السلام عليكم ..
سامحون عزيزاتي بدخل ع طول بالموضوع لاني داشة من الفون ويلعوزني وااااايد ..
يا بنات انا عندي بيبي ارضعه طبيعي اللهم بارك ومشكلتي عندي حساسية بإيدي يعني اكزيما ؛ ظهرت لي شهر 6 / 2024 بسبب اني كنت يالسة احف ايدي بالحلاوة واحمرت عندي وبعدها كنت استخدم الصابون العادي وجي وهني تفاقمت الاكزيما وصار لونها بني وتحكني وااايد خاصة بالليل واحيانا تطلع منها سوايل شوي وهي نفس الحبيبات ع سطح الجلد واخافها تنتشر !!!!!
رحت لطبيبة الجلد في كوزموميد وعطتني مراهم وماقدرت انتظم بسبب الياهل خاصة فليل لازم احطها وماقدرت .. وقمت انتظم بعدها وحسيت بالفرق بس من اوقف ترد مرة ثانية .. ورحت للدكتورة وخبرتها فكتبت لي مراهم ع قولتها اقوى بس انا ماشوف انها قوية؟!! واحس المراهم القبلية احسن عنها؟!!
ع فكرة ترا المراهم الي استعملها تحتوي على الكورتيزون والي له اضرار وايد من جي انا خايفة لاني ارضع وقريت ان الكورتيزون يدخل في لبن الام ومضاره انه مايخلي البيبي ينمو !!!
اخاف يأخر نمو ولدي بسم الله عليه الله يحفظه !!
شو اسوي؟! شو استعمل؟! خبروني بنات وين ادق راسي؟!
خبروني شو من الصوابين استعمل؟! وشو من الكريمات المرطبة اوكي؟!
سمعت عن الشريش وقريت عنه وانه وايد مفيد للاكزيما .. شو رايكم ومنو جربته ؟!
قريت تجارب بنات في المنتدى وجي وتشجعت ..
{ كتبوا في قوقل ( دواء الاكزيما للأبد – سيدات الامارات ) } بتشوفون مواضيع البنات من منتدانا مع الشريش والي اسمه شجرة النيم علميا ..
سامحوني طولت عليكم بس والله نفسيتي تعبانة من الاكزيما خاصة اني ارضع واخاف ع ولدي
باختصار :
شو من صوابين مرطبة استعملها في الحمام؟!
شو من كريمات مرطبة اوكي؟!
شو رايكم بالشريش؟!
شو سوت الي ترضع طبيعي وفيها اكزيما؟!