيج بودر + ربع ملعقه صغير بيكين بودر + ربع ملعقه صغير ملح
(ملاحظة تقدرن تستغنن عن البيكيك صودا والملح بس انا احب اضيفهم لانهم يعطون انتفاخ حلو للكيك والملح يجمع ويظهر النكهات اللي في الطبق)

في خلاط الكاس الجيك
تضربين اولا لثواني فقط
3 بيض كبير + ذرة ملح
وعقب اتشلين الغطاء او الدويرية اللي في نص غطاء الجيك وهو شغال اتضيفين
نص كاس سكر اتضيفينه اشوي اشوي وبسرعه يعني ملعقه ملعقه وبسرعه طيب
ربع كاس زيت اتصيفينه ع شكل خيط رفيع

الفانيليا
اذا بتستعملين البودره ففي هاي الحالة اتضيفينها على المواد الجافه
واذا السائله فاتضيفينها ويا المواد السائله
1 ملعقه طعام فانياليا
او طبعا تقدرين اتضيفين منكهات ثانية مثلا
برش برتقال ولا ليمون
تانج اي نكهة اتحبينها بس حطيه مع السوائل علشان تظهر نكهته ابسرعه

طبعا تقدرين اتظيفين اي شيء اتحبينه موز مهروس ولا مكسرات مطحونه اي شيء وخلي المقدار ربع الى النص كاس

وبثثثثثثثثثثث خلصنا المقادير مع الطريقه

الحين انشوف الصور

لاني استخدمت الصينية الصغيره اي القوالب الصغيره فيها 48 قالب وبالتالي الصينية كانت طويله فقمت وقطعتها من النص يعني كل نص 24 قالب

وطبعا من دفاشتي وسرعتي قصيت غلط فطاحت بعض القوالب براويكن كيف سويت فيهن

القوالب على طول صبيت فيهن العيينة بدون ما ارش ولا قطرة زيت
خليجية

القوالب وهن معاهن البرواز البني ما له داعي اتحطين تحتهن صينية بس انا ما انتبهت بسرعه بسرعه وابا اصور والصغارية حوالي فما انتبهت وحطيتها في صنينية ثانية

اهني حبيت اراويكم بدون الصينية نفسها يعني بدون الحدود البنية كيف القوالب واقفه وما انفرشت ولا اتاثرت بس حطيت تحتها صينية لان فتحات الفرن كبيره اشوي والقوالب صغيره