صبحكم الله بالخير والعافية حبايبي
اليوم طبختي وياها قصة .. فلهذا انصحكم انكم تشوفون القصة قبل النوم لول
الله يسلمكم .. يوم اليمعه الصبح قعدت اتصفح المنتدى وشفت
موضوع ريوقنا ..
https://forum.uaewomen.net/showthread.php?t=374788
وتطبيق ام مها11ري ..
https://forum.uaewomen.net/showthread.php?t=382851
ووحده من الخوات تخبرتني كيف بيكون الطعم بالشمر .. ورديت عليها … وعقبها
قلت خلني انا اجرب بعد واسوي بدون الشمر والهيل
وهاليوم كنت وايد تعبانه وماروم .. واختي كانت واعية عالسبع ,, جان اقولها اعيني
واتحرطمت شوية بس سوت حليلها وعينت .. انا احطلها المقادير وهيي عينت
وحطيت نص كوب زيت بدل كوب مثل ماقالت ام مها11ري .. وطعلت احلى
وامي قالت شوية ناشفة بس في الاكل كانت لذيذة .. والكل حب الخبز
وهاي العيينة عقب ماتخمرت
وشوفي كيف تنسحب وياج .. جي شكل العجينة لازم تكون
ووقتها نشت امي وقلتلها كوريلنا العجينة واختي بتضغط عليها براحة ايدها
وفديتها ماقصرت كورت لنا العجينة .. وبهالشكل والحجم
وهني اختي ضغطت عليها براحة ايدها ضغطة بسيطة عشان تمدها
ولا تخلينها خفيفة لانج بتسوين خبز وتحشينها باللي تبينه
حطيت عالويه جبن شيدر التعاون .. لانه ماماتي ماتاكل كرافت
ورشيت عليه الزعتر (كثرت) لو اخف شرات السمسم جان طلع احلى
وعقب حطيت عالجبن حبات من الحبة السودا .. ولو الجبن سايح بالحبة السودا بيكون احلى
المرة اليايه ان شاءالله ناوية اجرب احط جبن كرافت عالوية مع الحبة الحمرا
هني في الفرن .. بعد عشر دقايق .. لما بدا الخبز يستوي
هني خلاص الخبزات استوت .. واتحمر الجبن من فوق وكان كرسبي حلوو
ولاحظوا انه خبز الجبن طالع متين وحلو انج تقصينه وتحشينه عكس الزعتر لانه كان وايد وثجل عالعجينة
وسوينا عادي بدون زعتر وجبن .. بالسميم وماصورت لانه طلع شرات اللي في الموضوع الجديم
وفي الوقت اللي اختي وامي يسون الخبز .. انا سويت فول .. من فترة طويلة مب ماكلين وفخاطري كان
وكانت الفكرة انه نحشي الخبز بالفول.. بس الله يهديني وايد حطيت زعتر عليه ..
والجبن كانوا يحطون فيه جام (مربى) وكرافت .. والعادي بالسمسم كلوه بالجبن او بالفول او بدون اضافات
واحينه بحطلكم خطوات الفول .. لول اعرف انه الكل يعرفه بس انا ماعرف اسويه وايد واحبه من ايد اختي
وقلت خلني اجرب اسوي والحمدلله عيبهم وايد
المقادير:
بصلة مقطعة مكعبات صغيرة
طماطة مقطعة مكعبات صغيرة
بقدونس وكزبرة
3 علب فول
وهالفول اللي استخدمته
زيت زيتون
ملعقة كمون
ملعقة ملح
رشة فلفل اسود
كوب ماي
بيضتين
الطريقة:
تحطين البصل في اليدر وعليه الماي او زيت
لكن اللي عندنا في البيت يحبون انه البصل يكون ذايب واذا صادف انه صار كتشخ يقولون البصل مثل التفاح
فاخترعت هالطريقة عشان اضمن انه البصل يذبل ويستوي عدل
المهم تحطين بصل وعليه الماي وعالنار .. واذا نشف الماي والبصل بعده يابس ومانضى .. زيدي عليه ماي
هني البصل اتغير لونه .. والماي بدا ينشف تقريبا
عقبها تحطين زيت الزيتون .. وتحمصينه شوية .. وتزيدين عليه الطماط
وعقب مايذبل الطماط اتحطين الفول بالماي .. واتحطين عليه البهارات وتغطينة شوية
بتشوفينه ان الفول ذاب .. وتهرسينة باللي في الصورة .. وعقب الصور هي اللي بتتكلم
واحينه مع الاشياء الثانية اللي حطيناها عالسفرة
شوربة .. اجبان .. ومربى .. وزيتون .. وكرك
تم بحمد الله … تعبني هالموضوع وايد 
ان شاء الله موضوعي البسيط .. وريوقنا عيبكم
وثانكس للمرور وتشريف الموضوع خواتي .. ولاتنسوني من دعواتكم الطيبة
لانها وايد تسعدني .. وتفرحني
وحياااااااااااكم الللللللللله
المشاركة الأصلية كتبت بواسطة ورده ^_^ 
الله يعافيج وردة .. وثانكس عالطلة الحلوة
مبددددددددددددعة شوية ف حقج وربي
عيني علييييييييييج باردة
يا حظ إللي عندج بج ماشاء الله : )
تسلمين والله يعطيج ألف ألف ألف مليووووون عافية : )