عزيزتي احلى المزايين …
الصراحه رايي في المدرسه بشكل عام ممتازه
من حيث الاداره والمدرسات
والاهتمام بالطالب والرقابه على الطلاب في الحمامات والفسحه والساحات بشكل عام
بس انا اللي ضايقني معلمة مادة الانجليزي عندهم بالرغم من ان تدريسها ممتاز والحق يقال
بس الصراحه ما تعرف تتعامل مع الطلاب حسب مستوياتهم وما في سلاسه في التعامل معاها
مثلا انا ولدي من النوع الحركي وهذا الشئ يسبب عدم التركيز طبعا وانا اعرف هالشئ
بس بعد انا مهتمه في تدريسه ومتعاونه عليه انا وابوه ….
والدليل انه يحصل على درجات عاليه في بعض الامتحانات والاملاء
وقراءة القصص في مادة الانجليزي …
بس المعلمه الله يسامحها من النوع اللي تحب الولد اللي يكون على طول شاطر معاها
وبس وتهتم فيه مع ان المفروض الاهتمام يكون للجميع ولكن للضعيف اكثر
والمفروض انها تكون هي على تواصل دايم مع البيت علشان تحسن من مستوى الطالب
بقدر الامكان لانها مسؤوله عن هالشئ امام الله والمسؤولين وضميرها
بس هي ما كانت مهتمه بشكل كافي اذا اكلمها تقول لالالالالالا مستواه ضعيف
وما يصير جذي يعني تخيلوا كم مره انا اطلع من المدرسه اصيح من القهر
على ولدي مع ان في مدرسات يخبروني بمستواه لما ينزل بس ما انقهر
لان اسلوبهم ممتاز ويظهرون الاهتمام والاحترام
وبينون الضعف في شو بالضبط والحين هو ممتاز عندهم او بنقول جيد جدا
بس هذه المعلمه ابدا وانا ما اقول هالكلام لانه ولدي ولازم ما تقول عنه جذي ولا جذي
بس لا والله بالعكس انا أأيد ان المعلمه تكون على تواصل دايم
وبالاخص لما مستوى الطالب ينزل فالمفروض
تتعاون مع ولي الامر وتخليه على اطلاع علشان يحسنون مستوى الطالب
بس المعلمه على آخر السنه كلمت المديره بان هذا الطالب مستواه ضعيف
واتخذي معاه الاجراء الازم واستدعتني وقالت والله مستوى ولدج نازل
ونحنا ما نقدر نخليه في المدرسه والافضل انج تنقلينه لمدرسه ثانيه
تفاجأت الصراحه وااايد ولما رجعت البيت قعدت افكر وحسيت ان ولدي انظلم
وانهم ما عطوه فرصه ولا حاولوا معاه بشكل كافي فرحت انا وزوجي نقابل المديره
واخذت معاي كل الاوراق اللي حصل فيها على درجات كامله
علشان تعرف ان ولدي بالرغم من عدم التركيز اللي تقول عنه المعلمه
يقدر يستوعب ويحصل على درجات عاليه …
يعني كان المفروض يكون في عدة نفاط تنبه الطالب وولي الامر قبل اتخاذ هالاجراء …
وبعدين بكتبلكم شو صار في المقابله وشو النقاط اللي في رايي
كان المفروض يتبعونها والحين اسمحولي لاني تعبت من الكتابه واعصابي تعبانه بعد
واتمنى اذا في اي ملاحظه او وحده منكم حست اني غلطانه في شئ
تخبرني نحنا كلنا خوات في الله والمفروض تكون بينا النصيحه لوجهه تعالى …
وجزاكم الله خير ……..
المشاركة الأصلية كتبت بواسطة ام حور 
لا تتاخرون في الرد 
للرفع