أخباركن بنــــــــــات عساكن بخير
..
…
….
……
المهم أنا الحمدالله ظهر قبولي لجامعة الامارات العربية المتحدة كلية التربية
وحبيت أستفسر البنات إلا داخلات الكلية
كيف الدراسة فيها ؟؟؟
سهله ولا صعبة ؟؟؟
وكيف تعامل الدكاترة مع الطالبات…؟؟؟
وكل الدراسة راح التكون بالانجليزي ولا العربي ولا مكس؟؟
وسمعت أن راح يمتحنونا امتحان لغة عربية وتقنية معلومات ؟؟؟ ومتى بيكون؟؟
وين أحلا قسم قسم التربية ولا قسم العلوم الإنسانية؟؟؟؟
,أي وحدة عندها معلومات ثانية اتضيفها ؟؟؟
..
…
…
وأنا في أنتظار ردودكن
أول شي مبروووك عالقبول
أنا طالبة فكلية التربية وان شا الله اقدر افيدج باللي اقدر عليه
كيف الدراسة فيها ؟؟
سهله ولا صعبة ؟؟؟
شوفي حبوبة اذا انتي حابة تخصص معين وانتي يايه تدرسين مب نفس بعض البنات اللي اكبر همهم فاللعب والطلعات والكشخة وغيرها … صدقيني ما بتحصلين بتمشين ومعدلج بيكون اوك …. وبالنسبة للسهل والصعب ، اذا انتي درستي اول بأول وخليتي كل همج دراستج صدقيني امورج ميسرة باذن الله بس اذا ما درستي عدل هالشي بيخليج تقولين الدراسة صعبة هني وما عرف شو وعلى فكرة هالشي فكل الكليات مب بس التربية لانه اللي بتدرس عدل بتنال اللي تبغيه فالنهاية …
وكيف تعامل الدكاترة مع الطالبات…؟؟؟
للحين الحمدلله تعامل الدكترة وااايد اوك وياي يعني في احيان تستوي اشياء .. بس اذا سرتي للدكتور وفهمتيه ظروفج وجي بيساعدج عادي ومهما كان ترا الدكاترة بشر يعصبون فأوقات يمكن يكونون مضغوطين فيها بس بالتهاية كل شي بالتفاهم والتعاون مع الدكتور ينتج بالأخير شي حلو وتستانسين عليه
وكل الدراسة راح التكون بالانجليزي ولا العربي ولا مكس؟؟
لا فديتج مب كلها بالانجليزي فيه مساقات بالعربي وفيه مساقات بالانجليزي يعني مكس وفيه مساقات اصلا بالانجليزي بس الاساتذة يشرحونها لنا بالعربي ..
وسمعت أن راح يمتحنونا امتحان لغة عربية وتقنية معلومات ؟؟؟ ومتى بيكون؟؟
هذا اول اسبوع لكم فالجامعة راح تمتحنون امتحانات تحديد مستوى لغة عربية و آي تي بس عشان يحددون لكم لفل المساق اللي بتدخلونه يعني لفل 1 ولا لفل 2
وين أحلا قسم قسم التربية ولا قسم العلوم الإنسانية؟؟؟؟
اممم شوفي كل وحدة بتقولج قسمها أحلى لانه هي دخلت هالقسم لانها حابة تتخصص فيه .. فعلى حسب انتي شو حابة تتخصصين … عني انا بقولج قسم التربية احلى لاني مقتنعه اقتناع تااام بهالكلية
,أي وحدة عندها معلومات ثانية اتضيفها ؟؟؟
اممم بالنسبة لشروط قبول الكليات عامة عندنا فالجامعه انج تيبين شهادة الآيلس … طبعا اذا ما عندج هالشهادة تقدرين تاخذينها عقب لفل 3 انجليزي فالجامعه يمتحنوكم … التربية تطلب 4.5 وفيه كليات تطلب 5
واذا حابة تعرفين اي شي ثاني لا تترددين
والله يوفقج وحياج فجامهة الامارات ^ـ^
أولا مبروك على القبول .. وثابري وواصلي طريقج في كلية التربية لأن مافي أحلى منها رغم الشغل يالي فيها..
انا خريجة كلية العلوم .. كرفت فيها خمس سنوات .. وبعد التخرج يلست في البيت وما حصلت وظيفة ..
فرديت اكمل دبلوم من كلية التربية ..
تخيلي .. سنة وحدة في كلية التربية تعلمت فيها اشياااااااااء وايد واستفدت فيها اكثر من الخمس سنوات يالي كرفتهن في كلية العلوم …
انصحج تتمسكين بهالكلية .. رغم الصعوبات يالي بتواجهيها ..
وبالنسبة للتخصصات انا ما عرفها زين .. لأني بس درست دبلوم ..
بس الدكاترة ما عليهم كلام .. يعطوج حقج .. كثر ما تعبتي تحصلي نتيجة تعبج
امشي وياهم خطوة خطوة .. وبتتخرجين بامتياز إن شاء الله ..
الله يوفقج وييسر امورج يارب .. ودربج ورد وذهب يارب 
وانا قبلوني بكلية الادارة والاقتصاد و والله محتارة …
وخايفة اروح بس يالله توكلنا على الله
وشدي حيلج حبيبتي والله يوفقنا اجمعين
