خواتي العزيزات
بغيت منكن وخاصة مدرسات اللغه العربيه
شو هي الطريقه الانسب والاصح لتشجيع الطلاب على الانتباه والتركيز في الحصه
مثل ما تعرفون ان اللغه العربيه ماشاءالله كذا قسم
فبغيت طرق وشو التمهيد يكون يعني بمعنى ثاني ابي منكن اقوال او مسابقات او الغاز تخص اللغه العربيه ومدة تكون 5 دقايق بس عسب التشجيع
ويزاكن الله كل خير
اختي الغالية…
انا مثلتج في البداية كنت متلعوزة كيف اجذب طالباتي خاصة وهم اعدادي…
فسويت اكثر من طريقة… وحاول اني اغيرها من درس لدرس أو من مرحلة لمرحلة…
فمثلاً للقراءة…. اسويلهم بطاقات سميتها بطاقة "القارئة الماهرة" فأي وحدة تعرف تتقن مهارات القراءة تاخذ بطاقة وتجمع البطاقات لين نهاية السنة… واكثر وحدة تجمع بطاقات تاخذ هدية ..
وهذا بعد بالنسبة للشعر بطاقة "الشاعرة الصغيرة" الي تقرأ الشعر باتقان او بتلحين…
واهم شي التهيئة… لأنها طريقة لجذب الطالبات من بداية الحصة … واغلب تهيآتي إما بلعبة مثل الكلمات المتقاطعة أو المشنقة …. أو فلاش تقديمي… واشيا واااايد ممكن تقديمينها..
اما اصعب شي هو النحو…. فالطريقة الي اتبعها في كل دروس النحو .. الخريطة الذهنية…
فالخريطة الذهنية …هي شرح توضيحي من الطالبة لدرس النحو علشان يرسخ في ذهنها وتتأكدين انها فهمت الدرس… فتوزيعين على الطالبات أوراق وألوان ومقصات وأصماغ وتطلبين منهم بعد نهاية الدرس انهم يرسمون خريطة ذهنية للدرس… بمعنى أي رسمة مثلا… وردة… شمس وسحب… وتكتب في داخل الرسمة القاعدة النحوية…
مثال : أنواع الفعل… فترسم وردة .. وفي داخل أوراقها تكتب في ورقة (فعل ماضي) والورقة الثانية (فعل أمر) الثالثة (فعل مضارع) … أو انتج تعطينهم خريطة جاهزة,,, مثلا: فراشة.. يكتبون بداخلها وعقب يلونونها… وبصراحة البنات يستانسون واااااااااايد لما أقولهم يلا نبدأ نرسم خريطة ذهنية,,,
وهاي بعض الطرق الي اسويها… فاذا تذكرت بكتبلتج طرق ثانية…
عطيتيني افكار خطيره
عيبتني طريقه الخريطه الذهنيه
يسلم هالراس يالغاليه
مشكورة فديتج وما قصرتي والله
تسلمين غناتي