هالسنة إن شاء الله نوينا نسافر بالبر في المملكة العربية السعودية يعني من بوظبي الى السلع ومنها الى الخبر والرياض والمدينة ثم جدة فمكة والطائف وإذا قدرنا بنمر أبها
بس المشكلة اني لا أنا ولا زوجي نعرف الطريج زين.. يعني لو في خرائط واضحة شوي لطرق المملكة، ممكن حد يدلنا عليها.. انا اشتريت من جرير خريطة بس شاكة في صحتها.. وبعد شو احسن تيلفون نوكيا N اللي أقدر احصل فيه خرائط الكترونية؟ وكم ممكن تكلف الرحلة إذا كنا زوجين وطفلتين؟ أو زوجين وطفلتين مع الخادمة؟ وإذا وحدة سايرة من قبل يا ليت تخبرني شو الاستراحات اللي نقدر نبات فيها وهل هي أمان ولا لأ؟ وشو تسوي اللي معاها أطفال في طريج البر؟ وشو الفنادق اللي نبات فيها داخل المدن اللي ذكرتها..
يا ليت الخوات اللي سافروا من قبل بالبر او الخوات السعوديات يعلموني
ومشكورات مقدما
أنا ودي هالصيف نسير السعوديه بالبر >>بس الوالد ما يبااا بالبر .. أونه تعب عليننا
إن شاء الله نسير السعوديه هالصيف إدعووولنا… فإنتظار آراء البنات
بس ليش تبغين تسيرين الخبر في طريج يديد من السلع الين الرياض يعني اذا طلعتي الصبح من بوظبي تكونين الظهر في السلع ولو كملتي على الطول المغرب توصلين الرياض
انا بقولج كيف كانت رحلتنا
ننحن كنا نطلع العصير ووبعد صلات العشا نكون خلصنا كل اجراءات الحدود ونبات في استراحت الحدود
الفجر نطلع ونوصل الين الرياض بعدين نتغدى فيها ونستريح ونكمل الى الطائف لانها قبل قبل وفي شارع ثاني يوصل الين الالمدينه بس نحن نفضل نزور مكه اول
نكمل الين الطائف ونبات في استراحه قبل الطائف لانج لو وصلتي الطائف في الليل صعب تحصلين سكن
الصبح نروح الطائف وبالتحديد منطقه الشفا ناخذ فيها كم يوم بعدين نروح مكه والطريج بينهم ساعه
انا اذا حبيتي تروحين جده تاخذينن تقريبا ساعه ترى جده وابها ابعد شيوالطريج يختلف
اول شي من ناحيه الامان امان والله الحمد وممكن تبتون في استراحات ساسكو(الى هى مثل محطات ادنوك)
وثانى شي على طول الخط فيه لوائح وتعليمات بس الطريج وايد بتحسونه بعيد اذا هاى اول مره.
ثالث شي لازم تخلصون اجراء فيزه الخدامه من بلاد من السفاره السعوديه ابرك لكم عشان ما تتاخر في المراكز
ختيه ممكن تلقين خرائط الفقيه من مكتبة جرير وايد فنانه ودقيقه وبعدين فيه جهاز ملاحه اسم مجلان (جى بي اس)يعطيح كيلو ومكان بدقه.
لازم ترتبون رحلتهم وانا دايما أفضل من الرياض الى المدينه المنوره لان فيه منطقه لازم تفرقون منها للمدينه وعقبها مكه واذا تبون جده ومن عقب الطايف او ابها.
الطريق وايد امن وهو هاي واى .
من ناحيه المبيت افضل تطلعون الصبح وتبون اول ليله في الخرج قبل الرياض ب15 كم تقريباومن عقبها ممكن توصلون للاستراحات المدينه بتاكد لج من هل النقطه
من الرياض لمكه 1200 كم
ومن مكه لجده 45 كم
ومن مكه للطايف 35 كم
ومن جده الابها من طريق الساحل 450 كم
هذا الى اذكره للحين…..وانا في الخدمه
وكم يسعدنا تواجدكم في بلدكم الثاني
اختي العزيزه انا مااعرف كيف تجون من ابوظبي لرياض يعني الحدود كيف ولكن سوف اقولك كل التفاصيل اللي في السعوديه
وانا افضل لك طريق الرياض الطائف لانه طريق مزدوج وسهل وثاني شيئ الناس يكونون فيه واجد يعني مافيه مقطعه بس انتبهوا من السرعه والحوادث بس ماتحسين بطول الطريق فيه
اما الرياض المدينه المنوره بعيد جدا وبعدين يمر من عده مدن والطريق غير مرصوف جيدا
انا انصحك بطريق الرياض الطائف واستقروا في الرياض وارتاحوا وثم واصلوا السير الى الطائف ثم مكه ان اردتي
الوقت بين الطائف مكه ساعه تقريبا
ومن الطائف الى الباحه ساعتين تقريبا
ومن الطائف ابها سبع ساعات اذا ماشين بهدوء اما اذا مسرعين والله يستر تاخذ خمس ساعات وشوي فيه طريقين لهم طريق الساحل الذي يمر ببيشه وهو طريق الجو فيه حار جدا وفيه اتربه بعض الاحيان وغبار والطريق الثاني يكون عن طريق العقاب والعقبه هي الطريق التي تنزل من اعلى الجبال وبس جدا حلو واخف حراره من الساحل
اما من ناحية الاطفال لاتشيلين هم الطريق جدا مريح وفيه بعض الاستراحات والمحلات الغذائيه وانصحك لاتمشون في وسط الظهيره لان الحراره الجو تسخن السياره
عموما اي خدمه او الطلب من عيوني
انا تحت امرك
واذا تبين اسماء فنادق وشقق مفروشه او اي شيئ انا حاظره عيوني
الله ييسر لكم سفركم ويوفقكم لكل خير
دمتي
خطتنا صارت من بوظبي الى الرياض ( مع المبيت فيها 2-3 ليال) الى المدينة المنورة(ليلتين) ثم الى جدة( 5-6ليال) ومن ثم الى مكة للعمرة ونكمل الطريق الى الطائف( ليلتين) ثم الى الباحة وبالتحديد قرية دوس وما حول الباحة وإذا قدرنا كملنا الطريق الى أبها أو رجعنا على طول الى بوظبي..
والغالية Miss Cavalli ما اروم اخلي البنات !! اتيني حالة نفسية سيئة وايلس اخاتيهم وافكر فيهم وايد فقلت احسن لي اخذهم معاي والله يصبرني على ازعاجهم وتعبهم..
