ليش ماعندنا اتيكيت الانتظار؟
علمتني وظيفتي ان نحن كشعب وبصفة عامة
علاقتنا بالانتظار سيئة جدا … وفئة قليلة بس اللي متصالحين معاه
انا ما اتكلم عن الموظف اللي من اول الدوام لين اخر الدوام ضرب جاهي وقهوة
المهم
يبدا اليوم وانا واللي وياي نمشي بالدور ونحاول نتلاحق المراجعين ونخلص شؤؤنهم
واييني الأخ في الله يباني اطوفه جدام عشرات المراجعين .. خير يالاخو؟ لا الصراحة تعبت من اليلسة وما قدر اتريا.. وانتي شكلج تطوفينهم علي
وشوي ولا تطيح عيني باللي يالسة جدامي مثل المدخنة تنفخ ف ويهي من صباح الله خير … انتي متى بتخلصين؟؟؟؟؟!!
عفوا اختي بس ذكريني باسمج وبجيك … واييني رد مثل الصاعقة انتي الصراحة مافيج مخ
ليش ماعندنا اتيكيت الانتظار؟ ساعات اتطالع الموجودين والمح مراجعة تأخرت ساعتين تبتسم ف ويهي ومن فرحتي ما اصدق
وأستأنس بس لما المح اللي حولها وعيونهم كلها غضب استغرب ليش كل هذا … معقولة كل هذا لان نحن متشائمين ان في حد بيي ويأخذ دورنا بالواسطة اللي صارت أسوأ كوابيسنا؟
يوميا لازم اسمع كلمة تجرحني وتتعدى علي بشكل شخصي .. انا امثل هال دائرة بس هذا ما يعطيكم الحق تتطاولون علي ويكون خاطري ف لحظة اني انفجر واقولهم انا موظفة عند الحكومة عند الدولة وهي اللي تفصلني اذا كنت ما استحق هالوظيفة
الانتظار سيء وكابوس بالنسبة للبعض لأنهم مايعرفون يتعاملون معاه
انتظرو شوي
بس شوي