بسم الله الرحمن الرحيم .. وبه نستعين
الســـلام عليكم ورحمة الله وبركاته
حبيــت اراويكم
۩ ۞ ۩ صور رحلتي الى بعض مدن الهند الرااائعه ۩ ۞ ۩
اللي هـــي
( بانغلــور ,, ميســور ,, أوتــي ,, كونــور ,, كويمبتــور ,, حيدراباد )
عــدد المسافرون : 2 أنا وريلي ..
الكاميرات المستخدمه : تلفون سوني اريكسون + كاميرا BENQ …
تاريخ الذهاب : 29/7/2008 ,,
الساعه 3و45 دقيقه صبــاحا بتوقيت الامارات ..
تاريخ العوده : 12/8/2008 ,, الساعه 10و45 دقيقه صباحا بتوقيت بانغلـور ..
لمــدة : 14 يــوم .. ( سياحـــه )
مــلاحظه :
(( فيـــزة الهنــــد تاخذ أسبــــوع … تسيرون القنصليه الهنديه وتقدمون اوراقكم هناك ,,, ويفضل اتسيرون
قبل السفر باسبوعين .. لانه زحمـــه ))
طيــران : الامارات
,,
درجــه : سياحيـه ..
زمن الرحله : 3 ساعات و30 دقيقه
( اخترنا اخر كرسيين عدال الدريشه .. احلى مكان في الدرجه السياحيه ^^ )
المنظر من الطياره
وبعد 3 ساعات ونص وصلنا الى اراضي ( بانغلور )
مدينة بانغلور ( مدينة التقنيه )
والبعض يسميهــا (the garden of India )
جوها في شهر 7و8 معتدل وممطر.. يعني لازم مظله ..
الملابس اللي لبسناها هناك خفيفه وقطنيه ..
(( للأســف انشغــلنا وما صورنا المطــار ))
في مطار بانغلور استقبلنا ( درايفر ) ريلي كان مرمسنه من دبي عن طريق واحد من الاهل تعامل معاه قبل ..
هو كــافر بس خلوق وامين ..
وهاي صورته
( اسمه صعب وطويل ) المهم كنا نزقره ( أنــا ) الشده عالنون ..
يعني ( اخ )
المعاهد والجامعات متوفره بكثره هناك .. وماشاء الله فيها طلاب عرب واايد ( الله يوفقهم ) ..
راح تلاحظون ( زحمه ) في هالمدينه .. حركه دائمه ماشاء الله ..
من اهم شوارعها ( ام جي رود ,, اختصار ( شارع مهاتما غاندي ) +
(commercial street )
هالشارع وايد حلو شفت المسلمين والمساجد هناك بكثره .. وسوقهم واايد حلو .. للاسف ما صورت السوق..
وهاي بعض الصور لمدينة بانغلور ..
مكاتب الوزرى
التاكسي مالهم ويسمونه( الاتو ) عادي ييلسون فيه 8 اشخاص مادري كيف !!
ياسـلام ع المطر ..
بانغلور فيها مراكز تســوق بكثره وملابسهم رووعه ,,
بخصوص الاسعار في بعض الاشياء حسيت ارخص عنا بشوي.. وفي اشياء نفس اسعارنا ..
يلسنـا فيهــا يوم واحد ع ساس بنرد لها في العوده … وثـــاني يوم توجهــنا لمدينــة ميســـور
……………………………
يتبــــــــــــعــــ ^.^
ميســـور
( المدينه التاريخيه )
تبعد عن مدينة بنجلور بمسافة ( 300كم )
ثــاني يوم تحركنــا بالسياره الى ميســور ,, درب تقريبا 3 الى 4 ساعات
ما تحسون بالدرب مووليه .. تشوفين جبال ومناظر رووعه ..
جوهــا بارد ماشاء الله والمطر مستمـر تقريبا …
تميــنا فيها ( 3 ايام )
هني الملابس لازم اتكون اثقل بشوي عن ملابس بانغلور .. لانها مدينه بارده .. بس مب ثقيله وايد ..
الدرب اللي يودي ميسور
الحمدلله الرحله كانت ممتعه ومريحه .. وبعد كمن ساعه وصلنـا ميسور ..
نزلنا في فندق اسمه ( باي فيستا ) .. فندق اربع نجوم ..
الخدمه ممتــازه ..
تفاجانا بوجود الخليجين هناك .. ماشاء الله حسينا اعمارنا في دبي ..
الليـــله ( 3700 روبيه) مع الضرايب
الفندق فيــه
( مسبح + مطعمين + غرفة المساج + بار عافانا الله + صالة رياضه + صالة افراح )
اللـــوبي :
المسبــح
غرفــة المســاج
الممـــر
يتــــبـــــعــ ^.^ ….
…………………..
المطعم ..
عيبني تصميمه واايد ..
اسمه ( جنغل ) وصدق كأنج يالسه تاكلين في الغابه ..
شوفوا الصور واحكموا
الريـــوق ( بوفيــه ) Free
بعد ما كلت (الاومليت ) تذكرت اني ما صورته
الغــدا .. ننـــساه وما كنا نيــوع ^^
العشـــا تختارينه من المينيو( مب بوفيه )..
يتبــــعـــ ^.^ ــــ …
…………………..
غرفـــة النـــوم
السمـوحه ع الصوره .. ماحصلت غيرها ..
الحمــام عزكم الله
ريحنــــا في الفنــدق شــوي ,, وتوجهنـــا الى
( متحف تيبو سلطان )
…………………..
يتبـــــــعـــ ^.^ ـــ
متحــف ( تيبـــو سلطــان ) حاكم ميسور القوي سابقا الملقب بــ ( نمــر ميسور )
اللي حارب الانجليز مع جيشه .. وقتل تقريبا 3 الاف بريطاني ..
ولكن للاسف الانجليز تعاونوا مع بعض الجواسيس
وفاجاوه بالهجوم وهو في قصره ..
حتى انه تم يحاربهم بسيفه لين ما قتله جندي بريطاني ..
وراح اراويكم قبــره والقصر بعد شوي ..
المتحف ..
تشوفون الخلق اللي باللون الازرق
هذيلا طلاب وطالبات يايين رحله مدرسيه
للاسف ما قدرنا انصــور داخــل لانه ( ممنوع )
وهاي صــور السجن اللي سجن فيه الجنود الانجليز
( زياااغ من داخل )
ها من دااخل
وهني كانوا يربطون ايد الجنود البريطانيين بالسلاسل
ويفتوح بوابه صغيره داخل السجن ايي منها ماي البحر .. يصكرون البوابه بعد ما ينترس الماي لين خشمهم
.. ( يعني يالله يالله يتنفسون ) هالعذاب اللي كانوا يحصلونه .. ماقدرت اصور البوابه لانهم صكروها الحينه ..
هالمنظر ورى السجن .. يامحلااااه
تحركنا من عند المتحف وسرنا صوب قبــره
قبــر الملك ( تيبــو سلطان )
( ما كنت ادري انه قبره الا بعد ما تصورت وخلصت ,, والا جان ما دخلت )
هو قبــره في النص ,, وبعص الجنود عاليسار والبعض عاليمين 
لقطه سريعه ^^
ســــرنا الفندق وريحنــا شــوي .. وبعدين سرنا
( حديقة الحيوانات )
ملحوظـــه : الشمس مووليه ما شفناها في ميســور ,,, الجو مغيــم , 24 ساعه مطر ..
يتبـــــعــ ^.^ ـــ
