عزيزاتي عضوات منتدى سيدات الامارات
اليوم قلت بنزل لكم عن عمليتي والمراحل اللي مريت فيها من كل النواحي
طبعا العملية يبالها التأهيل النفسي والجسمي ويكون حد معاكم يشجعكم ويوقف وياكم لانها صدق راح تكون عواقبها وخيمة على اللي مب مستعدين لها
في البداية انا عانيت من السمنة من المرحلة الاعدادية وزادت عقب الزواج والحمل والولادة وما خليت رجيم ولا رياضة ولا عيادة لكنني كنت اوقف ويرد وزني دبل لاني ما كنت احصل التشجيع واللي محيطين فيني كان يهبطون من عزيمتي وايد وعقب الزواج ريلي ماقصر كان دايما ينمعني من اني اكمل للاخير لما يشوفني ضعفت شوي كان يقول لي خلاص وقفي جي وزنج اوكيه ومايخليني على الاقل اثبت الوزن ومن الحمل والولادة لاني في فترة الحمل اضعف وايد ولكن بعد الولادة ارده دبل ومن غير اني طبيخة درجة اولى ، وياته فترة ريلي يتعشى بالليل قبل الرقاد ولاااازم وغصب آكل وياه حتى لو كنت متعشية مع اليهال بحجة انه مايحب ياكل بروحه ووقت عشى اليهال مايكون موجود يا طالع البحر او مشغول ، تعبت من الوزن الزايد وطلعت عندي مشاكل صحية منها اني اشخر في الرقاد مب دايما طبعا وتعب في الركبة مااقدر اصلي وكسل فضيييع لو ارقد 15 ساعه مابتكفيني والتهاب في عضام القفص الصدري من الاحتكاك وهو بسيط الحمد لله وغييره وغيره من اعراض السمنه طبعا
قبل سنتين ونص قريت موضوع هنيه في ها المنتدى للأخت أمونه 2000 اعقد اذا ما غلطانه بالاسم عن التكميم وكيف سوتها واتواصلت وياها وما قصرت الصراحة ودورت عن التكميم في مدونة وايد وقريت عن التجارب للي سووها وشو اللي ينصحوا فيه و اتواصلت ويا دكاترة مختصين ومن غير اللي رحت لهم في المستشفيات الحكومية مثل مستشفى الفجيرة ومستشفى توام وحددوا لي موعد للعملية وراجعت في مستشفى التوام وسويت كل التحاليل والفحوصات المطلوبة وحددوا لي الموعد بتاريخ 8/12/2014 وطبعا أنا كنت أبي أسويها عن الدكتور عبد السلام لأنه في الإمارات أحسن دكتورين لها النوع من العمليات هو عبد السلام واللي في مستشفى خليفة واللي طبعا يعطي مواعيد بعيدة لسنة او سنه ونص المهم قدمت في ديوان محمد بن زايد ورحت مستشفى زايد العسكري(قدمت في اكثر عن مكان عسب اللي يطلع لي بسرعه واسويها قبل شهر 11 لاني كنت بسافر اخر الشهر ) وقلت لهم أبي أقدم تقرير للجنة الطبية وسواها لي الدكتور وقدموها وطرشوا رسالة لدوام ريلي بالموافقة ورحت وطلعت الضمان و وديته مستشفى النور وشفت الدكتور وحدد لي العملية عقب أسبوعين بتاريخ 3/11/2014 وقبلها أسوي كل الفحوصات المطلوبة خلصتها في زيارتين بس ، ويوم العملية كان موعدها الساعة 2ونص وصلت المستشفى الساعة 11 وسويت إجراءات الدخول وحطوني بغرفة بروحي وانتظرت لين الساعة 4 لأنه قبلي دخلوا كذا حالة مستعجلة ما كانت في الحسبان وكانوا خواتي وخالتي معاي وريلي طبعا كان رافض إني أسويها بس ما منعني و لأنه ما عطاني أي سبب مقنع لرفضه رغم إني يبت له ثلاث تقارير من ثلاث مستشفيات اتأيد اني لازم اسويها للمشاكل للي أعانيها والكتلة كانت فوق الأربعين طبعا كنت مستخيرة ومرتاحة وقبل كل شي هاي حياتي وصحتي وما اسمح لحد انه يدخل فيها وحتى امي وابوي كانوا رافضين لانهم خايفين علي وطبعا كلام الناس عن العملية عن اللي ماتوا بسببها واللي… واللي..
وكنت افهمهم انه العملية مب خطيرة بس عاد الكبار ما يرضوا يسمعوا لحد الله يهديهم
المهم دخلت العميلة وأنا مرتاااحة والتعامل كان في القمة بس كنت وايد أوصي انه ما يمسني ريال الا وقت العملية بس لانه فيه ممرضين رياييل وهم يراعوا ها النقطة إذا كانت الحالة مواطنة او أي حرمة محجبة حتى وقت التجهيز ما خليتهم يمسوني روحي انتقلت من السرير للثاني وأوصي النيرس انه تكون فوق راسي واي شي يطلع مني اتغطيه سواء شعري او ايدي ،
بعد العملية اول ماقمت حسييت بألم فضيع وماتحملته الصراحة واتاخروا على بالمسكن لانه لازم يتأكدوا انه البنج ما مأأثر فيني وبعد ساعة عطوني وكملت رقادي وبعدها الحمد لله ماحسيت بشي أبدا واليوم الثاني سووا لي فحص السائل وكل شي تمام وروحت البيت وقعدت 3 ايام كنت احس بخمول وتعب من اثر البنج وقلة الاكل وطبعا ماكنت ماخذة اجازة الا اربع ايام بس ومع الويك اند وداومت سابع يوم بعد العملية وهو بعد العملية لازم راحة لمدة اسبوعين مب اقل وانا دوامي مكتبي مب متعب الحمد لله وكل شي كان تمام الحمد لله والحين كملت 3 شهور وخمسة ايام خسرت فيهم حوالي 20 كيلو والتغيرات اللي صارت كانت أكثر من رائعة من الناحية النفسية والشكل اتغير ورديت للملابس القديمة اللي ماكنت اقدر البسها ، طبعا بعد العملية واجهتني مشاكل بسيطة بس كنت مستعدة لها من البداية ومحضرة نفسي عدل وأولها اللوعة واستمرت معاي أول أربعة أيام فقط وعقب الحمد لله حتى لو اترس معدتي مايصير لي شي وثاني شي هي الاكتئاب طبعا كان خفيف بالنسبة لي لاني كنت افكر بالاكل مع اني ماكنت ايوع ،ووايد تطرى على بالي انواع الاكل اللي احبه واني مااقدر اكل اللكمية اللي ابيها والحمد لله اتغلبت على ها الشي وماكان واضح علي ابدا وسمعت عن حالات استوالهم اكتئاب فضيع واللي يحس باللوعة لفترة طويلة عقب العملية وغيره وغيره وكنت انصح أي حد يسألني انه محد يسوي العملية قبل لا يعرف كل شي عنها ويأهل نفسه لها الشي ويختار الدكتور المناسب.
وعقب العملية اتي الرياضة اول شهرين مشي خفيف ل نص ساعه بس وبدون جهد وعقب الشهرين تبدا الرياضة القوية اللي فيها الحركة البدنية المجهدة مثل الزومبا والايروبيك والالات المتنوعه وانا للحين على المشي بس واقات اخورها وبشترك في نادي فيتنس فيرست ان شاء الله وبسوي رياضة الشد والنحت لأنه الحين بدا الترهل الخفيف لي ولازم ابدأ والا عقب صعب يروح الترهل.
ولاننسى الفيتامينات طبعا احطها معاي بالشنطة واكل منها يوميا مرتين ومع فيتامينات للشعر والاضافر والفيتامين دال والفيتامينات الشهرية لمدة 6 اشهر
الحمد لله فادتني وايد بس عندي الشعر للحين يتساقط بس خبرني الدكتور فترة وبيوقف
وهاي قصتي مع التكميم والحمد لله اني ماندمت اني سويتها وامي وابوي اقتنعوا أخيرا لما شافوني مستانسة ومرتاحة واخواني معاي بكل شي الا ريلي الله يهديه كل مرة يذكرني باني سويت العملية بدون رضاه ومرات احسه يغار لاني وزني نزل وهو ماقادر ينزل وزنه لانه دايما يقول باكل نفس اكلج وبودر العيوش والاكل المتاخر بس مايبين لي لانه كبريائه ماتسمح له ، هههههههههه الله المستعان
والحين عندي بعض النصايح للي تفكر تسوي العملية وهي انها تكون مستخيرة ومرتاحة من ها الناحية ويكون وزنها صدق زايد يعني الكتلة اربعين وفوق واتشاور حد يكون مثقف وفاهم وتبحث عن ايجابيات وسلبيات العملية واتأهل نفسها كليا للتغييرات اللي بتحصل عقب العملية والاهم من كل هذا اختيار المستشفى والدكتور المناسب والاهم اتباع نصايح الدكتور بالحرف الواحد ، وبعد لاننسى الماي لانه بعد العملية الجسم يستوي له جفاف وقلة الماي بتأثر على الجسم بسرعه ولاتنسوا الكلى تعتمد على الماي وقلته تسبب الضرر لها .
واللي ماتقدر تسوي بحسابها الخاص وعندها ثقة رقم واحد تقدر تسويها والا اللي عندها زوج او اخ او أي حد بالجيش تقدر تسوي على حساب الجيش واللي تبا بعد تقدر اتقدم في ديوان محمد بن زايد ومايقصروا الصراحة ومستشفى التوام في دكاترة مضمونين وكلمت كذا حالة وكانوا مرتاحين وامورهم تمام. يعني الحين كل حد يقدر والحمد لله الدولة مامقصرة ابد والله يديم عزها ويطول لنا بعمار شيوخنا
وفي نقطة مهمة وهي انه صح في ناس اتأثروا وانتكسوا بسبب العملية وهم نسبتهم قليييييلة وايد ومنهم اللي تعب واتوفى وهاي كانت بأسباب ثانية موجودة فيهم وبانت بعد العملية بس عاد فيه من الناس ماتفهم ها الشي ويردون السبب على العملية نفسها.
ونصيحة اخيرة بنات لاتروحون اي عيادة ماتعرفونها لانه دكتور في مستشفى التوام خبرني عن حالات ايونهم مسوين لهم العمليات غلط وتصحيحها صعب يضطروا يسوون لهم عملية التحوير يعني جوفوا لكم عيادات مضمونه
والسموحة على الاطالة واي استفسار انا حاضرة والبنات اللي طرشوا لي على الخاص رديت عليهم
والله يوفقكم جميعا ان شاء الله
خطوة جريئة وشجاعة
انا للأسف اللوعة بعدها متعبتني بس طبعا اهون واخف من قبل
ونزول الوزن ممتاز الحمدلله وشعري بعد وقف تساقط
العاش ويويو الحمد لله على سلامتكم
خبروني شو سويتوا لشد الجسم وشو اللي كنتوا اتعانوا منه واختفى بعد العملية
العاش كم لج من سويتي العملية؟؟
ومشكورين على المرور فديتكم
